[RantauNet] Perjalanan Adat (dari buku Rangkaian Mustika Adat Minangkabau)

[Adyan]

Assalamualaikum w.w.     Mamak jo dunsanak ambo, lah taragak pulo ambo nan manyalin-nyalin pepatah-patitih adat dari buku-buku nan ambo baco.     Ruponyo, salain pembagian adat nan ampek: (1) adat nan sabana adat, (2) adat nan diadatkan, (3) adat nan teradat, sarato (4) adat istiadat; ado pulo pambagian nan lain, basuo dek ambo dalam buku Mustika Adat, karangan Idrus Hakimy Dt. Rajo Penghulu, hal. 145 Bab V. sbb: (1) Adat nan bajanjang naik batanggo turun (2) Adat nan batiru batuldan (3) Adat nan babarih babalabeh (4) Adat nan bacupak dan bagantang (5) Adat nan bajokok badukalo (6) Adat nan banazar (7) Adat nan bapikir (8) Adat nan bakahandak akan sifatnyo     Tantangan uraiannyo, bialah ambo cubo salinkan dari buku di ateh, kiro-kiro sbb: (1) Adat nan bajanjang naik batanggo turun Bajanjang naiek batanggo turun naiek dari janjang nan dibawah turun dari janjang nan di ateh babilang dari aso mangaji dari alih Kamanakan barajo ka mamak mamak barajo ka pangulu pangulu barajo ka mufakat mufakat baarajo ka nan bana bana baadiri sandirinyo nan manurut aluah dengan patuik (2) Adat nan batiru batuldan Mancaliak tuah ka nan manang manuladan ka nan baiek alur samo diturut jalan samu ditampuah adat samo diisi limbago samo dituang nan batiru batuladan kalau maniru di nan elok kalau mancontoh di nan sudah Malabihi ancak-ancak mangurangi sio-sio (3) Adat nan babarih babalabeh Tumbuah di korong dengan kampuang kampuang bapaga jo pusako nagari bapaga dengan undang di situ buek nan balingka di sinan barih nan mananti barih tak buliah dilapaui Kalau barih manahan tiliak balabeh manahan cubo (4) Adat nan bacupak dan bagantang Tumbuah di silang jo salisiah atau dakwa dengan jawab hukum mahukum dalam kampuang mahukum adie bakato bana indak buliah bapihak-pihak Usah samo dipamain cabuah samo dibuang elok diambiah jo mufakat buruak dibuang jo etongan Salah cotok malantiangkan salah ambiak mangumbalikan salah makan maluahkan salah ka manusia minta maaf salah ka Tuhan minta tobat sasek suruik talangkah kumbali Pucuak pauah silaro pauah panjuluak buah ligundi nak jauah silang sangketo pahaluih baso jo basi. (5) Adat nan bajokok badukalo Syariat palu-mamalu dunia baleh-mambaleh imbau biaso basauti panggie biaso baturuti hawa nan pantang karandahan nafasu nan pantang kakurangan Kok jauah cinto mancintoi dakek jalang manjalang sakik basilau mati bajanguak alek bapanggia mati bajirambok nan elok bahimbauan nan buruak bahambauan (6) Adat nan banazar Ikara nan samo dimuliekan buek nan samo ditaguahi imanat nan samo dipacik janji nan paralu ditamui maniliak hereang dengan gendeang mamandang baso jo basi maliek labiah jo kurang manimbang mudharat jo manfaat (7) Adat nan bapikir Pikie palito hati nanang hulu bicaro haniang saribu aka dek saba bana mandatang Batolan mangko bajalan baiyo mangko bakato Ingek di runciang nan kamancucuak ingek didahan nan kamahimpok bakato siang caliak-caliak bakato malam agak-agak (8) Adat nan bakahandak akan sifatnyo Nyato adat di ateh tumbuah nyato pusako baengeran cupak si alago panuah gantang simajolelo limbago sipat mananti undang maisi kandak hukum  mananti sangketo mandatang ----o---     Sakian sakiro-kiro ambo salinkan, mohon maaf ateh talabiah takurangnyo, mudah-mudahan paguno.     Wassalam Adyan