Assalamu'alaikum wr.wb., Ota mak Marah jo kongsino di lapau randah
Wassalamu'alaikum wr.wb., Lembang Alam Ota Agamo di Lapau Randah Lapau randah agak balain pado nan biaso sapagiko. Baru karami sasudah urang salasai sumbayang subuah. Mak Marah, Malin Ameh, Sutan Mantari, Malin Deman, Mangkuto Labiah samo sarangkek tibo. Di dalam lah ado Bagindo Baro sadang maota-ota ketek jo Sati Bandaro urang lapau. Baru sin urang nan balimo ko masuak ka dalam lapau Bagindo Baro lah manyongsong jo tanyo. �Datang dima goh barombongan bana sapagi ko? Datang manjanguak? Ado pulo urang nan mandaulu?� tanyo Bagindo Baro. �Indak. kami datang dari sumbayang. Dari musajik� jawek Malin Ameh. �Ooi biai den��.. lah salah sangko sin awak. Datang sumbayang buya-buyako komah Sati. Capek lah buek-an aia Sati!�untuak ustad-ustad awakko. Aa iyo lah maju urang awak sajak mandanga pangajian nyiak Abidin ko gomah. Kaateh lah duduak buya. Ka dakek podium ko banalah saketek. Agiahlah kami kuliah subuah bagai.� kecek Bagindo Baro jo cimeeh nan usali tu bana. �Baa mangko mangganjia bana di Bagindo kami pulang sumbayang?� tanyo Sutan Mantari tasanyum. �Manga pulo ka mangganjia . Indak mangganjia bagai di den doh. Kan alah bakamajuan namo no duh. Sudah di dangai kaji tu tantu di amaakan. Kan iyo baitu Marah?� �Batua� jawek mak Marah singkek. �Jadi main damini bagai kan ka indak awak agak no lai ko doh? Tantu badoso wak?� �Subuah kalam ari baru, mungkin pulo ka main damini. Nan ka indak-indak sin etongan Bandaro mah� kecek Sutan Mantari pulo. �Indak, biko patang ari bagai mukasuik den. Tantu ndak ka ado urang nan kamain damini bagai lai. Wa ang baa Deman, lah kabaranti bana lo ang main? Aa.. iyo badaso sangaik kaji si Abidin. Lah abih jadi urang bariman urang kampuang den� �Kan basyukur awak andakno kalau iyo lah abih bariman urang kampuang awak�.. Sati baa mangko lamo bana aia katibo ko ey� Mak Marah singajo nak maaliah rundingan. �Iyo Sati�pagagehan lah saketek untuak ustaik awakko hoiii... Bapahalo awak tu mah. Sambia mananti aia tibo Marah, cubo pulolah curitoan bana ka den saketek kaji nyiak Abidin tu. Sia tau amuah lo den sato jadi urang bariman, amuah pulo den sato mandakek-dakek ka musajik sarupo buya-buya ko. Baa tu Sati�he..he..he� ciloteh Bagindo Baro sambia tagalak ketek, masih jo cimeeh. �Kaji nyiak Abidintu indak sarik-sarik bana doh. Di den nan malakek bana di hati den kaji pakaro iduik ko ka mati. Aden, alah limo puluah umua den, raso-rasono mungkin lah labiah saparo jalan nan den lalui. Antah biko, antah bisuak tantu den ka mati. Iko sin lah man-jadian den takuik. Takuik jo pakaro nan kamaadang den sasudah mati tu.� �Iyoooo..iyo.iyoo� jadi di parajin sin sumbayang lai. Kok dapek sadang sumbayang tu awak mati. Mantun du mah yo Marah� �Indak pulo den bakandak bana kamati sadang sumbayang doh. Indak tau den antah sadang dalam kaadaan baa den katiko kamati. Tapi kok dapek, dek aden picayo sangaik jo janji Tuhan Allah, mati den tu iyo dalam kaadaan bariman andakno� �Iyoo� iyo� iyoo�.. Iyo tu. Iduik baraka - mati bariman namono dumah� �Bagindo Baro ko cimeeh panjang sin ko mah. Paneklo urang mandangaan cimeeh bakalaluan tu. Danga-an lah dulu kaji mak Marah ko� Sati Bandaro, urang lapautu sato pulo manambah. Antah cimeeh antah sabanano indak jaleh amek. �Taruih-an lah kok iyo Marah� kecek Bagindo Baro. �Kalau Bagindo mungkin indak yakin iduik ko kamati agak no do yo?� �Yakin. Baa lo indak ka yakin. Awak manampak juo urang abih mati ciek-ciek mah. Baa pulo indak ka yakin.� �Bahaso sasudah awak masuak kubua, katibo malaikat batanyo ka awak, kurang yakin Bagindo agak no yo?� �Itu antahlah. Alun ado urang baliak di sinan bacarito lai doh. Latak-an sin lah iyo. Jadi baa?