Server mailing list RantauNet berjalan atas sumbangan para anggota, simpatisan dan semua pihak yang bersedia membantu. Ingin menyumbang silahkan klik: http://www.rantaunet.com/sumbangan.php ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Ass,wr,wb. Sutan Bandaro Labiah nan ambo imbau, iyo lapeh taragak ambo mambaco apo nan Tuan postingkan untuak katigo dunsanak kito tu, walau itu indak tatuju ka ambo, iyo sajuak hati ambo mambaco pepatah-petitih nan Tuan lewa-kan tu. Ambo dek baru mambukak komputer (labiah duo minggu ambo mudiak ka Binjai dan Sulik Ayie baru2 ko), jadi banyak nan indak jaleh bana informasi nan ambo baco, sewaktu di Binjai lai ambo singgah sabanta di warnet, tapi indak konsentrasi mambukak internet disinan. Setelah SMS nan Tuan tawarkan ka ambo untuak singgah di Hotel Patra Yasa Danau Toba, sasudah itu putus kontak ka Tuan. Ambo indak jadi lewat lintas tengah (lewat Prapat Danau Toba, karano ado jembatan putuih di daerah Mandailing Natal), ambo tapaso baliak pulang malewati Pakanbaru baliak. Di Padang ambo lai singgah di Kantua Tuan Ir.Indra Catri (Kapalo Inforkom Padang), ambo di agiah dek baliau sabuah Kamus Minang, Tarimo kasih Tuan Incat. Di Padang samalam, lalu ambo manuju ka Kantua Bupati Solok di Aro Suka untuak manyampaikan sumbangan urang SSS (Solok Saiyo Sakato) dan warga BMKM Sumsel sabanyak Rp. 9.075.000,- untuak bantuan pelaksanaan Porda ka-IX Sumbar nan diadokan di Kabupaten Solok dan terus ambo ka Sulik Ayie dan bamalam samalam disinan. Di Sulik Ayie, ambo alah didaulat dek kaum ambo untuak diangkek manjadi Datuk/Pangulu di kaum ambo nan Datuak/Pangulunyo sadang kosong kini (meninggal dunia tigo bulan nan lalu), ambo masih menjanjikan nantik sajo sasudah pulang haji atau rayo nan ka datang. Kalau jadi nantik, akan ambo undang Tuan dan warga RN lainnyo. Jadi Tuan Bandaro Labiah apo jadi singgah ka nagari kami Sulik Ayie tu ? Kapado Kkd. Drs.H.Rainal Rais Dt.Rajo Sati Nan Mulie, ambo maucapkan salamaik dengan terpilihnyo kembali beliau menjadi Ketua Umum KBRG (Keluarga Besar Rumah Gadang) suatu organisasi urang Minang se Indonesia di bidang Orari. Dan jugo ambo manyokong dan mensupport Kkd untuak menjadi Caleg DPR RI 2004 dari PAN, semoga berhasil dan dapek memperjuangkan di tingkek DPR Pusat untuak kemaslahatan Ranah Minang. Sakian sajo Tuan Bandaro Labiah, satonyo ambo di pembicaraan Tuan ka batigo dunsanak kito tu. Wassalam, M.St.Bangsawan (46 +) Suku Limo Singkek di bawah payuang Datuk Marah Bangso, Sulik Ayie - Solok > Bismillahirrahmanirrahim > > Assalamu'alaikum w.w. > > > Sakali marangkuah dayuang duo tigo pulau talampau > Sakali bakirim surek, batigo sakali taimbau > > nan partamo Dunsanak Madahar, kaduo dunsanak Z Chaniago, katigo Tuan > Ridwan M St. Rajo Sulaiman. > > Kapado Dunsanak Madahar jo Z Chaniago. > > iyo bak kato urang juo. > > Bakarih sikati mudo, patah lai basimpai bukan, ratak sabuah jadi tuah. > Jikok dibukak pusako lamo, dibangkik tareh nan tarandam, lah banyak ragi > nan barubah, > > mungkin sasuai jo dikatokan Dunsanak Z. Chaniago, "jalan lah diasak urang > lalu". kadipangakan lai ? > > Kok nan lah elok kamanakan nan kaibimbiang, rasono kurang baguno kito > sabagai mamak, baa mangko indak dari samulo ? > > Pakaro Tulisan nantun iyo indak hanyo urang Lubuak Basuang sajo doh nan > batangguang jawab, tapi kasaluruahanno urang Agam, karano nan punyo alek > iyo uarang Agam, jadi lai indak katasingguang bagai doh urang Lubuak > Basung tu. > > Hadok kapado suasano dihari nan sahari, dimalam nan samalam nan tun, iyo > bak kato Dunsanak Madahar, Bakuhampeh bajadi-jadi, siko mangecek sinan > manyahuk, timba-batimba jadino, tapi bak kato papatah juo : > Pincalang biduak rang Tiku > baok mandayuang sambia manungku > basilang kayu ditungku > disinan mangko api ka hiduk. > > Insyaallah > > Babaju kasumbo lusuah, pakaian rajo tigo jurai, tanunan puti di Ulak-an > dapeklah paham nan saukua, batamu bana nan sasuai, jatuah kato kabulatan. > > nan bulek lah buliah digolongkan, kok pipih buliah dilayangkan, aratino > bana lah tibo golek di nan data. > > Untuak Tuan Ridwan M St. Rajo Sulaiman. > Kalau mancaliak pado rupo, mandanga pado bunyi nan Tuan sampaikan, > Alhamdulillah lai paguno VCD tu. Limbak nan dari pado itu,umpamo kok Tuan > ka Barandai, Basaluang, Barabab, Bakucapi, di Rantau tu, Insyaallah bisa > pulo kito usahokan, saindak-indakno ambo mancarikan atau maurus nan ka > Barandai, Basalaung, Barabab jo Bakucapi tu, Tuan tingga maurus nan di > sinan, Lah kasanang hati Tuan tantang itu ?. > > Limbak nan dari pado itu, tantangan nan katangah di Dunsanak Madahar jo Z. > Chaniago sarato Tuan Ridwan M. St Rajo Sulaiman, Insyaallah. lah taracak > dalam undang, lah talingka dalam Pusako, lah tibo sungguah ditampaikno, > basananglah hati nan disinan. > > Wassalamu'alaikum w.w. > > > Sutan Bandaro Labiah. ~~~~~~~~~~~~~~~~~~~~~~~~~~~~~~~~~~~~~~~~~~~~~~~ Ingin memasarkan produk anda di web RantauNet http://www.rantaunet.com Hubungi [EMAIL PROTECTED] atau [EMAIL PROTECTED] ~~~~~~~~~~~~~~~~~~~~~~~~~~~~~~~~~~~~~~~~~~~~~~~ Isikan data keanggotaan anda di http://www.rantaunet.com/daftar.php ---------------------------------------------------- Berhenti menerima RantauNet Mailing List, silahkan ke: http://www.rantaunet.com/unsubscribe.php ========================================
