Ass. ww, Bapak/ibu dunsanak di palanta kasadonyo, alhamdulillah awak alah kasawah baliak sajak ari Sinayan dan salanjuiknyo awak sampaikan ucapan tarimo kasih ateh doa dan pasan-pasan nan alah disampaikan ka awak untuak mangikuti Jamdu 03 di Sattahip Thailand. Alhamdulillah sajak barangkek tgl 22 Des. 02 dan tibo di Rumbai baliak tgl 11 Januari 03, salamo nantun iyo nan mancaliak hujan katiko kapa kalua dari palabuhan Dumai kiro-kiro 10-15 minik sudah tu kapulang di daerah Perak - Malaysia itupun hanyo bak Rinai pambasuah luko sajo kecek lagu awak. Tapi iko ndak rinai pambasuah luko doh tapi rinai pambasuah kaki malatua jo kulik kariang. Suhu di sekitar arena ado nan sampai mancapai diateh 40 derajat kecek kawan-kawan nan maukuanyo.
Salanjuiknyo mungkin awak ndak bacarito sekitar kegiatan Jamboree tapi labiah di fokuskan ka sakitar pa-Kareta Api-an jo Pariwisata di daerah Thailand. Dalam hal pariwisata iyo nampak bana jauah katinggalan awak dari Thailand ko dimaa dapek awak caliak pengelolaan nan sangaik rapi sarato promosi nan indak tangguang-tangguang. Kita dapek mancaliak di satiok daerah wisata nan di kunjungi mereka buek satu brosur nan baisi langkok jo peta sarato objek wisatanyo di daerah itu. Itu dibagikan ka satiok urang nan datang. Mereka buat suatu jalur perjalanan nan mambuek jan sampai tajadi jalan duo arah dimaa pado akhirnyo satiok nan datang akan otomatis malalui tiok objek nan ado disinan karano jalurnyo saarah. Untuah hal pariwisata mungkin awak labiah banyak mancaliak bus pariwisata dari bus umum baa dek baitu karano nampaknyo transportasi utamo mereka adolah kareta api. Tapi mohon di catat iko nan nampak dek awak ko ma, ijan beko ado pulo nan protes a nan awak ketik nangko. Salanjuiknyo awak bacarito saketek sakitar pa-Kareta Api-an di sinan. Iyo paralu angkek kupiah awak ka pamarentah Thailand dalam hal pakareta apian nangko. Disampiang kareta api jadi transportasi utamo juo di pakai untuak trip pariwisata. Cubo kito bayangkan kalo ciek gerbong eksekutif sajo isinyo 40 urang karano ciek kurisi ditampek i untuak surang urang, jumlah gerbong sakali barangkek 15 buah jadi total panumpang adolah 600 urang sakali jalan, itu baru eksekutif baa kolah nan klas ekonominyo nan baisi 2 sabangku saroman nan kami pakai untuak rombongan pramuka dari Bangkok ka Sattahip (arena Jamboree). Manuruik info nan kami dapek, jalur iko di buka khusus untuak kaparaluan jamboree, dapek kito bayangkan kalau mamakai bus antah bara lah bus nan diparaluan untuak mambaok peserta nan berkisar 26 ribu urang nan ado di arena itu tamasuak panitia. Lamo perjalan dari Bangko ka Sattahip adolah sekitar 3 jam perjalanan Bus hanyo di pakai untuak mambao peserta dari stasiun samantaro di lua ka arena sajo. Untuak hal kareta api nanko pamarentah Thailand juo sadang maningkekkan pambangunannyo kini ka nan labiah canggih, tapi sampai dimaa canggihnyo iyo ndak tau awak do tapi kini inyo mambuek karajo samo jo Investor Italia untuak pambangunannyo. Awak juo ado nampak sadang di bangun saroman bangunan bawah tanah dakek salah satu stasiun apokoh itu untuak sub-way atau hanyo bangunan biaso yo... antahlah. Tapi nan pantiang bagi awak sabananyo adolah jo mancaliak tuah kan nan santiang mancaliak lago ka manang, iyo paralu nampaknyo anggota DPRD awak dikirin ka sinan untuak baraja masalah kareta api iko. Dengan adonyo jadwal pasti nan alah di buek untuak kabarangkatan mako panduduaknyo jadi tabiaso jo hiduik taratur sarato bisa mambuek rencana terprogram dengan adonyo jadwal kareta nan ado. Ciek lai nan paralu awak angkek kupiah adolah adonyo Tour pakai kareta api. Dalam pajalanan dari Bangkok ka Sattahip kami peserta di bagi dek panitia satu buku ekslusive nan baisi sajarah pakareta apian di Thailand, peta daerah/stasiun nan ka dilalui sarato nan ndak kalah santiannyo adolah paket tour pakai kareta. Mereka buek suatu trip wisata kadaerah pariwisata di Thailand tapi tranportasi utamo antar daerah wisata adolah kareta api, tapi hal iko iyo alun ado awak cubo lai karano wakatu kami nan singkek disinan. Mungkin kok lai dunsanak nan kapai ka Thailand paralu dicubo paket tour nangko. Sakitu dulu nan dapek awak agiah oleh-oleh dari Thailand untuak kito basamo. Mudah-mudahan ado manfa'aiknyo dari ketikan nangko untuak pangambangan daerah awak nan kayo jo potensi wisata tapi bansaik di pengelolaan sarato promosinyo. Ciek lai paralu awak sampaikan adolah kama awak pai daerahnyo barasiah karano kesadaran masarakainyo untuak mambuang sampah di tampeknyo nan akhianyo turih nan datang mau ndak mau tantu ikuik pulo babuek itu. Mohon ma'af ateh sagalo kakurangan sarato kasalahan nan awak pabuek dalam manyampaikan ketikan nangko. wassalam Madahar Batuduang Ameh (36) RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Tanpa mengembalikan KETERANGAN PENDAFTAR ketika subscribe, anda tidak dapat posting ke Palanta RantauNet ini. Mendaftar atau berhenti menerima RantauNet Mailing List di: http://www.rantaunet.com/subscribe.php3 ===============================================
