Assalamu'alaikum wr.wb.,
Dek sibuk, agak jarang ambo mamnjingau ka palanta babarapo ari tarakhirko. Tapi lai juo ambo bukak sacaro acak macam-macam ota jo carito, garah nan bagalau, kato na sampai tadorong, bangih jo buransang. Ambo baco pulo pasan dari Miko sabagai Admin nan manganaan ka awak nan basamo, nan bahaso Palanta awakko adolah tampek nan musti sacaro basamo awak manjago taratik no.
Pakaro taratik ko pun alah baulang-ulang disampaikan. Sabanano isino indak bagai sarik doh kalau awak lai amuah manjalani jo niaik baiak. Biasono awak masuak ka Palantako dek ingin nak babagi carito, babagi pangalaman, babagi pandapek untuak kamashlahatan basamo, babagi rindu jo taragak ka kampuang halaman, ka tapian tampek mandi saisuak ataupun dek awak ka batanyo. Sadono itu disampaian jo tulisan. Mako tantu iyo paralu juo hati-hati awak dalam manulih. Jaan sampai manyingguang, jaan sampai mamfitnah, jaan sampai mampamalukan urang lain. Nan kaditulihan sarancakno nan ado paraluno untuak ditulih. Nan kadisampaiaan andakno ado paraluno pulo. Sudah itu ditulih jo bahaso nan santun, bahaso nan indak manyakikan ka urang lain.
Mungkin dek karano awak manulih ko sambia awak surang, di muko PC awak masiang-masiang, apo sajo nan takana di kapalo, antah bangih, antah kato-kato kasa, antah rabo, antah caruik, cenderung malompek baitu sajo ka dalam tulisan awak. Apo lai katiko mananggapi sasuatu nan manuruik awak salah tapi di solang urang, tambah bapetai-petai tulisan awak jadino. Dek karano itu, ambo manyarankan, sarupo nan ambo karajoan, baco baliak apo-apo nan alah ditulih tu sabalun mamencet 'send' . Sabab apobilo alah talanjur di lapeh kirono isino indak pantas, sudah itu timbua sasa tapi alah talambek.
Katiko awak mangirim tulisan, paralu bana dikana, bahaso nan kamabaco tulisan awakko umaik di sabalik bumi Allah. Ado nan tuo, ado nan mudo, ado nan dituokan, ado nan inyiak mamak, ado nan alim ulamo, ado cadiak pandai. Kalau caro urang di nagari awak paralu bana dijago ereng jo gendeng, dijago sopan jo santun. Bara kaindak pantasno, katiko awak batangka jo surang urang, saliang mangaluakan emosi, tapi urang banyak lah tapaso pulo mambaco tulisan awak nan kurang pantas cako. Jadi kana-kanai bana baliak, untuak man check and recheck, pantas atau indakno tulisan nan kadilapeh tadi tu.
Baitu pulo soal identitas. Karano awak masuak ka Palanta ko jo niaik baiak, mako sarancakno gunokan identitas asli. Manga pulo awak musti mandok jo namo palasu, atau jo namo samaran atau bahkan jo simbol? Mandok sarupo itu acok manimbuakan salah faham dari nan ciek ka nan lain, nan ujuang-ujuangno biko timbua pulo salah pangaratian, sudah itu baransua-ansua mangaluakan kato-kato nan indak pantas.
Tamasuak taratik nan paralu dijago, dibiasokan, mangarek carito urang nan di reply dek awak. Bak kecek Bandaro, kan alah dibaco juo. Kok iyo paralu juo di quote baliak, apo-apo nan alah ditulihan urang tu, ambiak sado nan kaparalu sajo. Ikopun bisa dikontrol kalau awak mambiasokan maambiak angok saketek sabalun mamencet tombol 'send' tadi tu. Ambo picayo, urang nan mangirim barito jo rangkaian nan bajelo-jelo tu bukan bamukasuik nak manyulikkan ka urang lain.
Itu sajolah daulu, sakadar sumbang saran.
Wassalamu'alaikum wr.wb.,
Lembang Alam
St. Lembang Alam
Do you Yahoo!?
The New Yahoo! Shopping - with improved product search
