Assalamu�alaikum wr.wb.,
Ari rayo nan sakali ko iyo balain pado nan taralah. Sabana rami bakalabihan. Basalingkik pingkik Bukiktinggi. Sampai macet jalan di sabalik pasa gadang baiak pasa ateh jo pasa bawah. Baririk-ririk oto parkir di sapanjang jalan di Kampuang Cino, di bawah Jam Gadang, di jalan Kumidi, di muko Musajik Raya, di jalan malereang di muko Tri Arga sampai ka Simpang Kangkuang. Padek, panuah, bagadimpik-gadimpik. Alamaik aa kolah? Apokoh tando anak kamanakan nan dari rantau alah bih sukses pulang basamo jo kandaraan pribadi masiang-masiang? Atau turih lokal dari Pakan Baru nan sadang mamanfaaik-an liburan panjang? Antahlah. Mungkin juo iyo kaduo-duono.
Rami nagari, tantu manyanangkan ka urang panggaleh. Bialah ari rayo bana, dek pitih baserak-serak datang, tapaso dibukak juo kadai. Dibukak juo toko. Kan indak talarang bagai nan baitu doh. Indak bagai badoso manggaleh di hari rayo doh. Iko memang pulo kasampatan elok. Urang rantau abih pulang mambao pitih, urang balibur abih tibo mambao pitih, tinggalah rang panggaleh nan pandai mambaco tando-tando jo alamaik, nan alah manyadiokan barang kagaleh sajak jauah hari. Katiko urang ramikolah maso panen. Alhamdulillah.
Tapi pakaro macet, ko ha. Tantu paralu juo antisipasi labiah elok dari Pemko Bukiktinggi. Misalno sajo jo manutuik, atau mambebaskan salingkaran pasa gadang, baiak ateh atau bawah dari oto pribadi di hari-hari rami di maso liburan panjang hari rayoko. Sadioan tampek parkir nan aman dan di paliaro kaamananno di Bukik Ambacang bagi nan datang dari arah Utara, di Garegeh bagi nan datang dari arah Timur, di Jambu Aia bagi nan datang dari arah Selatan. Di dalam kota hanyo buliah bakaliaran taksi kota, jo angkot, sarato bendi. Iko untuak kanyamanan di tangah kota awak nan sabanano sabana ketek tu. Sabab kalau alah bagadimpik-gadimpik tu tantu jadi indak nyaman. Kalau indak nyamanko tantu jadi maleh urang datang. Disampiang kasampatanko bisa pulo manambah panghasilan dek angkutan lokal.
Baa kiro-kiro?
Wassalamu�alaikum wr.wb.,
St. Lembang Alam
Do you Yahoo!?
Free Pop-Up Blocker - Get it now