� �Baa? Kok batanyo malaikat tu, aa nan ka dijawab?� �Antahlah. Kok tau awak kajawabno tantu dijawab. Kok indak tau awak, kecek-an indak tau. Mintak maoh bagai manah awak mangecekan bahaso awak indak tau. Maoh sin go angku Malaikat indak abas di ambo nan angku tanyoan. Kecek-an sin nah sarupotu� Tagalak urang salapau mandanga jawab Bagindo Baro. �Jadi pulolah. Sudah itu isuak ka tajadi ari kiamaik. Awak ka kalua dari kubua, dikumpua-an Tuhan Allah di Padang Mahsyar namono. Lai picayo Bandaro kiro-kiro ndak?� �Antah lo lah. Kecekan pulo lah iyo. Tantu karami sangaik di Padang Mahsyar tu. Kasadoalahan urang mati ka bakumpua baliak di sinan. Aden biko den cari sin Marah. Den turuik-turuikan sin Marah. Kamaa Marah pai kian lo den pai. Masuak Marah ka sarugo manyalingkik lo den masuak. Tapi kok ka narako iyo indak den doh� �Di sinantu, nan kecek nyiak Abidin, nan kecek Quran, awak ko ka ditanyoi di pangadilan Allah. Sagaloanno ditanyo. Apo sajo karajo awak salamo iduik di dunia ko ka dimintak partangguangan jawab. Dihetonglah pahalo jo doso. Satiok amal baiak dapek pahalo, satiok karajo buruak dapek doso. Kalau barek timbangan pahalo masuak ka sarugo, kalau barek timbangan doso masuak ka narako. Di sinan indak ado lai tolong manolong sasamo umaik. Jaan an kamairiangan den, mairiangan urang gaek Gindo sin indak kamungkin Gindo doh. Sabab satiok awak lah kalimpasiangan jo urusan awak surang-surang. Manjawab tanyo kadiri awak masiang-masiang. Etongan awak di lapau sarupo kiniko isuak kaditanyo Tuhan Allah baliak. Aa nan awak paotaan kiniko dicataik dek malaikat. Aa nan awak karajoan kiniko dicataik dek malaikat. Indak ciek juo nan tingga. Langkok kasadoanno dicataik wakatuno, apo kato-kato nan kalua, apo karajo nan di pabuek.� �Baralah kapanek malaikat mancataikno tu yo?� �Antah panek antah indakno indak tau wak. Tapi ado duo malaikat di suok jo di kida tiok-tiok awakko nan karajono mancataik sin taruih manaruih satiok amal karajo awak. Nan di suok mancataik nan elok-elok, nan di kida mancataik nan buruak-buruak� �Lai panah Marah basuo jo malaikat nan di suok-kidatu?� �Indak panah, sabab ano indak dapek dicaliak di awak. Tapi aden yakin jo picayo bahaso awakno ado. Sarupo picayo den jo hiduik ka mati, jo awak den kaditanyoi malaikat nan lain pulo isuak dalam kubua, kadimintak tangguang jawab isuak di akhiraik� �Bialah ndak panah nampak bana picayo Marah yo?� �Iyo picayo den� �Aden kalau ndak nampak tu agak ragu den. Raso-raso ka indak sin taraso di den� �Oo baitu. Kalau nampak baru Gindo picayo. Bagindo lai baangok, takana lo di den?� �Aden urang iduik baa pulo mangko indak ka baangok den pulo?� �Nan maa angok Gindo goh, ndak nampak di den� �Ko angok, nan turun naiak ko kan angok goh. Indak nampak di Marah?� �Dado Gindo nan turun naiak tu? Itu nan angok. Iyo pulo yo. Kalau urang mati indak manggarik dado no lai. Suaro Gindo ko lai nampak ndak? Atau mangkolah, a sajo nan ado dalam paruik Gindo. Lai Gindo bahati, bajantuang, baparuik? Lai panah nampak hati, jantuang, paruik tu?� �Awak ko kan ampia saroman jo taranak, bakapalo, baparuik, bakaki. Katiko mandabiah taranak kan nampak di awak isi paruikno du. Nampak di awak hati, limpo, jantuang, paru-paru, paruik kasadoanno. Di awak tantu sarupo lo jo itu� �Sarupo alun tantu samo. Nan jantuang Gindo bana kan alun panah Gindo manampakno lai? Antah ko k alah?� �Alun, tapi yakin den bahasono ado. Kalau indak baa lo den kaiduik.� �Aaaa sarupo itu bana kajino. Aden yakin bahaso ado malaikat, ado nan mancataik karajo den walaupun aden alun panah basuo, alun panah manampak no lai.