Partamo-tamo ambo minta maaf ka dunsanak di lapau nan maraso tasingguang jo curito
ambo, mukasuik ambo lai alun sajauah itu bana lai, tapi mungkin caro ambo nan agak
jangga taraso dek dunsanak-dunsanak ambo
Iyo tarimo kasih banyak ateh apopun komentar nan dunsanak barikan, taubek juo agak
saketek taragak ambo bacurito di Lapau. Sanang juo hati ambo mambaconyo karano takana
dek ambo baliak situasinyo samo jo wakatu di lapau minum kopi sambia maota kian
kamari.
Iyo lah lapau namonyo, tampek awak bacarito, sumber batuka informasi, batuka fikiran
dan bagalak-galak malapeh panek. Namonyo di lapau lah, ado nan mulai dari galak
tasenggeang, takakah, ado nan masam, ado nan haniang se sambia maangguak-angguak ketek
(antah mangarati antah indak), ado nan manambah, ado nan maulang dan mampajalehan
carito baliak tapi ado juo nan langsuang angkek kaki sambia mayemba rokok sabatang .
Baitulah lamaknyo situasi lapau di tampek awak, dan mungkin sajo itulah tampek nan
paliang demokrasi di nagari awak.
Mambaco tanggapan dunsanak Muhammad Rijal, sakali lai ambo minta maaf, mukasuik ambo
lai ndak sajauah dan saburuak tu bana doh, ambo indak manunjuak urang lain, apolai
dituduah manyalahkan urang, kakurangan nan ambo sabuiktu adalah kakurangan awak (apo
nan kurang di awak), tantu tamasuak juo ambo ka dalamnyo. Mukasuik ambo hanyolah
maajak urang rantau/dunsanak sakalian maranuangkan masalah ko, maajak awak mamikiakan
sanak-sanak awak, ndak salah rasonyo kalau awak maambiak contoh parbandingan nan
kabatulan sajo nampak di mato ambo,...taapi takanai juo ambo dek image buruak kurenah
urang awak di rantau, hinggo sanak katokan hanyo basorak-sorak dari rantau sajo, namun
ambo hanyo bisa berharap semoga sajo ambo indak tamasuak ka dalam golongan nan sanak
katokan itu doh. Dan disinanlah taraso pulo dek ambo, bahaso kurangnyo harmonisasi
hubungan urang rantau jo urang di kampuang. Eh.....ko bagarah sajo ko nyoh
sanak..........., untuang juo masih ado nan basorak, nampak dek ambo kalau!
dalam masalahko/urusanko justru malah ndak ado kalaua sorak rang rantau doh.
Batua nan dunsanak katokan, bahaso ukuran nasib urang tu, alun lahia lai, malah alah
ditulih dek Tuhan, dari rahim bundo nan mano nyo akan dilahiakan, dan dek itu pulolah
nan mambuek urang tu babeda-beda. Alun lai ditambah pulo jo sajarah maso lalunyo, alam
tampek tingganyo dan lingkungannyo nan akan mancetaknyo. Tapi kan awak indak buliah
manarimo nasib sajo doh, di dalam kaji alah samo awak ketahui juo bahaso nasib suatu
kaum indak kabarubah doh kalau kaum itu sandiri indak marubahnyo (Al Qura'an, Surat 13
(Arra'ad) ayat 11).
Ambo ado mambaco buku karangan Pak Miftah Faridl, Pokok-pokok Ajaran Islam tentang
Qadha dan Qadar, ko ambo kutipkan saketek:
"Setiap Muslim wajib iman bahwa Allah yang Maha Kuasa untuk berbuat apa saja terhadap
makhlukNya, dan setiap muslim juga wajib iman bahwa manusia diberi kebebasan untuk
memilih dan menentukan nasib dirinya, dengan segala usahanya dan memohon kepada
Allah", kemudian .
