Assalamualaikum w.w. para dunsanak sapalanta,
Insya Allah barakaik doa kito sadonyo, cuaca Jakarta hari Jumaik sore sampai
malam kapatang bukan sajo sangat basahabat, tapi juo pambicaraan dalam rapek
pambantukan MAPPAS bajalan lumayan lancar. Nan hadir labiah dari 20 urang,
ampek urang ibu-ibu, tamasuak Bu Ir. Sulfah E. Yamin dan Ibu Warni Darwis dari
Gebu Minang . Ruponyo sabagian gadang nan hadir itu adolah urang Agam, disusul
dari Solok. Duo urang baasa dari kampuang ambo, Pariaman. Sasudah didahului jo
small talks saparati biaso, rapek balangsuang antaro jam 17.30-20.30 WIB
disalingi jo shalat magrib bajamaah nan diimami dek dunsanak Ronal, jedah minum
teh/kopi dan makan Pop Mie nan murah meriah. Rapek diakhiri jo doa nan dipimpin
dek Dunsanak Sutan Lembang Alam. Sudah barang tantu saparati bisao sasudah
salasai rapek, pak Sekjen kito mangabadikan peristiwa iko.
Ambo maraso bahaso gadang bana manfaatnyo diskusi pandahuluan nan balangsuang
malalui milis-milis kito, baik RN, [email protected] atau [EMAIL
PROTECTED] nan ditangani pak Darul. Jo caro itu, indak banyak bana paralu ado
paparan lai karano nan hadir alah tahu apo sajo nan paralu dikarajokan. Acara
rapek bisa langsuang maju ka pangambilan kaputusan, dibantu dek arahan nan
sabana padek dan lugas dari pak Chaidir Nien Latief [ kito jan lupo bahaso
baliau ko dalam zaman revolusi dulu adolah anggota Tentara Pelajar]. Dalam
hubuangan iko, ambo ulangi baliak pandapek ambo bahaso sasungguahnyo
milis-milis kito tautamo RN sabananyo alah manjadi parlemen urang Minang
saDunia. Kito barapek, bamusyawarah, batuka pikiran, bahkan kalau paralu
batangka, malalui dunia maya, cyber space. Untuak mambuek kaputusan itu
sandiri, yo paralu bana batamu, karano ado nuansa-nuansa pandapek nan indak
sapanuahnyo dapek dituangkan sacaro tatulih dalam email.
Tabatiak pulo dalam pikiran ambo, saparati nan alah ambo posting sabalun iko,
bahaso sabananyo kito bisa maadokan samacam teleseminar urang Minang sadunia
malalui layanan milis iko, tamasuak untuak mambahas masalah-masalah gadang nan
taranti wacananyo saparati ABS SBK. Kito buek karangko acuannyo, kito bantuak
SC/OC, kito tunjuak moderator, kito tantukan jangka wakatu batuka pikiran
sacaro padek, kito undang babarapo tokoh untuak manyajikan makalah sarato
makalah pambandiang, dibari kasampatan mananggapi kapado para dunsanak sado
alahe bak kato Adinda Ajoduta, dibuek panitia parumus, dan kudian kito
rumuskan apo kasimpulan. Ambo raso caro iko bukan sajo efektif tapi juo
efisien. Murah meriah. Kalau paralu, sagalo diskusi nan balangsuang dalam
teleseminar tu bisa didownload dan diprint, difotokopi, dijilid, sahinggo bisa
dibaco kudian dek para dunsanak kito nan alun sempat sato.
Cuma indak sapanuahnyo dunsanak kito urang Minang sadunia bisa sato dalam
teleseminar iko. Peserta rapek ko sadar bahaso dunsanak kito Minangranah alun
masuak dalam jarungan saiber ko. Jadi untuak samantaro, teleseminar ko baru
bisa dilakukan di antaro kito warga Minangrantau. Baa mako alun banyak bana
dunsanak kito warga Minangranah sato basilanca di dunia saiber ko? Kok
dikatokan karano biayanyo maha, bisa juo. Tapi kok sabana mau, sabananyo bisa
juo tajangkau. Nan mangherankan, bak kato pak Chaidir, bahkan aparatur
pamerentahan daerah nan alah ado jaringan internet, indak banyak juo nan
manggunokan sarana nan canggih ko. Karano itu disadari bahaso program wireless
internet Ananda Katik Sati atau West Sumatra Telecom dari Dunsanak Herman
Jambak paralu bana didorong. Kalau indak baitu, kataicia juo dunsanak kito di
kampuang.