� �Manga paralu bana ado malaikat nan mancataikko. Tantu Tuhan Allah nan maupahno agakno du yo?� �Paraluno, dek karano awak iduik di ateh duniako disuruah Tuhan Allah manyambah, baibadaik ka Tuhan Allahtu. Ditunjuaki awak jo agamo, malalui nabi-nabi, nan manarimo parintahtu dari Tuhan Allah malalui malaikat nan dipiliah Allah pulo. Apo sajo pangaja agamo nan datang dari Tuhan Allah nan diajaan ka nabi tu tatulih dalam kitab suci. Untuak awak kiniko nan umaik nabi Muhammad, kitab suci awak adolah al Quran. Di dalam al-Quran itu tasurek pakaro parintah jo larangan Allah, jo pahalo sarato doso, jo sarugo sarato narako, jo malaikat-malaikat nan di tugaskan Allah untuak macam-macam urusan. Baritotu alah sampai kaawak, Quran tu masih ado juo lai kini, kaado juo taruih sampai ari kiamaik, sudahtu baa awak manarimono. Kapatuah awak atau kamanulak. Samo buliah kaduono. Tapi sadonotu dicataik. Isuak catatan tu kadiparagoan ka awak sainggo awak indak bisa mungkia. Sadono tacataik sajaleh-jalehno. Ari itu, pukuah sakian, di tampek itu Bagindo Baro sadang mangarajoan karajo elok, nan ado pahalono, tacataik. Ari itu pulo, pukuah sakian, di tampek nan lain, Bagindo Baro sadang mangarajoan karajo buruak, tacataik pulo. Catatantu langkok salangkok-langkokno. Indak ciek juo nan bisa di mungkia-i. Barulah sasudah itu biko di etong amalan elok jo amalan buruak, nan maa nan barek. Kok barek nan elok, sarugo ganjaranno. Kok barek nan buruak narako padananno. Baa kiro-kiro?� �Aden indak jaek. Indak ado den mambuek doso doh. Aden amuah manolong urang. Kiro-kiro kama kapai den goh isuak?� �Bukan sakadar indak jaek jano awak sajo. Awakko dapek parintah Tuhan Allah untuak manyambah ka-No. Untuak baibadaik ka-No. Ado agamo nan musti dijalanan. Agamotu barisi parintah Tuhan Allah jo larangan No. Lai dikarajoan nan parintah? Lai dijauahi nan larangan? Baru awak buliah mauji awak jaek atau indak di adokan Tuhan Allah. Di muko Tuhan Allah kalau awak indak patuah katiko di suruah sumbayang awak taetong jaek, aratino badoso. Katiko dikarajoan juo nan dilarangNo baarati awak jaek atau badoso. Cubolah tanyoi ati Bagindo kini. Baa kiro-kiro?� �Jadi sapagiko dek aden alun sumbayang subuah badoso den goh?� �Aa itu bialah nak saluang sin manyampaian. Kiri-kiro kan lai kajaleh agakno.� �Pabilo lai buya Abidin tu katibo?� �E eh. Baa mangko itu nan batanyoan? Ka manga Bagindo?� �Nak iyo lo den mandangai kajino. Nak iyo lo den mananyoan pakaro sarugo jo narako tu kano. Iyo lai batua kaji Marah ko go indak.� �Patang Satu pakan datang kamari lo no duh. Cubolah den caliak biko kok iyo lai amuah Bagindo datang� ajuak Mangkuto Labiah. �Jadi biko patang ari indak ka badamini lai goh Gindo?� tanyo Malin Deman �Antah baa tu Marah. Iyo badosolo awak main daminitu?� �Mangkolah. Kalau main tu indak bataruah, indak ado doso ampok didalamno. Kalau main itu diantian katiko tibo wakatu sumbayang dek awak pai sumbayang, indak ado doso malalaian sumbayang didalamno. Kalau main tu indak dikarajoan sabab awak pai mandangai kaji ado pahalo mandangai kaji tu. Jadi nan maa nan ka dipiliah?� �Babalik-balik amek katarangan Marah mah. Panyiang lo kapalo den mamikia-anno. Bialah kok tibo buya Abidin tu pakan datang den tanyoan bana kano. Malakik itu kok lai ado kanti kamain den kawani juo baru.� �Jadi biko sumbayang luhua alah paralu awak samo pai go, indak?� �Caliak-an sin lah biko. Sati! Ko pitih. Aden kapai lai.� Bagindo Baro daulu pai dari lapau, tapi antah kama antahlah. __________________________________________________ Do You Yahoo!? Yahoo! Greetings - send holiday greetings for Easter, Passover http://greetings.yahoo.com/ RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
