Maa Angku Marven sarato Rang Lapau nan Basamo,
Samantaro Carano sadang balega,
siriah nan sadang dikunyah-kunyah,
Inyiak Sunguik jawek salam dari Angku Marven,
Salam balega ka Nan Basamo nan Adang Adok di Lapau nangko.
Manuruik pandangan Inyiak Sunguik,
di dalam Adaik Minangkabau
dek Sarak jo Adaik samo dipakai,
kato "sambah" di dalam Caro Awak,
satidak-tidaknyo ado duo aratinyo:
Aso, "sambah" dalam arati manyarahkan diri kapado Tuhan,
manyambah kapado Allah saroman kito lakukan dalam Shalat
atau dalam "sumbayang" Caro Awaknyo.
Itulah sambah di dalam Sarak.
Duo, "sambah" dalam arati maantakan kato dalam karapatan,
manuruik caro-caro nan tatantu di dalam "alua pasambahan",
caro babicaro di dalam adat manuruik garih jo balabeh,
manuruik alua jo patuik, manuruik bunyi nan kadangaran
dalam karapatan adat "Sambah Manyambah",
antaro duo "Juaro Pasambahan" baganti-ganti, lega-balega,
biasonyo mawakiali "Si Alek" jo "Si Pangka",
mampalegakan kato ka Nan Basamo,
didanga di simak dek Sado nan Adang Adok.
Itulah "sambah" di dalam "Adaik Pasambahan".
Itu manuruik pandangan Inyiak Sunguik.
Inyiak mamintak ka Nan Basamo,
kok kurang tolonglah tukuak,
kok singkek tolonglah uleh,
kok salah tolong peloki,
dek Rang Juaro sado nan ado,
baiak di Lapau ataupun di Kampuang jo di Rantau.
Jo salam juo Inyiak antakan.
Alua kapado "asa jo usua"
tampaknyo ado duo pakaro nan ka dikaji:
Aso, asa usua Urang Minangkabau
Duo, asa usua Rajo-rajo di Minangkabau.
Alua kapado asa usua Urang Minang
susah rasonyo marantang panjang
basangkuik pauik jo asa usua manusia
banyaklah kaji tantang itu
kaji Urang Ahli nan alun putuih-putuihnyo
indak ka sadang diotakan di Lapau nangko.
Alua kapado asa Rajo-rajo di Minangkabau
dari Tambo ataupun Kaba
dalam barapo ragam nan kalua
batua lah samo kito danga
dari maso sunduik basunduik
dari Mamak ka Kamanakan
kadang-kadang tadanga pulo dek Nyiak Sunguik
saroman nan Angku katangahkan.
Limbak nan dari pado itu,
alua kapada Inyiak Aguang
nan bagala Sutan Iskandar,
atau tanamo jo Sultan Iskandar Zulkanaini,
di dalam Caro Inggirihnyo,
tanamo Alexander the Great,
Urang Gadang Basa Batuah,
Urang Bagak dalam Sejarah,
baikpun sati ataupun batuah,
marupokan tokoh maso dahulunyo,
ampia 24 ratuih tahun nan lah lalu.
Walaupun Inyo dari Makedonia,
ataupun ateh namo Banua Ruhum,
inyo lah mahampeh kaujuang jo kapuun,
mambawo tantara jo anak buahnyo,
sampai ka Babilonia ka Nagari Farsi,
lapeh pulo ka bateh nagari India,
mandapek lawan samo bagak,
tamusahualah parang ukatu itu,
sampailah jalannyo hinggo ka bateh.
Namun samantang pun baitu,
tuah jo satinyo alah tadanga,
manjadi sanjuangan maso itu
ataupun sijarah salanjuiknyo
tadanga dek rajo-rajo jauah di bateh.
Bak model kato Rang Kini,
bak gaya Caro Awaknyo,
banyak lah Rajo-rajo sabalah kaujuang,
bukan doh Rajo di Minangkabau sajo,
ingin maambiak Tuah ka Nan Manang,
maambiak conto ka nan sudah.
Indak doh dapek kito salahkan
karano baitulah Masodahulunyo,
Sutan Iskandar Rang Batuah,
Super Power kato Rang Kini,
manjadi model ka Rajo-rajo
tamasuak Rajo kito di Minangkabau ko,
banyak mangaku bakarik dakek,
banyak mangaku badunsanak,
untuak Mambangkikkan Tuah di Nagarinyo,
panambah gensi Isi Nagari,
panambah bangga Rakyat umunyo.
Baitulah pandangan Inyiak Sunguik,
pulang maalum ka Angku Marven
sarato Rang Lapau nan Basamo.
Sambah babaliak ka Juaro.
Salam,
Inyiak Sunguik
At 5:09 PM +0800 8/20/00, Marven wrote:
> Salam hormat(maaf bukan sambah, karano manuruik Ambo kato Sambah=Sembah
>hanyolah berhak dihaturkan kapado Allah SWT, Tuhan seru sekalian alam) Ambo
>haturkan ka palanta Lapau Rantau Net ko. Membahas tentang asal-usul urang
>Minang , a iyo sangek suko awak kasadonyo, tarutamo Ambo yang baasa dari
>generasi muda Minang. Sangaik saketek pangatahuan Ambo tentang asal usul
>urang Minang.
