Assalamu'alaikum wr.wb., Salam dari mak Marah di Lapau Randah.
Wassalamu'alaikum wr.wb., Demokrasi di Lapau randah �Buek-an lah den aia ciek Sati! Sabana santiang angek hari go mah� kecek mak Marah baitu masuak ka lapau Randah. �Dari maa Marah? Anto sasak bana angok nampak di den.� tanyo Sati Bandaro, urang lapau tu. �Dari pasa. Tibo di pandakian di ilia ko pacah ban oto si Ancin. Pado manantianno manuka ban ototu den ansua sin bajalan kaateh. Bajalan sakituno indak malawan badan lai kini, alah batambah tuo juo awak.� jawek mak Marah manjalehan. �Ooo datang di pasa�.. Nan biaso dek manjua indak � mambali indak kan jarang pai. Baa mangko nan saari ko baragan bana?� �Bakaparaluan den saariko. Pai mangirinan barang pasan si Rajo Endah di Batawi. Cako pai sarangkek jo Malin Ameh. Sasudah mangirinan barang tu, balenong-lenong kami di tangah pasa. Antah dek aden jarang ka pasa kudianko, sabana rami bana umaik nampak di den.� �Pai jo Malin Ameh, anto pulang surang sain?� �Awakno taruih ka Padang, pai manyilau anakno. Bapisah kami di Aua Kuniang.� �Sarami-rami urang di pasa, bialah urang ka pakuak mamakuak bana, bialah urang ka cancang mancancang bana, nan awak kan lai aman. Lai indak dipakuak urang awak doh.� garah Sati Bandaro. �Iyoo. Kok awak lo nan ka di pakuak urang tantu indak ka tajalang pasa tu lai doh.� �Pancacak nan alah banyak bana pulo di pasa ko kini. Pakan nan lapeh dapek di urang surang. Sadang mangaruak sakuih urang tuo nan alah sabayo awak ko lah. Urang tuo ko sarupo urang latiah sin nampak. Di sakuihno tabayang pitih uang karateh limo puluah. Tantu iyo manjejeh salero tukang cacak. Kirono nampakno sin nan sarupo urang latiah, sabanano batanago sangaik. Di pacik-anno tangan paja pancacak tu, sudah tu di lampangno sakali, jatuah tajalepak. Mancaliak jatuah tu lah sato lo urang lain manyipakan. Sudahtu tibo pulisi, dibaono di pulisi.� �Nampak di Sati?� �Iyo, nampak bana di den.� �Kalau di tukang cacak iyo itu resikono. Di Batawi tadanga diden, kalau dapek diurang amuah ditutuah urang sampai mati bagai.� �Itu manakuik amek pulo no duh. Karano mancacak sin sampai lo urang mati. Mancacaktu kan jadi mato pancarian dino.� �Mato pancarian sambia manandehan urang lain itu aniayo namono. Kadang-kadang tibo di induak-induak nan pai babalanjo ka pasa, ibo awak mancaliak, di siletno kampia, di karuakno dompet pitih. Lah takucayo induak-induak sarupo itu. Kadang-kadang pitih ka ongkoih pulang sin indak ado tingga lai doh. Jadi aden iyo sapandapek den kok tatangkok tukang cacak tu diagiah bana palajaran saketek, kok lai ka amuah jaran. Sabab urang sarupotu sabana manggaduah. Manggaduah jo marugian ka urang lain. Urang sarupo tukang cacak tu amo namono duh. Amo masyarakaik. Nan amo ko dimaa-dimaa kan iyo ado. Baiak di pasa, di kampuang, di maa juo. Nan karajono manggaduah katantaraman urang banyak. Urang nan bulu baji.� �Tapi main tangan surang-surang sarupo urang di tangah pasa tu kalau di den iyo indak katuju doh. Nan rancak pacik-an basamo-samo, bao ka kantua pulisi, bia nak dimasuak-an pulisi ka kandang si Tumbin.� �Iyo pulo yo. Batua pulo nan Sati kecek-an. Nan paralu lai nan ka mauruihan. Sabab kok indak kan iyo sabana ka bagalau nagari.� �Asa nan mauruihanko lai sabana mauruih pulo. Indak icak-icak mauruih tapi mambuluih..he..he..he.� �Iyo, sapaham den tu. Urang nan mauruih ko tantu urang nan bisa dipicayo. Sudah itu kalau alah diuruihanno, alah nampak di awak bahaso alah ado usahono nan untuak kabaiakan, awak tantu musti manarimo. Jaan banyak pulo curito nan indak paralu, nan kamanyakikan ati urang.� �Sabab kadang-kadang mangko Marah. Urang kini lah talampau banyak makan demokrasi. Sagalono nak jo demokrasi. Sampai lah babaua sin atah jo bareh. Lah jaleh ado urang sarupo jilatang di tangah kampuang, di suruah juo di paliaro, jaan di panga-pangaan, sabab baitu nan demokrasi. Lah ado urang nan manoto-notoan ladiang tajam di tangah labuah, pabiaan sainlah, sabab itu nan demokrasi. Kan iyo amuah tandeh awak kasudahanno dek demokrasi ko. Baa gak ati Marah?� �Sapaham sangaik den jo Sati. Lah santiang bana kaji Sati.� __________________________________________________ Do You Yahoo!? Yahoo! Health - your guide to health and wellness http://health.yahoo.com RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di: http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
