Server mailing list RantauNet berjalan atas sumbangan para anggota, simpatisan dan semua pihak yang bersedia membantu. Ingin menyumbang silahkan klik: http://www.rantaunet.com/sumbangan.php ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Assalamualaikum ww Sanak Mulyadi St. Bangsawan jak nyo ambo Tapi sungguahpun Sutan surang nan tasabuik namo ta-imbau gala, di-anjuang tenggi di-ambak gadang, tembak nan ba-alamaik pandang nan batujuan, jauah nan tampak asok hampia nan tampak api, dek gunuang tumbuak-an kabuik, bukik lancaran paneh, lurah lancaran batang, kualo himpunan kapa, nan dakek jolong ta-sua dek ambo iyo-lah Sutan Bangsawan Tapi samantang-pun Sutan surang, sarapek papek-nyo tembak nan ba-alamaik, pandang nan batujuan, di-alamaik-an ka-bakeh Sutan ditujukan kapado Niniak Mamak ditapek-kan kapado kito nan basamo, baa ruponyo dek Sutan cako, tasabuik "Mamak Reformasi" mamak nan arih bijaksano, labiah pado itu lah Sutan do'a kan pulo sukses baniago barisuak-ko, kan iyo baitu lalu-nyo dek Sutan cako? Baa dek ambo tu kini, iyo kato Sutan nan sapatah tu bana nan kami nanti-kan, ruponyo Sutan lai ba-lauik dalam ba padang laweh, urang panggalak jago lalok, ciek dipintak duo diagiah, nan sangko ati ambo tadi kok pintak indak ka-babari, kok karandak indak ka-ba-laku, baa dek ambo, Alhamdulillah je nyeh jawek'e, kurang laweh tapak tangan nyiru kami tampuangkan, satitiak di-jadikan lauik, sa-kapa jadi-kan gunuang, Tuhan Allah kayo sajo nan ka mambalasi, tapi sungguahpun ba-itu utang sasamo muslim tolong manolong ta-iriang do'a sarato nasehat ma-nasehati dengan sabar "wa tawasyau bil haq, watasyau bissyabr, kan iyo baitu, namun kok do'a nan indak ba-iringi jo usaho, sio2 mako-nyo tumbuah Baa rupo-nyo dek ambo tu kini, kok manyilam sampaikan ka-kasiak, ba-laia sampaikan ka-pulau, bajalan sampaikan bana ka bateh, bak kato di nan tuo, do'a itu ibadah, usaho kito nan manjalankan, putusan ado ditangan Allah, tapi samantang-pun bak itu, kok lai bajalan di nan pasa, ba-kato di nan bana, manyabuik di nan luruih, ta-awai lai ba-raso, ta-pacik lai barupo, insya Allah Kini ba-itu-lah dek Sutan, kok buliah pintak jo pinto dek kami silang nan bapangka, karakok nan bajunjuangan kapado Sutan sarato sidang mujilih kito ko, ketek nan indak disabuik namo gadang nan indak di-imbaukan gala, dari niniak hinggo ka mamak dari dunsanak hinggo ka-kamanakan tamasuak urang sumando nan di-anjuang tenggi di-ambak gadang, iyo samo disinan kito andaknyo dari awa sampai akhia, dari mulai hinggo sudah, buliah nak salamaik nan dicito, karandak buliah pintak balaku, sekiyan Sutan "Bulan lah sangkok tigo puluah, urang Bangkulu lah mulai puaso" "Raso lah tibo dalam tubuah, urang sampai awak pun tibo" "Rang Palembang batanam duku, bungo batiak pamanih hiesan, hiesan nakdaro Ogan Komering Hulu" "Mambuhua pantang mambuku, mauleh tak-nyo mangasan, cadiak paguno pambimbiang dunsanak dek lah dakek bana ari ka pamilu" "Aia di-ajuak mako di-sauak, disauak