Sakapua sirieh (Pengantar)
Mamak-mamak, Angku-angku, dunsanak nan ado di baleroang nangko.
Walau ado nan indak suko, namun labiah banyak nan mamintak untuak
ditaruihkan, mako jo karandahan hati ambo mangucapkan tarimo kasih, baiek
kapado nan indak suko, talabiah-labiah kapado nan memberikan apresiasi dan
manikmatinyo.
Mako dari itu, insya Allah pasambahan nangko kito taruihkan.
Ambo minta kapado Mamak-mamak jo Angku-angku nan lain untuak ikuik maramikan
dialog dengan mengambil peran sebagai Niniek-mamak di pihak sialek nan
satampuah lalu sabondoang suruik. Di bawah iko, ambo sebagai juru bicara di
pihak si alek, ka mamintak pituah kapado niniek-mamak tantang buah panitahan
Sutan Bandaro nan handak manahan si alek untuk bamalam di rumah si pangka.
Wassalam.
----- Original Message -----
From: Bandaro <[EMAIL PROTECTED]>
To: <[EMAIL PROTECTED]>
Sent: Thursday, December 21, 2000 4:57 PM
Subject: Re: [RantauNet] Pasambahan Mintak Pulang
> Sapanjang buah parmintaan sialek nan satampuah lalu sabondong
> suruik, nak minta dilapeh pulang ka tampaik masiang-masiang.
> Dicalaik kapado hari, hari nan lah patang bajawek dengan malam,
> hari kalam bulan kok kabua. Ambun jo rinai kok manjadi hujan.
> Kok sio-sio kami malapeh.
> Jauah nan tidak bahampiran, kito nangko jarang batamu.
> disikolah bamalam samalam nangko.
> Itulah nan jadi pintak kami.
> Sambah kumbali kapado sutan
>
> ~AB~
Alah sampai panitahan Sutan ?
> Sakiro-kiro alah, Pakieh Sutan.
Sapanjang panitahan Sutan, didanga lah baiek bunyi, dicaliek lah rancak
rupo.
Lah bak raso di bibie tapi cawan, kandak lah raso ka buliah, pintak raso ka
balaku.
Tapi dek sayang Sutan ka bakeh kami, sialek nan satampuah lalu, sabondoang
suruik.
Dek patang lah baransua malam, hari kalam bulan kok kabua, rinai kok turun
manjadi ujan.
Kok sio-sio Sutan malapeh, jauah nan tidak bahampiran, kito sarik basuo
jarang batamu.
Di sikolah kito bamalam samalam nangko, bisuak pagi baru pulang.
Kan iyo baitu bana buah panitahan Sutan.
Iyo tamanuang kami mandangan panitahan Sutan, sasudah babujuak bapatangihi.
Namun samantangpun baitu, ibaraik urang pa manyumpik komah Sutan.
Dicari kutiko baiek, dipandang galah salapan, lalu bajalan inyo sakali, etan
ka padang ribu-ribu.
Satibo inyo di sinan, dipandang hilie jo mudiak, di lengong kiri jo kanan.
Tampaklah rimbo nan satumpak, jalehlah kayu nan sabatang, mamandang tadah ka
ateh.
Tampaklah anak buruang nuri, nan sadang malapeh-lapeh payah.
Diambiak sumpitan gadang, sarato damak nan baipuah, lalu disumpik nan
sakali.
Satibo damak di ateh, bagaluik jo bungo kambang, babenda jo buah ranum.
Balunta-lunta jo kabuik, babega-bega jo awan, nuri batambah jinak juo.
Samantaro nuri jatuah ka tangan, dilewakkan kato sakutiko, dicari ujuik nan
saukua.
Diambik rundiangan jo mufakaik, basifaik mananti Sutan sabanta.
> Baitu molah Pakieh Sutan, basifaik mananti malah ambo.
Manolah Mamak Datuak .............. (Ninik-mamak di pihak si Alek)
Sambah tahunjuak bakeh Datuak ...................
Tapi adaik barundiang jo Mamak, bari maaf ambo mak Datuak.
Sapanjang panitahan si pangkalan, kok bisiak lah samo kadangaran, imbau lah
samo kalampauan.
Indak ka diulang bak manyikek, indak ka dibaliak bak mamanggang.
Bapituahlah mak Datuak tantang itu, ambo lah samo di dalam tumah mak Datuak.
Sakitu sambah ka bakeh mak Datuak.
RantauNet http://www.rantaunet.com
=================================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
Atau kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
Ket: [email_anda] = isikan alamat email anda tanpa tanda kurung
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
