Assalamu’alaikum Wr.Wb, Walaupun kadang ambo kurang satuju jo bahaso Urpas, tapi ado kalonyo ambo sapandapek jo inyo. Dan untuak masalah investasi asing ko nan keceknyo akan mamajukan urang awak, ambo sangat indak sapandapek. Itulah “rambuik buliah samo, tapi isi kapalo babeda.
Mengenai FHB sebagai jubir “privatisasi”, ambo katokan iyo. Sabab, ambo caliak satiok tulisan atau analisisnyo banyak nan bapihak ka faham neo-liberalisme. Sahinggo, banyak pakar-pakar ekonomi sarupo Sritua Arif atau uda Soni, babaliak balakang teorinyo. Dan cieklai, mungkin dunsanak di RN iko tahu bahwa FHB salalu mamakai standar dari neo-liberal, yaitu deregulasi, liberalisasi dan privatisasi dan sagalo teori jampi-jampinyo. Ikolah namonyo kredo liberal, dan mancaliak teorinyo ambo pajaleh, FHB tamasuk salah satu kaum mafia Barkley-UI (ekonom neo-liberal), basamo jo cewek ekonom nan acok tampia di TV, Sri adiningsih , Srimulyani. Tamasuak angku Emil Salim. Apo sajo poin-poin neo-liberal tu? 1. Aturan pasar, mambebaskan peusahaan-perusahaan swasta dari ikatan pemerintah. Tabuka untuak perdagangan internasional jo investasi. Mangurangi upah buruh, kalau bisa manghapus hak-haknyo. Indak ado kontrol harago lai doh. Cubo caliak, bara buruh di nagari ko nan alah di PHK sakandak paruiknyo dek urang asing tu. 2. Mamotong biaya publik sarato palayanan sosial. Tarutamo untuak biaya pendidikan jo kesehatan dan sabagainyo. Itulah, mako banyak anak-anak kaciak di kampuang awak nan kalaparan, kurang gizi. Subsidi nan saharusnyo dibayia pamarintah dari pajak nan alah inyo tarimo, kini alah dialihkan ka privatisasi atau restrukturisasi perbankan. Iko dek ulah IMF jo Bank Dunia sabagai poros atau proponen dari globalisasi ekonomi ko. Nan parahnyo, inyo indak manantang bilo ado subsidi atau pajak bilo mauntuangkan usaho perusahaan transnasional (TNCs). 3. Deregulasi; mangurangi paraturan-paraturan pemerintah nan mauntuangkan pengusaha (asiang atau lokal). Misalnyo, maapuih bea tarif atau hambatan-hambatan dalam perdagangan. Contoh, Bara banyak masuak bareh dari nagari lain nan dijua harago murah dari bareh nan diproduksi urang awak. Dikecekkan pulo nagari awak paralu bareh dan sabagainyo. Itu cuma kode dek pamarintah nan alah disuok pengusaha untuak sato manggaleh dan maantam harago bareh patani awak. 4. Privatisasi, majua BUMN-BUMN bidang barang dan jasa ka investor swasta. Cadiaknyo, sangajo masalah iko dikaik-kaikkan jo iklim usaho pangusaha asing nan ragu mananam modal di nagari ko. Sahinggo kurs rupiah ka pitihnyo manjadi turun. Akibatnyo, tantu BUMN-BUMN nan dijua iko alah murah haragonyo. Iko cieklai ulah IMF jo kapandian jo kakurang pedulian pamarintah awak ka rakyat banyak. Tamasuak ulasan-ulasan ekonom sarupo Faisal Basri nan jaleh dijuluki mafia Barkley-UI atau kapanjangan tangan kaum neo-liberal. 5. Manghapus konsep barang-baarang publik atau komunitas. Aratinyo, indak ado lai milik rakyat, sadonyo manjadi tangguang jawab individual. Sia nan santiang atau kuat modal, inyo nan bakuaso. Tak ubahnyo, awak baliak ka zaman saisuak, yaitu zaman balakunyo hukum rimbo. Ekonom sarupo Sritua Arif sangat mangkritik caro karajo IMF di Indonesia ko. Dikecekkannyo, ikolah satandar neo-liberal nan balawanan jo kepentingan rakyat Indonesia. Alasannyo : 1. Allocative efficiency ; ditangah kapincangan ekonomi dan kapincangan nan manyolok dalam distribusi pendapatan jo kakayaan, maka mekanisme pasa akan mangakomodasi preferensi urrang kayo. Artinyo, sumber-sumber ekonomi akan dialokasikan untuak mamproduksi barang-barang mewah ateh korban produksi barang-barang kebutuhan pokok banyak rakyat miskin. 2. Privatisasi, manganduang unsur edeologi nan sangat babahayo, karano tajadi parubahan distribusi kekuasaan politik untuak mampakuat kelompok kayo, kalangan bisnis gadang, pamupuak rente ekonomi ateh korban rakyat bawah. Tajadi situasi self-reinforcing ataro jaringan kekuasaan ekonomi jo jaringan kekuasaan politik. Nan iko lah lamo dan acok tajadi di Indonesia ko. Masuaknyo unsur-unsur asing nan bakalaborasi jo ‘tuan tanah’ atau komprador di Indonesia akan manjarumuskan nagari awak baliak tajajah. 