[RantauNet.Com] pengobatan tradisional minangkabau

[Andria Agusta]

Assalamu'alaikum wr.wb.,   Nampaknyo cukuik rami carito tantang topik ubek tradisional nan biaso di pakai di kampuang awak. Tapi kelihatannyo Pak dokter kito sadang sibuk bana dan alun sempat manjawek pertanyaan nan di lewakan di siko. Walapun pertanyaan ditujukan ka pak dokter Rahyusalim, tapi dek karano ambo nan mamuloi topik nanko, bia ambo cubo manjawek sabisanyo.   pucuak parancih (ubi kayu) untuak ubek luko. Pucuak parancih ko adolah sumber nan kayo akan kandungan senyawa flavonoid, tarutamo "rutin" nan potensial sabagai antiinflamasi atau peradangan di sampiang juo sabagai antibakteri. Sahinggo luko nan ado indak maradang dan juo talinduang dari ulah bakteri. Di sampiang itu pucuak parancih ko manganduang senyawa kimia nan bisa mempercepat pembekuan darah (ambo lupo namo nyo). Kalo kain panutuiknyo indak harus kain lapuak, dulu digunokan kain lapuak dek karano arago kain sarik dan maha, jadi kalo digunokan kain baru gadang pulo biayanyo.   tabu itam untuak ubek paneh dalam. untuak manurunkan paneh dalam salah satunyo adolah dengan caro mampabanyak kaluanyo aia kencing atau istilahnyo diuretika. Ikolah fungsi utamo dari tabu itam tasabuik, baitu juo jo bungo labu. Mungkin juo khasiatnyo ko ditambah pulo jo jampi mantra abrakadabra, untuak jampi mantra ko "no science explanation for that".   panyakik ligato iko adolah sejenis alergi (Pak Dokter Rahyusalim nan labiah tau). Sampai kini alun ado ubek nan mujarab untuak penyakit alergi, baru hanyo sabateh meredakan serangan atau pencegah datangnya serangan. Dan untuak ramuan ko indak bisa ambo maagiah komentar karano ambo indak tau apo tu "daun sibi jari". Iko adolah salah satu kendala utamo untuak membahas ramuan tradisional karano kabayakan tumbuhan nan di pakai susah dikatahui namo ilmiahnyo tanpa diidentifikasi oleh urang di bidang taxonomi tumbuhan.   Kalo masalah bulau untuak ubek baguak. Memang ado suatu cara pengobatan alternatif nan manggunokan warna sebagai media pengobatan nan di sabuik Holistic Health Colour atau Colour Theraphy sarupo nan di posting kan dek cecille. Tapi ambo indak paham bana dengan cara pengobatan di bidang ko.   Gambia untuak ubek mencret. Gambia adolah sumber potensial untuak golongan senyawa kimia nan di sabuik tanin, tarutamo katekol. Golongan senyawa tanin ko memiliki sifat sabagai astringensia dan dapek mampalambek kontraksi otot polos yang menggerakkkan usus halus sehingga bisa mengurangi pengeluaran feces atau `e`e kecek urang awak. Juo senyawa ko mampunyoi efek sabagai antibakteri nan bisa malawan kuman penyebab mencret di saluran pencernaan.   Untuak Mak Lembang nan ukatu ketek suko marumbu2 ka parak. Saluruah permukaan jilatang tu dipanuahi dek kristal senyawa kimia kalsium oksalat nan ruponyo mirip jo jarum. Dek kristal ntun runciang2, jadi kalo tasenggol di kulik nan tipih, ujuang runciangnyo sabagian masuak ka kulik sahinggo mangakibatkan keracunan nan taraso angek jo gata2. Tapi kalo indak sempat masuak ka bawah kulik, sarupo di kulik talapak tangan nan labiah taba, indak ka gata2 bagai doh. Tantang susu amak2 sabagai ubeknyo, memang susu mampunyoi sifat sabagai antidote atau menetralkan racun, dan urang2 nan bakarajo di laboratorium nan mamakai bahan2 baracun sangat dianjurkan minum sagaleh susu sasudah bakarajo untuak manetralkan racun nan terserap dek badan karano racun tasabuik akan lakek ka protein nan ado di susu tasabuik sahinggo sifat racunnyo akan bakurang atau hilang samo sakali, tagantuang dari kuek atau lamahnyo kekuatan racun ntun.   sakitu se lu bisuak di sambuang baliak, mungkin juo Pak Dokter kito lah jago ka manukuak carito ko.   wassalam, and