"Qadha Allah telah berlaku sejak setiap manusia lahir. Ia lahir di Alam ini dengan
tidak diberi hak pilih siapa ayah atau ibunya, bagaimana warna kulitnya dan
seterusnya. Dalam pengembangan dirinya ia diikat oleh ketentuan-ketentuan yang
diciptakan Allah bagi dirinya sesuai dengan ketentuan sunnatullah dan syari'atullah
tersebut (taqdir)." Salanjuiknyo,
"Apa yang terjadi bagi seseorang tidak lepas dari ikhtiar dirinya atau lingkungannya
yang sekaligus merupakan keputusan Allah bagi seseorang."
Dek batumpu kamasalah ikolah makonyo ambo kamukokan duo contoh atau perbandiangan nan
paliang kontras manuruik ambo (urang nan kekurangan/Afrika dan urang nan
bakalabiahan/Jerman). Nan ka bisa marubah nasib urang (kampuang) awak tu adolah awak
sandiri ndak? Atau ka awak pabiakan sajo rang kampuang awak tasarah nasibnyo?
Ambo sayangnyo bukan pakar, tapi ambo cuma mancubo-cubo manulis apo-apo nan mungkin
nan kabisa jadi contoh bandiang, nan kabatulan sajo nampak di mato dan tagaram di hati
ambo. Ambo cuma baharap semoga carito ambo bisa jadi bahan bandingan sajo.
Dunsanak Yasin Ridwan ambo sapandapek jo dunsanak, memang SDM urang awak agak lamah
dan sifat labiah tahu dari urang urang awak tu memang salah satu faktor nan mambuek
lamahnyo SDM urang awakko. Urang awak tu memang kadang-kadang susah, (ko sakali lai
ambo aleh kecek ambo ko, kadang-kadang dan tantu labaiah banyak nan indak sarupo iko),
kalau agak cadiak, mulai gadang ota, urang bantuak kadibalinyo sajo sadonyo, dan suko
pulo main ariak, dan kalau baragiah baiiringi pulo jo kato-kato matah, tapi katiko
disasak-an mintak tolong, ha� capek bakilah. Dan kalau nan susah nampak dek ambo lain
pulo, indak namuah batanyo, mungkin sajo dek sagan, takuik kanai ariak, tapi jan
disangko pulo, bukan ndak banyak pulo nan gengsi. Samo tahulah se lah awak, samakin
susah hiduik, makin banyak tasingguangnyo, jadi seakan-akan ndak rela manarimo nasib,
tapi untuak barusaho marubah nasib anggan pulo. Jadi sudahlah hiduik susah, sudahtu
basasali pulo (mungkin dari situ juo datang kato-kato "dek ind!
ak mako co iko" di garobak buah tu).
Memang urang nampaknyo paliang ndak suko dinasehati, dan jan kan manasehati atau
manunjuak-i urang, untuak mangecek elok sajo kadang-kadang susah, tapi baapun juo,
manuruik ambo mungkin tataplah awak mangecek nan bana apo adonyo, walau senjang
panarimoan urang. Itulah mangkonyo ambo maajak dunsanak basamo nan saide untuak
mamikiakan masalahko.
Ambo yakin pasti lah sangaik banyak ide-ide bantuak iko dulunyo, ndak ado salahnyo
kalau awak kali baliak, samoga ide-ide nan kalua bisa jadi bahan masukan, kok tabaco
dek urang nan akan bagerak dibidang iko.
Nan dari ambo saketek, mungkin caro nan paliang rancak tantu awak mulai dulu dari nan
dakek ka awak, atau nan katamakan dek awak. Nampaknyo awakpun harus tajun juo dulu
(karano nasihaik ndak mampan tadi), kalau usahoko berhasil tantu akan ado nan
mancontohnya.
Curito sipadeh langkueh kunyik dan sarai tu kan hanyolah contoh, kok dapek tantu nan
labiah dari itu handaknyo.
Wassalam
St. St. Batuah
------------------------------------------------------------
Bergabunglah dengan Free Email @mimbarminang.com
Klik berita terbaru ranah minang di http://www.mimbarminang.com
RantauNet http://www.rantaunet.com
=================================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
ATAU Kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
Ket: [email_anda] = isikan alamat email anda tanpa tanda kurung
=================================================
WebPage RantauNet dan Mailing List RantauNet adalah
servis dari EEBNET http://eebnet.com, Airland Groups, USA
=================================================
