Tarimo kasih banyak Sanak Irma Intan Baiduri sarato Angku Elthaf St. Sri
Bagindo. Tacangang juo Mak Ngah mancaliak lah dapek juo maijo-ijo kato Caro
Awak saroman itu. Mungkin iko adolah salah satu labo nan dapek diambiak
dari Lapau sajak Lapau kito ko dibukak tujuah tahun nan lalu. Walaupun kito
dapek mangecek macam-macam bahaso, mungkin banyak Adidunsanak nan dapek
manggunokan kasampatan baiak di Lapau ko untuak mampapasiah mamakai Caro
Awak dalam bakomunikasi.
Kapado Adidunsanak kok ado nan antok-antok sajo atau ragu mampaagunokan
Caro Awak atau masih patah-patah lidah mangecek Caro Awak, indak baa doh
kok dicubo teloh-telo bagai saketek. Samo-samo baraja kito di Lapau ko.
Beko sudah kito latiahan manulihkan kato-kato kito akan batambah lanca juo
jadinyo. Labo nan ciek lai iyolah kito dapek mangatangahkan pikiran kito
manuruik Caro Kampuang kito masiang-masiang manuruik lidah kampuang biay,
amai, amak, uwaik, mandeh kito masiang-masiang tanpa malu-malu kito akan
digalak-galakkan urang sabagai Urang Kampuang.
Caro Awak di Minangkabau panuah jo macam-macam dialek nan lain padang lain
bilalangnyo. Disikolah tampeknyo, di Lapau ko salah satunyo, kito dapek
batanang hati mangatangahkan dialek kito masiang-masiang atau maimitasi
dialek kampuang sanak-sanak kito dari tampek lain sahinggo ado patukaran
dialek nan manyajuakkan dalam pakambangan Caro kito mangecek di Lapau ko
dan mamupuak Bahaso Kito untuak komunikasi salanjuiknyo. Mudah-mudahan
dengan pakambangan bahaso nan dapek kito jago tu dapek juo kito mamaliharo
dan manambah sumbangan kasiah sayang kito ka Kampuang Halaman kito basamo
nan samo-samo kito cintoi...
Walaupun baitu, kito tatap mamupuak bahaso-bahaso nan lah dapek kito
gunokan dalam kahidupan kito dengan sabaiak-baiaknyo. Itulah rancaknyo di
Lapauko walaupun kito manyarankan mamakai Caro Awak, kito dapek pulo
manggunokan bahaso-bahaso lain nan samo-samo dapek dimangarati antaro kito
di Lapau ko. Dengan baitu kito dapek pulo mamiliah bahaso pilihan nan elok
dan lanca untuak mamupuak caro bakomunikasi.
Salam,
Mak Ngah
At 8:35 AM +0200 8/21/00, Sjachril IRMA wrote:
> Mak Ngah......
>
> Onde... sabana rancak rangkaian kato dari mamak.
> Sahinggo ambo cc-kan pulo untuak anak bujang ambo, buliah nak tau
> pulonyo jo "seni berkata" dari kampuang biyainyo, nan jarang bana
> tasuo dinyo. maklumlah mak, anak kini nan lahianyo di rantau apolai
> apaknyo bukan dari ranah minang.
>
> tarimo kasi yo mak, salam untuak keluarga.
>
> wassalam,
> intan baiduri
>
At 1:11 PM +0700 8/20/00, Elthaf wrote:
> Saluik jo angkek tangan ka Mak Sunguik, iko tantangan bana di kito
>nan mudo-mudo nan tingga dakek dari kampuang, mak Sunguik (Mak Ngah), sajo
>nan lah marantau sakian lamo (labiah 35 taun) di nagari jauah masih bisa
>manulih sarupo iko...
> Baa agak ati, indak kamalu awak...
> Wassalam
> Elthaf
>
>> ----------
>> From: Sjamsir Sjarif[SMTP:[EMAIL PROTECTED]]
>> Reply To: [EMAIL PROTECTED]
>> Sent: Sunday, 20 8, 2000 12:44 PM
>> To: [EMAIL PROTECTED]
>> Subject: Re: [Rantau-Net] Induak Pasambahan
>>
>> At 8:55 PM +0700 8/19/00, Damrus Lukman wrote:
>> >
>> >INDUAK PASAMBAHAN
>> >
>> >Manolah Angku rang dapua LapauNet, sambah ambo tibo ka bakeh Angku.