sajo sado nan paguno, pancolok kain nak rang Kubu Inderapura " "Sajuak di-hati mato tabukak, sajuak pangana kiro2 pun tibo, nagari elok pamimpin adia rakyat-nyo pun sejahtera" "Angguak anggak nak rang Situjuah, Geleng2 Sapi lagu rang Buleleng, dilagukan sambia ba-dendang sayang, Dondang sayang lagu Sarawak "Kok anggak ba-tando angguak, amuah usah baok manggeleang, dek niniak mamak itu nan ta-pantang, itu kurenah urang nan munapiak" "Bukiktinggi koto rang Agam, Mandaki janjang ampek puluah, janjang buatan tukang Sari Lamak, ba-ukia baka nak rang Sungkai" "Manangih Tungku Imam tangah malam, tabayang adat lamo nan lah rapuah, rapuah dek lamo talatak, rapuah dek syara' indak bapakai" Wasalam abp mamak reformasi note* Dalam ABS-SBK syara' hendaklah diartikan sebagai syariat Islam Ternyata kita orang Minang ini tidak tepat azas, tidak konsisten dan tidak memiliki komitmen untuk menomor satukan syara' So, agar Tuanku Imam Bonjol Cs. nggak menangis dalam kubur, mari kita tegak-an syariat Islam dinegeri indah tercinta ini, jangan cuma ngomong doang ABS-SBK, ntar kalok orang minta bukti gimana dooooong daku menjawabnyaaaaa? -----Original Message----- From: [EMAIL PROTECTED] [mailto:[EMAIL PROTECTED] Sent: Saturday, November 01, 2003 12:02 PM To: [EMAIL PROTECTED] Subject: RE: [RantauNet.Com] Unsubscribe Ass,wr,wb. Ambo sato pulo ciat, kalaulah buliah ambo bakomentar, Mamak nan surang ko memang Mamak Reformasi namonyo. Mamak nan arif bijaksano, dalam bapantun inyo lalu kan juo galasnyo, semoga galasnyo ko di Pemilu 2004 baeko laku kareh. Wong cilik kini banyak nan lah kuciwa, semoga galas Mamak lai indak manjua janji sajo, tapi tunjuakkan bukti. Ambo cubo pulo ciat berpepatah (mungkin iko bukan pantun kali yo!) Alun bakilek lah bakalam Bulan lah langkok tigopuluah Alun takilek lah takalam Raso lah tibo dalam tubuah Tanam aue tanamlah duku ( duku Palembang terkenal manis ) Diparak naneh anak Tarusan ( naneh Pakanbaru lamak rasonyo) Sinan batiak nan babungo Mambuhue jan mambuku Mauleh jan mangasan Disinan cadiak nan baguno Dalamnyo aie dapek diajuak Dalamnyo hati siapo tahu Sungguah kawek nan dibantuak Ikan di aie nan dituju Angguak anggak geleang amuah Unjuak nan indak babarikan Iyokan nan diurang Lalukan nan diawak Sagitu sajo dari ambo, salamaik bapuaso hari nan ka-anam, duo puluah tigo hari lai kito Rayo, baju baru anak2 alun tabali lai, yo coiko lah nasib. Saba...lah ang Yuang. Wassalam, Mulyadi St.Bangsawan (46 +) Rang Sulik Ayie di Pusri Palembang ~~~~~~~~~~~~~~~~~~~~~~~~~~~~~~~~~~~~~~~~~~~~~~~ Ingin memasarkan produk anda di web RantauNet http://www.rantaunet.com Hubungi [EMAIL PROTECTED] atau [EMAIL PROTECTED] ~~~~~~~~~~~~~~~~~~~~~~~~~~~~~~~~~~~~~~~~~~~~~~~ Isikan data keanggotaan anda di http://www.rantaunet.com/daftar.php ---------------------------------------------------- Berhenti menerima RantauNet Mailing List, silahkan ke: http://www.rantaunet.com/unsubscribe.php ========================================