3. kebijakan moneter nan batujuan untuak mencegah peningkatan inflasi dibuek saolah tajadi “excess demand” nan dalam ekonomi Indonesia manjadi batolak balakang jo kebijakan fiskal nan mandorong inflasi malalui kanaikan biaya. 4. Dalam hal liberalisasi impor, IMF icak-icak indak tahu jo negara-negara nan di dunia iko ado nan kuat dan ado nan lamah. Nan kuat jadi ‘price maker’ dan nan lamah jadi ‘price taker’. Contohnyo, produksi pertanian nagara-nagara maju nan diproduksi dalam skala gadang masuak ka nagara bakambang sarupo Indonesia akan mambari mamfaat ekonomi tinggi di nagarinyo, sadangkan nagara nan maimpor sarupo impor bareh Indonesia nan patani awak mamproduksinyo dalam skala ketek akan akalah basaing, dan tantu indak ado doh mamfaat ekonominyo. Malah rugi, sabab disisi lain, subsidi pun alah dicabuik pamarintah dek dipaso IMF. 5. Arus masuak investasi asing, dalam hal iko, sasuai jo pajanjian TRIMs jo GATs di WTO nan baru sajo diputa di Doha, Kuwait, artinyo dek modal dari bangso asing dan indak tatutuik kamungkinan jo tanago karajonyo pun didatangkan dari kampuangnyo atau nagari lain. Atau mampakuli tanago-tanago urang awak jo upah murah dari tanago dikampuangnyo. Tambah pulo jo kainginan IMF untuak manghapus larangan investor asiang untuak mamasakan produknyo sandiri, akan mampasulik kalangan pengusaha urang awak nan bagerak di jaso distribusi. Dilain pihak kecek Sritua Arif, dana pinjaman nan diorganisir oleh IMF sabanyak US$ 43 milyar, dikecekkan untuak mambiayai kakuarangan (defisit) perkiraan bajalan dalam neraca pembayaran. Iko arati sasunguahnyo adolah utangko sabagian gadang akan digunokan untuak mambiayai kapantingan urang asing dalam impor, repatriasi kauntuangan investasi asing (contoh dana untuak restrukturisasi perbankan jo BUMN), bungo hutang lua nagari sarato jo jaso-jaso asing lainnyo. Dalam suatu laporan UNTACD (badan perdangan PBB) mangecekkan bahwa arus investasi asing (FDI = foreign direct ivestment) samo sakali indak mauntungkan nagari tujuan investasi. Dalam angko, buliah dikecekkan hasianyo noool. Untuang baliak ka nagari nan sumber investasi. Sayangnyo, hutang nan mambiayai kapantiangan asing ko baliak nan ka mambayia, rakyat ketek juo. Sungguh ketololan luar biasa bilo ado urang awak atau pamarintah nan mamuji-muji IMF atau antek-antek globalisasi ekonomi ko. Sarupo jo nan diusulkan dek Uda Soni ka IJP di RN kapatangko, baco buku si Stiglitz nan bakeh urang Bank Dunia nan juo proponen neo-liberal. Inyo mangkritik caro karajo IMF di majalah New Republik mangenai manangani masalah krisis ekonomi si Asia iko. Keceknyo, IMF indak pernah mancubo maaliah-aliah resep untuk pabaikan ekonomi nagari nan sakik tu. Aratinyo resepnyo itu-itu sajo. Bahkan sacaro sinis si Stiglitz manyindia IMF mamakai caro “copy” dan “paste” dalam komputer. Salain si Stiglitz, ado pulo ekonom tapandang dari Universitas Columbia, Jagdis Bhagwati nan juo mangkritik IMF. Banyak lai ekonom-ekonom dunia nan alah tahu jo kalicikan IMF, Bank Dunia, ADB sarato WTO sebagai juru depan kaum neo liberal untuak maliberalisasikan dunia. Campua tangan IMF dan konco-konconyo jo kebijakan otonomi nan mahambek liberalisasi adolah sarupo nan dimuek di beberapa media cetak nasional kapatang-patangko, yaitu mandasak pemerintah untuak mambatalkan Perda-Perda nan dianggap bamasaalah, karano maambek kapantiangan urang asing. Makonyo, baco buku filsafat adat urang minang nan sabananyo, supayo tahu baa urang minang nan sabana minang tu. Indak asal dari Padang alah dikecekkan pulo urang minang, salah tu. Urang minang adolah urang nan tahu jo caro panyalasaian masalah sacaro arif dan bamamfaat ka urang banyak. Caliak sajo contoh pahlawan-pahlawan asal Sumbar. Sakitu dulu dari ambo Wassalam fendi KOTO -- Sent through GMX FreeMail - http://www.gmx.net RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
