Bismillahirahmanirrahim
Assalamu'alaikum w.w.
Tuan M. Sutan Bangsawan
Dek jauah jalan nan dituruk, jalan bakelok nan ditampuah, talambek ambo tibo, tibo mambaleh surek Tuan.
karano bapakai manuruk adaik, manjadi undang dinan tuo, kok kato iyo bajawek, kaok gayuang iyo basambuk
Abdur rauf rajo rang Makah, naiak tahta duo tingkek
Dahulu kato nan basitinah, kudian kato basicapek
basicapek pulo jawekno kapado Tuan
Hadok kapado "bana" nan katangah di Tuan tu, batang tasanda pado gunuang, urek tahujam kapitalo, tibo sungguah ditampaikno. Limbak nan daripado itu, a nan kajadi jawek no, adolah :
Partamo = tantangan lah tibo ulak jo alai, dari Niniak dengan Mamak, sarato anak kamanakan nan sakaum jo sapasukuan Tuan kini tu, nan kamambangkik Batang Tarandam, kok diambo iyo "kok tinggi tagak maanjuang, kok gadang tagak maamba" handakno batarimolah jo hati nan suci jo muko nan janiah, Insyaallah kok tibo diwakatuno, ambo kajakan pulo pai ka Sulik Aia agak salincam.
Oii Tuan !
Biriak-biriak tabang kasamak, dari samak turun kahalaman, jatuah tibo ditanah bato.
Dari niniak turun ka Mamak, dari Mamak turun ka Kamanakan, Pusako lamo baitu juo.
Dek karano baitu, mangko "Karajo Baiak" tu elok dipasugirokan
Kaduo = Ambo lai ka Sulik Aia, tapi indak talok li doh mandaki janjang saribu tu, maklum lah awak lah gaek-gaek ko, sasak angok beko dibuekno, pado bagalaik bekono, tapaso macaliak jauah sajo dari bawah
Katigo = Ambo sabanano alah mananti-nantikan sajo kaba dari Tuan, kajadi atau indak pai ka Parapat, tapi ka baa lai, indak dapek diawak kadipangakan. Kok indak kini, dilain wakatu bagai menah.
Kaampek =D'oa ambo untuak Tuan jo kaluarga di Palembang, samoga siaik-siak sajo, dan salamat pai jo pulang "Manyubarang" bisuak ko, jan lupo aia zam-zam agak sagalek ketek, untuak panyaru ambo baisuak, Tolong pulolah do'akan ambo di "Tanah Haram" tu, supayo batambah siaik, batambah rasaki dan sagalono.
Sakian dari ambo Tuan.
Kok kurang mintak ditukuak, kok jarang mintak disisik, bapambarian Tuan tangtang itu.
Wassalamu'alaikum .w.w.
Sutan Bandaro Labiah
[EMAIL PROTECTED] wrote:
Server mailing list RantauNet berjalan atas sumbangan para anggota, simpatisan dan semua pihak yang bersedia membantu. Ingin menyumbang silahkan klik: http://www.rantaunet.com/sumbangan.php
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Ass,wr,wb.
Sutan Bandaro Labiah nan ambo imbau, iyo lapeh taragak ambo mambaco apo
nan Tuan postingkan untuak katigo dunsanak kito tu, walau itu indak tatuju
ka ambo, iyo sajuak hati ambo mambaco pepatah-petitih nan Tuan lewa-kan
tu.
======
Di Sulik Ayie, ambo alah didaulat dek kaum ambo untuak diangkek manjadi
Datuk/Pangulu di kaum ambo nan Datuak/Pangulunyo sadang kosong kini
(meninggal dunia tigo bulan nan lalu), ambo masih menjanjikan nantik sajo
sasudah pulang haji atau rayo nan ka datang. Kalau jadi nantik, akan ambo
undang Tuan dan warga RN lainnyo.
Jadi Tuan Bandaro Labiah apo jadi singgah ka nagari kami Sulik Ayie tu ?
====
Wassalam,
M.St.Bangsawan (46 +)
Suku Limo Singkek di bawah payuang Datuk Marah Bangso, Sulik Ayie - Solok
BT Yahoo! Broadband - Save �80 when you order online today. Hurry! Offer ends 21st December 2003. The way the internet was meant to be.