Baliak ka rapek MPKAS Jumaik kapatang. Indak banyak cingcong, rapek maambiak
kaputusan penting, yaitu : 1) MPKAS mamutuihkan mambantuak MAPPAS. 2) untuak
manyusun visi, missi, ciri khas wisata Minang, sarato sagalo hal nan takaik jo
bantuak organisasi sarato rancangan susunan panguruih, dibantuak Panitia/Tim
Tujuah, nan tadiri dari St Lembang Alam, Herman Jambak, Irwansyah, Arief
Rangkayo Mulia, Beni Inayatullah, Darul Makmur, dan Ronal Chandra. 3)
Panitia/Tim Tujuah ko diagiah wakatu untuak manyalasaikan tugasnyo salamo duo
minggu, yaitu sampai tanggal 23 Februari nan kadatang. Kapado para dunsanak sa
palanta dibari kasampatan untuak maagiah masukan nan paralu kapado Panitia/Tim
Tujuah ko malalui milis-milis kito.
Sadonyo pambicara dalam rapek sapakaik, bukan sajo potensi pariwisata
Sumatera Barat sabana gadang, tapi juo sabalun ko praktis alah bajalan surang.
Indak bana dikampanyekan, urang ka datang juo. Bahkan sampai kini alah datang
1.6 juta urang. Jadi target 2 juta orang nan dilatakkan dek pak Kurnia, rasonyo
malah bisa dilampaui. Dalam malakukan kagiatan nantik, rapek juo sapakaik
untuak mamanfaatkan jalur nan alah ado ka Pamarentah Daerah saparati nan
tacantum dalam SK Gubernur, saparati nan gigih dikanakan ka kito dek Dunsanak
kito Kurnia. Baa juo peranan dan kapamimpinan pak Gubernur jo jajaran baliau
jaleh gadang bana, khususnyo dalam mambuek kaputusan untuak manangani baiak apo
nan diparalukan maupun untuak maluruihkan apo nan alun bana di nagari kito tu.
Bak kato Dunsanak St Lembang Alam, peranan pak Gub sabana gadang dalam
manantukan the dos dan the donts dari pariwisata ko.
Kok baitu apo nan jadi masalah salamo ko ? Nan sabana kurang adolah
koordinasi, nan sabananyo marupokan pinyakik sagalo urang Indonesia. Ambo
mancubo mambandiangkan tantangan nan kito hadoki ko sarupo maadokan tune up
masin oto, yaitu manyetel sagalo unsur pariwisata ko supayo sagalonyo bajalan
basamo-samo dan saliang tunjang manunjang sacaro mulus, indak bajalan surang-
surang sajo.
Sudah barang tantu kami nan sapangka, yaitu pak Chaidir, pak Sekjen, sarato
ambo jo staf ambo, Budhy dan Erizal nan mampasiapkan ruangan rapek jo sagalo
fasilitasnyo, sabana sanang ati jo lancarnyo rapek ko. Alhamdulillah.
Sampai disikolah dulu siaran pandangan mata rapek kito tu. Untuak hasil
finalnyo, manunggulah kito dulu. Dunsanak nan ingin maagiah masukan ka
Panitia/Tim Tujuah, silakan. Sampaikan malalui milis-milis kito.
Wassalam,
Saafroedin Bahar
---------------------------------
Don't get soaked. Take a quick peak at the forecast
with theYahoo! Search weather shortcut.
Sukseskan Pulang Basamo se Dunia, Juni 2008.
-----------------------------------------------------------------
Website: http://www.rantaunet.org
============================================================
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Email dengan attachment tidak dianjurkan, sebaiknya melalui jalur pribadi.
- Posting email, DITOLAK atau DIMODERASI oleh system, jika:
1. Email ukuran besar dari >500KB.
2. Email dikirim untuk banyak penerima.
--------------------------------------------------------------
* Berhenti (unsubscribe), berhenti sementara (nomail) dan konfigurasi
keanggotaan, silahkan ke: http://rantaunet.org/palanta-setting
* Membaca dan Posting email lewat web, bisa melalui mirror mailing list di:
http://groups.yahoo.com/group/RantauNet/messages
http://groups.google.com/group/RantauNet?gvc=2
dengan mendaftarkan juga email anda disini dan kedua mirror diatas.
============================================================
