Assalamu'alaikum Wr.Wb. Maa nyo Tan Bandaro Labiah ... ? Sutan pulo nan ambo imbau baliak, satantangang etongan nan alah dikatangahkan, kok bisiak alah kadangaran, kok etongan alah kalampauan, marilah samo-samo kito tapati.
Ramo-ramo si kumbang jati Datuak Endah pulang bakudo Kok coitu etongan nan tajadi Sananglah hati jo kiro-kiro Masalah Bendi nan Tuan rusuahkan, asa lai Bendi bugih lamo ka baa juo lai, atawa dangau nan ditakuikkan, dangau nan sampik ketek pulo, asa lai bisa maunjuakan kaki, alah jadi tumah, asa lai bisa tapiciangkan mato alah sanang tumah. Nan pantiang, dunsanak pakarek-an ambo nan di Bogor ko lai basuo barikuik jo rang rumah sarato kamanakan nan ado. Indak baitu doh Tan, dek ambo sadang istirahat komah dan sabanta lai ka baliak ka sawah mambajak dan manyiang dimaa kini pupuak kato rang Jawa Timur langka lo kini dicari di pasa, mako ambo ka baruah cah sambia maelok-i pimatang sawah. Wassalam, M.St.Bangsawan > Assalamu'alaikum Wr.Wb. > > Sairiang balam jo barabah > Balam lalu barabah mandi > tabang malayok dibaliak awan > banyakno ampek puluah ampek] > > Sairiang salam dengan sambah > salam lalu sambah kumbali > sungguahpun tibono di Tuan Bangsawan > ujukno kapado urang nan rapek > > Indak saikua pipik nan inggok > padi sawah indak sahalai > maaf jo nan ambo harok > dalam manjawek ambo talalai > > sapanajangan rundiangan nan katangah di Tuan, nan luruh lah makanan > banang, nan bungkuak lah makanan siku, tibo sungguah ditampaikno, > > Limbak nan daripado itu, kok tanyo iyo paralu jawek, kok gayuang paralu > sambuk, nan kajawek kabarino diambo adolah : > > satantangan kabajapuk ja bamalam di Bogor, Insyaallah, kok janji nan > bakarang, padan nan baukua, mako janji kan iyo nak batapek-i, kok ikara > kan iyo nak bamuliyakan. > > papatah urang tuo-tuo saisuak : > Anak urang tanjuang alam > pai bajalan ka Bukiktinggi > rumah dibuek tampaik bamalam > palanta dibuek tampaik baranti > > isino bana, rasono lai kabajapuk jo ka bamalam Tuan di Bogor, > > Alah kasanang hati Tuan ! > > Dibaliak pado itu, satantangan ka bajapuk jo ba malam di Bogor, iyo lalu > pulo kabanaran dari ambo, adopun nan jadi kabanaran dari ambo : > > satantangan panjapukno, umpamo dijapuk jo bendi lamo, kok kudono nan alah > tuo, tibo di roda lah baliang pulo, mangko indak sacapek nan Tuan kiro, > indak sarancak nan Tuan angan. > Lorong rumah nan ado, usah disabuk rumah gadang, nyatono nan ado pondok > ketek, ketek sudah basampik pulo, guno balinduang kapanehan, tampaik > bataduah kahujanan, sahinggo itu pagunono, mangko batenggang Tuan disinan, > itu nan jadi rundiang ambo. > > Sakiro itu dari ambo, bana kumbali kapado Tuan > > Wassalamu'alaikum Wr.Wb. > > > Bandaro Labiah ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
