Assalamu'alaikum wr.wb.,
Manolah nyiak Sunguik di subarang, sarato dunsanak nan basamo,
Sairiang balam jo barabah
Barabah lalu balam mandi
Nan mandi balam tigo gayo
Sairiang salam dengan sambah
Sambah lalu salam kumbali
Takirim salam dari ambo
Rupono sabanyak nan dikatangahan nyiak Sunguik cako, kapanjawab tanyo dunsanak Marven
tantangan arati kato sambah jaleh bana bahaso bukanlah nan dimukasuik sambah
manyambahko sarupo jo sambah ka Allah, nan sipaikno sambah hambo kapado Nan Maha
Pancipta, malainkan adolah katando horomaik mahoromaiki, dalam patatah jo patitiah,
sabagai adaik jo limbago. Dalam parmainan kato-katoko sabab memang iyo manggunokan
kato sambah, acok juo urang "mangisakan" baliak kapado Allah (satantangan sambah
manyambah, dipulangkan sajo pado Allah) jo indak mangurangi mukasuik nan bahaso sambah
disiko tatap juo aratino panunjuakan raso horomaik kalawan mangecek sajo.
Dek tapian lah bakisa pulo kini ka sijarah, dan ambo bukanlah
urang nan punyo pangatauan banyak tantang sijarahko, mako apo nan ambo danga-danga
tantang sijarah inyiak muyang urang Minagkabau nan sunduik basunduik sampai ka
Iskandar Zulkarnainko, walaupun langkok jo namo-namo anak baliau nan salah surangno
jadi inyiak urang Minang, ambo iyo sapandapek jo nyiak Sunguik nan bahaso buliah jadi
sijarah nan sarupo iko iyo dek nak sato dapek namo sajo dan sulik mambuktikanno.
Namun baitupun manariak juo mambaco nan tasurek dalam al Quran di surek 17 ayat 90
tasabuik "Akhirnya dia sampai di tempat matahari terbit. Dilihatnya matahari itu
menerangi satu kaum yang belum berpakaian". (dia ko adolah Iskandar Zulkarnain, kisah
tantang baliauko ado dalam babarapo ayat di surek nan samo). Nagari matoari tabik
"mathli'a syamsi" tu manuruik catatan dalam tafsir nan ambo baco adolah didaerah
Hindustan, di tampek nan matoari tabik dari subaliak gunuang Himalaya nan sabana
tinggi, jadi agak mangganjia dibandingan jo di tampek lain nan walau bagunuang indak
satinggi itu bana, sainggo jadilah ungkapan nagari matoari tabik tadi. Jadi wallahu
a'lam. Tantu kalau baitu agak sarik juo awak maambiak kasimpulan nan bahaso sampai
Iskandar Zulkarnain bakaturunan di nagari awak, sabab jarak dari India ka nagari awak
masih baribu-ribu kilometer lai.
Ikolah dulu sabagai panambah bahan. Molah kito palegaan baliak.
Balam timbago tigo gayo
Murai barapak ateh pintu
Salam takzim dari ambo
Maoh dimintak tantang itu
Wassalamu'alaikum wr.wb.,
Lembang Alam
------------------------------------------------------------
Free Web-email ---> http://mail.rantaunet.web.id
Minangkabau WebPortal ---> http://www.rantaunet.web.id
Mailing List RantauNet http://lapau.rantaunet.web.id
Database keanggotaan RantauNet:
http://www.egroups.com/database/rantaunet?method=addRecord&tbl=1
=================================================
Mendaftar atau berhenti menerima dari RantauNet Mailing List, kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
[email_anda] = isikan alamat email anda tanpa tanda kurung
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
-------------------------------------------------------------------------------------------------
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