>> >Sambah sujui salam diangkek, salam dianjuang kiri jo kanan, lahia kapado
>> >Angku surang, batin kapado nan rapek di LapauNet nangko. Sambah kapado
>> >niniak-mamak, nan gadang basa batuah, nan bakato bana mahukum adia, ka
>> >pai tampek batanyo pulang tampek babarito. Dipabanyak ampun jo maaf,
>> maaf
>> >dimintak ka rang banyak, ampun kapado nan Kuaso, titah disarahkan kapado
>> >Nabi, sambah taunjuak ka bakeh Angku.
>> >
>> >Tatkalo sumua ka digali, tatkalo rantiang ka dipatah, iyo katiko nagari
>> >ka diunyi, di balai balairuang panjang, di Pariangan namo dulunyo. Di
>> >sinan lah Datuak Parpatiah Nan Sabatang duo jo Datuak Katumanggungan,
>> >manurunkan adat jo pusako, dietoang koto jo nagari, sarato luak jo
>> >rantaunyo, luak tigo lareh nan duo.
>> >
>> >Manonyo lareh nan duo : Partamo, lareh Bodi Caniago, adat Datuak
>> >Parpatiah nan Sabatang, asa nan dari Indojati. Kaduo, lareh Koto
>> Piliang,
>> >adat Datuak Katumanggungan, barasa dari Rajo.
>> >
>> >Manonyo Luak nan Tigo : Partamo, Luak Tanahdata, nan babatu bungo
>> >satangkai, nan basungai bakayu tarok, nan bakampuang di baliak labuah,
>> >nan banamo dusun tuo, ba limokaum di sanan, sambilan koto di dalam,
>> >duobaleh koto di lua, batabek basawah tangah, sawah gadang satampang
>> >baniah. Kaduo, Luak Agam, nan salilik gunuang Marapi saedaran gunuang
>> >Singgalang, alaeh saedaran gunuang Pasaman, hinggo lado sulah mudiak,
>> >sahinggo dusun Tungga Hilia. Katigo Luak Limo Puluah Koto, dari sisauak
>> >Sungai Rimbang, sampai ka sipisau-pisau anyuik, sialang balantak basi,
>> >sikokoh pinang tuo. Itulah barik nan bajawab, itunyo tutua nan didanga,
>> >kini tasabuik-sabuik juo.
>> >
>> >Ujuang labuah Tanjuang Sungayang, di dalam luak jo lareh, babasa ampek
>> >balai, badaulat nan dipatuan, ka baruang lunang gunuang pasisie, hinggo
>> >pintu rajo ilie, ilie badatuak mudiak batuan. Tuan kadi di Padang
>> >Gantiang, Indomo di Saruaso, Mangkudun di Sumaniak, Tuan Gadang di
>> >Batipuah, Rajo asa di Pagaruyuang. Itunyo urang nan mamrentah dalam luah
>> >nan tigo, sarato lareh nan duo.
>> >
>> >Manolah Angku rang dapua LapauNet nangko !
>> >
>> >Dek gunuang tatapan kabuik, di sungai jalo bamain, ka padang marantang
>> >tali, karimbo bakarek kayu, tabiang ditungkek dengan janji, rimbo dialah
>> >jo mufakat, tagak dek duduak di nan rapeklimbago basidang dalam adat,
>> >supayo rantak nak saragam, lenggang nak nyo sarayun, suto jo turak nak
>> >salasai, nak samo naiek ka antakan, diulua kato sapatah, kato dilipek
>> >dalam barih, bana disimpan di limbago, basaba Angku sakatiko.
>> >
>> >Kok lai ado sumua di ladang, Buliah kito manumpang mandi, Kok Umua lai
>> >samo panjang, Isuak lusa disambuang lai
>> >
>> >Sambah Sujuik Ambo,
>> >
>> >DAMRUS LUKMAN PAKIEH SUTAN
>> >BEKASI
>>
>> Maa Angku Pakiah Sutan,
>>
>> Ka Tuhan kito adokkan Sambah, dari Nabi kito tarimo Titah,
>> salam bajawek dari Pakiah, kumbali ka Angku Pakieh juo,
>> salam nan baliak dari Nyiak Sunguik,
>> sarato Rang Dapua nan baduo batigo.
>> Jo maoh juo Inyiak sampaikan,
>> kaharibaan Angku Damrus Lukman Pakieh Sutan.
>>
>> Sapanjang panitahan Pakieh nan ka Tangah,
>> jauah nan datang dari Bakasi,
>> dihadokkan ka Rang Dapua di Lapau nangko,
>> sarato ka Rang Lapau nan Basamo.
