++ Oii Kamanakan ! kamarilah kamanakan agak sabanta, molah baranjua agak sakutiko, ijan bajauh-jauah bana, elok ito badakek-dakek, rancak kito baampia-ampia, ado rundiangan nan kadisampaikan.
** Badabua ombak di lautan, kapa balaia di hari subuah, kapa manuju tanah Malako, marapek kapa ditangah ari. Badabok darah di badan, baganta sagalo batang tubuah, mandanga imbauan Mamak cako, mangko kamanakan capek kamari
++ Lorong kapado badan diri Mamak kini ko, ibaraik Kuciang, Kuciang lah tuo, gilo bakaluak disuduk dapua, mananti samba nan taserak, manunggu labiah jo siso urang, kok kadikaja mancik, dibadan indak tagarai, kok lai dapek bana, digigi indak manalok, sadangkan nasi dingin alah bahambuh, balain bana jo maso saisuak, maso dahulu jadi Kudo Pacu, urang macaliak ka awak sadono, maso sagalo ado di awak, indak sia indak awak, baitu pulo maso Kudo Palajang Bukik nan alah lewaik, maso lai kuaik mancari, indak ado bukik nan inda tadaki, indak ado lurah nan indak taturuni. Tapi samantang pun baitu, kok indak dapek jo harato, jo tanago Mamak bari, indak dapek harato jo tanago, mangko pituah Mamak sampaikan. buliah nan lapeh utang Mamak, untuang lai tapakai, kok indak buang sajo dalam samak, dihanyuk ka aia dareh jadih juo
** Oii Mamak kanduang janno denai, takuk ganta kamanakan mananti, raso ka taban tampek tagak, raso karuntuah langik nan tujuah, elok Mamak bari jaleh, buliah nan sanang kiro-kiro, apo garan malah kiniko ?
++ Oii Kamanakan janno Mamak, Dek bisiak alah samo kadangaran, dek imbau alah samo kalampauan, alah basuluah mato ari, bagalanggang mato rang banyak, alah balangkahkan sapanjang adaik, tingga disyarak nan alun lai, hari sapakan nan dinanti, maso kamanakan surang jadi baduo, tando Kamankan alah balaki, disinan mulo kapa balaia, balaia dilauk kahidupan, mangko kini Mamak sampaikan, danga dek Kamanakan elok-elok, simakkan bana-bana.
Tantangan ilmu urang balaki, pabaiak pikia kalakuan, paelok laku jo - taratik, kok datang laki dari jauah, japuklah jo muko manih, hidangkan-minum jo makanno, paliekkan ati nan suci.
Kok barundiang samo-gadang, aibno nan usah dibukakkan, sabagaimano akal budi, tutuik dek upiak mati-mati, saangok jan mangok, saangin jan buliah lalu, parik paga di Kamanakan kanduang, ibaraik mamakan abih-abiah, kok manyuruak dalam-dalam, jan sarupo manyuruak di ilalang salai, nan disalo samak tampa juo. Kok ano datang talambek, kok ano indak kunjuang pulang, jan maupek tantang itu, kana kok ano sadang sansaro, rila jo saba panampakkan, urang saba kasihan Allah. Kok maraso-raso juo kok indak manyanang di ati, liek ano sadang suko, sadang duduak surang, ajak saketek bakucindan, sambia manyingguang jo kiasan.
Kok tantangan makanan jo minumannyo, salalu sadiokan dek Kamanakan, tasaji baiak ateh dulang.basungkuk jo tuduang saji
Kok ano sadang pai, datang urang mananyokano, jawek dek Kamanakan baru bajalan, baru malangkah sabantako, alun li jauah bana, mungkin baru dibaliak dapua, atau sakiro dilabuah gadang, bia baduto agak saketek, supayo asuang pitanah jan no lalu.
Kok Kamanakan pai bajalan, usah lupo mamintak ijin, baitu jano syarak kito. kok pai naiak bendi, jan sabendi jo urang lain, nan bukan bukan dunsanakno, tapi kok sarik bana bendi kaditumpang, tapaso kamanakan basamo jo urang lain, kain nan usah basingguangan, itu pantangan urang tuo-tuo, baa sabab dek baitu, abih gali dek galitiak, ilang biso dek biaso, nan mato paliangan setan, nan ati paliangan Allah. disinan malu mangkono ilang. cacek nan indak taubek-i
Tanah sabingkah alah bamiliak, rumpuk sahalai alah bapunyo, malu nan alun ka babagi, Nyampang kok malu lah babagi, tando cilako nan kadatang, ibaraik pintu indak bapasak, murah dek maliang mamasuak-i.
Ciek lai Mamak sampaikan. Kok duduak kamanakan di alek jamu atau ditangah nan rami, mato nan usah dipalia, mancaliak cukuk sakali sajo, caliak dek Kamanakan jo suduk mato, Kok galak usah dareh bana, cukuk tasengeng diujuang bibia, disinan Kamanakan mangko dipuji urang, elok laku rancak parangai, jadi tuladan urang sakampuang, jadi pidoman urang sanagari.
Sakitu dari Mamak, utang nan alah mamak baia, nak langsai kasadono. Limbak nan dari pado itu Mak Etek kan lai pulo, buliah baliau nan kamanukuak jo mambilai, atau mamapek nak no pareh.
** Oiii Mamak kanduang janno denai, alah disimak dari awa sampai akhia, alah cukuk samparono, kok diulang sinan juo katibono, kok diulang bana, ditikam jajak kok no sipi, dititi batang kok no galia, elok Kamanakan simpan dalam hati, siang nan dikajadikan tungkek, malam tibo jadi kalangulu, baitu niaik kanamanakan, alah kasanang hati Mamak.
Bandaro Labiah
(maso tahun katumba)
Yahoo! Messenger - Communicate instantly..."Ping" your friends today! Download Messenger Now
____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
