Assalamu'alaikum wr.wb., Urpas jadi sangaik tanamo samantaroko. Kasadoan urang mangecek pakaro Urpas. Dulu ambo tamasuak nan paliang dulu mahambek kalau si Urpas mangaluaan kaji "nyeleneh". Apo sajo, sajak urusan indak suko jo Indonesia nan dikecek-anno nagara na musti dibubarkan, kaindak satujuanno jo hukum rajam nan dikecekanno hukum padang pasia 1500 tahun nan lapeh, pakaro urang Minang sarupo jo urang Islam samo-samo ado nan indak batua manuruik pandanganno. Ambo salalu bausao mang'counter'. Antah iyo antah indak, antah mungkin dek awakno sibuak sasudak maajanan kajamban no tu, kalau ambo bata-an argumen no, awakno tanang. Alun panah takana di ambo awakno babaliak kaambo, nak mambela nan dikecekanno sabalun tu, sasudah ambo maagiah pulo pandangan ambo. Tantu sajo indak baarati awakno manarimo argumentasi ambo. Pakaro mambubarkan Indonesia, sakali-sakali tatap juo diulangno, tatap juo dikecek-anno awakno indak suko jo nagari Indonesia ko.
Urpasko kadang-kadang lai takana bana. Sakali wakatu diantaanno puisi pakaro awakno pai sumbayang jumaaik. Takajuik ambo katiko itu karano baru sajo babarapo ari sabalun itu ambo manasihaik-ino untuak batobaik, untuak mintak ampun ka Allah SWT. Antah iyo, antah indak, antah ado hubunganno jo nasihaik ambo itu antahlah. Rancak puisino tu. Urpas adolah saurang tipikal anak mudo urang awak. Mantiko, kadang-kadang nyeleneh, kadang-kadang 'jaek', kadang-kadang naiak darah (takana baliak, katiko itu awakno bangih-bangih dek si Pang diambek masuak, katiko itu ambo manasihaik-i untuak tobaik). Anak mudo sarupoko masih mancari-cari, antaro kasato ka suok atau kasato ka kida, antaro kajadi urang elok atau kajadi urang mujaa, antaro kajadi urang siak atau kajadi parewa. Kudianko dikecekanno pakaro nan nampak bana bahaso awakno indak bapangatahuan saketek juo tantang itu. Pakaro buliah-no laki-laki babinyi sampai ampek, nan dino indak katuju. Jo argumentasi 'pandia' no dikecekanno, baa mangko padusi indak buliah balaki ampek. Kalau nak adia harusno buliah pulo padusi balaki ampek. Dikecekanno iko hanyo untuak manutuik-nutuiki kasawenang-wenangan laki-laki jo maambiak agamo sabagai tameang palinduang, untuak mangumbar nafsu, kawin sampai ampek. Banyak pulo argumentasi nan indak jaleh dari nan lain nan manjadian Urpas batambah kacau, batambah nyeleneh. Sacaro singkek mangko Urpas. Pakaro buliah kawin sampai ampek itu katantuan Allah dalam Al Quran. Tasurek di dalam surek An Nissak ayat 3, sarupo iko aratino: Dan jika kamu takut tidak akan sanggup berlaku adil terhadap wanita-wanita yatim (apabila kamu mengawininya), maka kawinilah wanita-wanita lain yang kamu cintai; dua, tiga atau empat orang. Tetapi jika kamu takut tidak akan sanggup berlaku adil, maka kawinilah seorang saja, atau hamba-hamba sahaya yang kamu miliki. Yang demikian itu lebih dekat kepada tidak berbuat aniaya. Allah mambuliahkan. Baa mangko dibuliahkan Allah? Indak usah awak basulik-sulik bana mancari tahu, sabab kamanambah kaingkaran sajo. Kalau kecek Allah buliah, iyo buliah. Iko bukan parintah, tapi kamudahan. Untuak sia? Untuak nan suko, untuak nan sanggup, untuak nan mamparaluan. Tapi kok awak indak suko, kok awak indak maraso paralu, awak indak sanggup, jaan karajoan. Namun kok nampak diawak urang lain mangarajoan, indak buliah pulo awak bangih ka urang. Indak buliah pulo awak banci ka urang. Apo lai sampai mangecekan aturanko 'biadab', indak ba'moral'. Iko katantuan Allah. Kalau awak kecekan aturan Allah ko biadab, aratino bukan sajo tagolong awak ingkar, malawan ka Allah, bisa baarati pulo awak indak bapangatahuan tapi sok nak malawan. Jadi bacolah banya-banyak Al Quran tu. Hinok-hinok-an aratino, usaoan mamahamino. Indak usahlah awak maragukan apo sajo nan ado di dalam Al Quran tu sabab Allah manjamin nan bahaso Al Quran itu 'indak ado karagu-raguan di dalamno'. Kalau awak basiragu juo, dicari juo bantahan, aratino awak indak bariman jo agamo Islam. Itu saketek dari ambo. Pakaro si Urpas ko, nan mantiko langek ko, ambo masih amuah rasono manasihaik-nasihaiki, mudah-mudahan amuah juo barubah. Wassalamu'alaikum wr.wb., Lembang Alam __________________________________________________ Do You Yahoo!? Yahoo! - Official partner of 2002 FIFA World Cup http://fifaworldcup.yahoo.com RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di: http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