> Manuruik tambo adat alam MinangKabau yang ambo baco, urang Minang
>berasal
>dari sang sapurba yang ada keturunan dari Sultan Iskandar yang agung(kenapa
>lebih mirip orang Asia dari orang Eropa?)dan singkat cerita melahirkan Datuk
>Ketemanggungan dan datuk perpatih nan sabatang yang sangat sakti dengan dua
>jenis adat yang agak berbeda. Nan jadi pertanyaan, Apakah kaduo Datuak iyo
>batua-batua pernah ado ?,atau hanyolah dongeng dalam masyarakat Minangkabau
>yang diceritakan dari mulut kemulut secara turun temurun (Tambo)karano indak
>ado bukti tertulis yang menyatakan keberadaan mereka, maafkan kalau
>pangatahuan Ambo ko salah.Jadi dari ma sabanonyo asal usul Urang Minang ko
>dengan adatnyo matriachat? Tantu jo bukti-bukti yang mandukuang. Mungkin ado
>inyiak-inyiak atau para tetua adat nan bisa babagi ilmu di palanta ko?
>Tarimo kasih banyak Ambo haturkan sabalun nyo..
>
>Salam hormat,
>Marven
>
>-----Original Message-----
>From: [EMAIL PROTECTED]
>[mailto:[EMAIL PROTECTED]]On Behalf Of Sjamsir Sjarif
>Sent: Sunday, August 20, 2000 1:45 PM
>To: [EMAIL PROTECTED]
>Subject: Re: [Rantau-Net] Induak Pasambahan
>
>
>A
>
>Maa Angku Pakiah Sutan,
>
>Ka Tuhan kito adokkan Sambah, dari Nabi kito tarimo Titah,
>salam bajawek dari Pakiah, kumbali ka Angku Pakieh juo,
>salam nan baliak dari Nyiak Sunguik,
>sarato Rang Dapua nan baduo batigo.
>Jo maoh juo Inyiak sampaikan,
>kaharibaan Angku Damrus Lukman Pakieh Sutan.
>
>Sapanjang panitahan Pakieh nan ka Tangah,
>jauah nan datang dari Bakasi,
>dihadokkan ka Rang Dapua di Lapau nangko,
>sarato ka Rang Lapau nan Basamo.
>Badantun bunyinyo ka Tanah Bundo,
>Luhak nan Tigo Lareh nan Duo,
>lapeh ka Rantau ka Lautan,
>manggalaga bunyinyo Kuliliang Bumi.
>
>Dek di Lapau kito lai baduo jo batigo,
>bakarilahan Pakieh sabanta,
>maengong kito suok jo kida,
>mampalegakan sambah dari Pakieh,
>bak kaji lamo Pakieh juo,
>lamak siriah dikunyah-kunyah,
>lamak kato dipalegakan.
>
>Samantaro manunggu carano balega,
>ataupun kato dipatenggangkan,
>kok buliah Inyiak manyambah,
>maantakan kato nan bak kian,
>paurak-urak tanyo pamulo kato,
>paurak selo pambukak langkah,
>kok kurang tarang mintak pajaleh,
>pambukak tanyo Rang Lapau nan Basamo.
>
>Limbak nan dari Baliau nan Baduo,
>Datuak Parpatiah nan Sabatang
>duo jo Datuak Katumangguangan,
>Urang Baduo balain asa,
>surang barasa dari Indojati,
>surang barasa dari Rajo.
>Kan baitu bana sambah dari Pakieh?
>
>Dek banyak Kaba nan kami danga,
>baitu juo Tambo nan tabukak,
>Inyiak mandanga dari Jauah,
>baitu juo nan sampai ka Rang Banyak,
>bahaso Baliau nan Baduo ko,
>Datuak Parpatiah nan Sabatang
>duo jo Datuak Katumangguangan,
>bukan doh jauah balain asa,
>tapi Baduo Badunsanak.
>
>Dek Kaba nan balain nantun,
>ataupun carito nan babeda,
>mamintak kami ka Pakieh
>manarangkan suluah ka Rang Lapau,
>cucua papakan di maa bedanyo.
>Itulah pinto nan paratamu.
>
>Limbak nan dari pado itu.
>"Ujuang Labuah Tanjuang Sungayang,
>di dalam luak jo lareh,
>babasa ampek balai, badaulat nan dipatuan,
>ka baruang lunang gunuang pasisie,
>hinggo pintu rajo ilie, ilie badatuak mudiak batuan.
>Tuan kadi di Padang Gantiang, Indomo di Saruaso,
>Mangkudun di Sumaniak, Tuan Gadang di Batipuah,
>Rajo asa di Pagaruyuang.
>Itunyo urang nan mamrentah
>dalam luah nan tigo, sarato lareh nan duo."
>Kan iyo baitu Kaba dari Pakieh Sutan
>bunyi nan lah samo kadangaran.
>
>Dek lah baitu nan kami danga,
>kok buliah batanyo Nyiak Sunguik tantang itu,
>tantang Rajo nan mamarentah
>Luhak nan Tigo Lareh nan Tigo.
>
>Kaba nan sampai ka Rang Banyak,
>Tambo dibukak Rang Pasak Kunci,
>ado Tigo Rajo di Alam Nangko,
>dalam Luhak nanTigo Lareh nan Duo:
>Rajo Alam di Pagaruyuang,
>Rajo Adaik di Buo,
>Rajo Ibadaik di Sumpu Kuduih.
>
>Itulah pinto nan kaduo,
>dimaa takucainyo Rajo nan Duo?
>
>Sakitu sambah dari Nyiak Sunguik,
>samo mananti kami basamo.
>
>Salam,
>Nyiak Sunguik
>Di Baliak Bumi di Subarang Lauik Basa
>Di Tapi Riak nan Badabua
>Di Santa Kuruih, Kalipornia
>
Mailing List RantauNet http://lapau.rantaunet.web.id
Database keanggotaan RantauNet:
http://www.egroups.com/database/rantaunet?method=addRecord&tbl=1
=================================================
Mendaftar atau berhenti menerima dari RantauNet Mailing List, kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
[email_anda] = isikan alamat email anda tanpa tanda kurung
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
-------------------------------------------------------------------------------------------------
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