>> Badantun bunyinyo ka Tanah Bundo,
>> Luhak nan Tigo Lareh nan Duo,
>> lapeh ka Rantau ka Lautan,
>> manggalaga bunyinyo Kuliliang Bumi.
>>
>> Dek di Lapau kito lai baduo jo batigo,
>> bakarilahan Pakieh sabanta,
>> maengong kito suok jo kida,
>> mampalegakan sambah dari Pakieh,
>> bak kaji lamo Pakieh juo,
>> lamak siriah dikunyah-kunyah,
>> lamak kato dipalegakan.
>>
>> Samantaro manunggu carano balega,
>> ataupun kato dipatenggangkan,
>> kok buliah Inyiak manyambah,
>> maantakan kato nan bak kian,
>> paurak-urak tanyo pamulo kato,
>> paurak selo pambukak langkah,
>> kok kurang tarang mintak pajaleh,
>> pambukak tanyo Rang Lapau nan Basamo.
>>
>> Limbak nan dari Baliau nan Baduo,
>> Datuak Parpatiah nan Sabatang
>> duo jo Datuak Katumangguangan,
>> Urang Baduo balain asa,
>> surang barasa dari Indojati,
>> surang barasa dari Rajo.
>> Kan baitu bana sambah dari Pakieh?
>>
>> Dek banyak Kaba nan kami danga,
>> baitu juo Tambo nan tabukak,
>> Inyiak mandanga dari Jauah,
>> baitu juo nan sampai ka Rang Banyak,
>> bahaso Baliau nan Baduo ko,
>> Datuak Parpatiah nan Sabatang
>> duo jo Datuak Katumangguangan,
>> bukan doh jauah balain asa,
>> tapi Baduo Badunsanak.
>>
>> Dek Kaba nan balain nantun,
>> ataupun carito nan babeda,
>> mamintak kami ka Pakieh
>> manarangkan suluah ka Rang Lapau,
>> cucua papakan di maa bedanyo.
>> Itulah pinto nan paratamu.
>>
>> Limbak nan dari pado itu.
>> "Ujuang Labuah Tanjuang Sungayang,
>> di dalam luak jo lareh,
>> babasa ampek balai, badaulat nan dipatuan,
>> ka baruang lunang gunuang pasisie,
>> hinggo pintu rajo ilie, ilie badatuak mudiak batuan.
>> Tuan kadi di Padang Gantiang, Indomo di Saruaso,
>> Mangkudun di Sumaniak, Tuan Gadang di Batipuah,
>> Rajo asa di Pagaruyuang.
>> Itunyo urang nan mamrentah
>> dalam luah nan tigo, sarato lareh nan duo."
>> Kan iyo baitu Kaba dari Pakieh Sutan
>> bunyi nan lah samo kadangaran.
>>
>> Dek lah baitu nan kami danga,
>> kok buliah batanyo Nyiak Sunguik tantang itu,
>> tantang Rajo nan mamarentah
>> Luhak nan Tigo Lareh nan Tigo.
>>
>> Kaba nan sampai ka Rang Banyak,
>> Tambo dibukak Rang Pasak Kunci,
>> ado Tigo Rajo di Alam Nangko,
>> dalam Luhak nanTigo Lareh nan Duo:
>> Rajo Alam di Pagaruyuang,
>> Rajo Adaik di Buo,
>> Rajo Ibadaik di Sumpu Kuduih.
>>
>> Itulah pinto nan kaduo,
>> dimaa takucainyo Rajo nan Duo?
>>
>> Sakitu sambah dari Nyiak Sunguik,
>> samo mananti kami basamo.
>>
>> Salam,
>> Nyiak Sunguik
>> Di Baliak Bumi di Subarang Lauik Basa
>> Di Tapi Riak nan Badabua
>> Di Santa Kuruih, Kalipornia
>>
X____________________________ Sjamsir Sjarif
Indonesian Translator and Cultural Consultant
Tel. (831)-426-1333 Fax (831)-426-8907
Email: [EMAIL PROTECTED]
Web Page: http://www.usindo.net/hambo
************************************************************
Mailing List RantauNet http://lapau.rantaunet.web.id
Database keanggotaan RantauNet:
http://www.egroups.com/database/rantaunet?method=addRecord&tbl=1
=================================================
Mendaftar atau berhenti menerima dari RantauNet Mailing List, kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
[email_anda] = isikan alamat email anda tanpa tanda kurung
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
-------------------------------------------------------------------------------------------------
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
