Waalaikumsalam w.w. Nanda Hanifah,
Sudah tantu bukan hanyo supir nan ambo kaderkan. Ambo manjawab tantang supir
karano itu nan Nanda tanyokan.
Ambo manggembleng saluruah anak buah ambo sebagai kader, tamasuak urang awak.
Wakatu ambo jadi Komisaris Utama BUMN PT ReIndo tahun 1998, ambo nan
mancalonkan Dirutnyo, Sdr Drs Hendrisman Rahim, nan tanyato memang hebat sampai
kini. Ambo juo ikuik manggembleng para pejabat eselon 3 jo eselon 2 Sekneg, nan
alah naiak jadi eselon 1 Sekneg kini, babarapo di antaronyo urang awak. Baitu
juo wakatu ambo jadi Wakia Kapalo Dinas Penerangan Angkatan Darat, babarapo
mayor dan letnan kolonel urang awak ambo gembleng..Ado nan kudian jadi anggota
DPR RI/Fraksi TNI. Jadi ambo indak tamasuak urang nan manyasa-nyasa doh.
Sakadar catatan untuak Nanda, ambo mananamkan kapicayoan diri sabagai modal
utama untuak maju dalam karir, baik kapado saluruah anak buah ambo maupun
kapado anak-anak ambo. Jan mancari angok kalua badan. Kalaupun ambo ado maju
dalam karir, rasonyo -- salain jo izin Allah swt -- bukan karano dek belas
kasihan urang, tapi karano ambo menggembleng diri ambo habis-habisan. Ambo
indak amuah tagantuang atau bagantuang ka sia juo. Baitu juo anak-anak ambo,
indak ado nan ambo salek-salekan supayo maju. Nan ambo jamin adolah pendidikan
sampai tingkek S1, sasudah tu maju surang. Ado tigo nan alah S2, alhamdulillah.
Nampaknyo banyak saketeknyo lai berhasil.
Khusus dalam profesi dan minat pribadi ambo -- tantang masalah etnisitas
dalam hiduik babangso dan banegara -- iyo memang indak banyak nan baminat,
bukan hanyo urang awak, tapi juo nan indak urang awak. Minat jo profesi kan
indak bisa diajan-ajan doh. Mungkin juo indak saluruah urang paralu maikuik
jajak ambo, karano pitihnyo indak banyak, pas makan sajo. Babarapo anak ambo
nan karajo di swasta, gajinyo labiah gadang dari gaji ambo dulu. Kan itu
rancak. Bayangkan kalau mereka persis maikuiki jajak ambo, kan pas makan sajo.
Ringkasnyo Nanda, saparati pandapek Khalil Gibran, tugas ambo dalam
manyiapkan anak-anak ambo -- sarato nan mudo-mudo urang awak -- bagaikan
manjadi busur nan malapehkan anak panah ka sasaran. Sasudah lapeh, silakan inyo
jalan surang.
Ambo maaharokkan supayo anak-anak mudo nan mambaco buku nan ambo tulih jo
Sanak Ir Mohammad`Zulfan Tadjoeddin MA tantang Minangkabau "Masih Ada Harapan:
Posisi Sebuah Etnik Minoritas dalam Kehidupan Berbangsa dan Bernegara", Yayasan
Sepuluh Agustus, Jakarta, 2004, sacaro indak langsuang dan sacaro intelektual
akan manjadi kader-kader ambo. Ambo sanang sakali maliek banyak anak mudo
anggota KMM Jaya jo mahasiswa sarato dosen Universitas Andalas Padang nan alah
mambaco buku tu, dan manyatokan sapandapek atau paliang indak indak manantang.
Langsuang atau indak langsuang ambo anggap mereka sabagai kader ambo.
Sampai di siko dahulu, Nanda.
Wassalam,
Saafroedin Bahar.
hanifah daman <[EMAIL PROTECTED]> wrote:
Assalammualaikum Wr Wb bapak Saaf yth
Bapak, carito Zainudin dun kan karya sastra .. bukan kisah sejati.
Hanifah masih panasaran ... sabagai pajabat tinggi dan sabagai BrigJen baa
kok bapak hanyo bisa mangkaderkan sopir ?. Kalau bapak kaderkan labiah dari
sopir, mungkin bapak punyo pangganti dan mungkin labiah baiak dari bapak,
sahinggo indak sarupo kini, mambuek bapak jadi risau. Bukankah urang minang juo
punyo patatah patitiah " .... Anak dipangku, kamanakan di bimbiang, urang
kampuang dipatenggangkan ? ". Kan bisa sajo patatah tersebut dikambangkan dari
nagari jadi propinsi ??. Bukankah adat babuhua sintak ?
Karano kito sadang puaso ... mohon maaf kalau pertanyaan hanifah indak
berkenan di hati. Yah begitulah hanifah yang asli... bukak kulik tampak isi.
Bukankah bapak juga begitu ?
Wass
Hanifah Damnhuri
"Dr.Saafroedin BAHAR" <[EMAIL PROTECTED]> wrote:
Ananda Hanifah,
Kalau ambo ranuangkan baa mako pado suku lain baitu arek hubuangannyo --
misalnyo suku Batak -- nan nampak dek ambo adolah karano struktur sosial mereka
batua-batua disusun untuak mampatalikan dan manyatukan mereka nan batali darah.
Ananda pelajarilah konsep 'dalihan na tolu' nan baakibat pado hubungan marga
'boru' jo 'hula-hula', nan sabana bakapiek.
Bandiangkanlah jo urang awak, antaro lain dalam carito 'Tenggelamnya Kapal
van der Wijk' karangan Buya Hamka, nan mancaritokan kamalangan nasib Zainuddin
nan baayah Minang baibu Bugih, ditulak kama-kama dek urang awak wakatu inyo
ingin manamui kaum kerabatnyo di Ranah Minang. Apo sababnyo ? Manuruik dugaan
ambo karano takuik harato pusako ka diambiaknyo. Dalam hubungan ko ambo sangat
satuju jo analisa antropolog Unand, Ananda Dra Sri Setyawaty MA, baliau ko
urang awak, bahaso sabananyo adat Minang tu sangat materialistik. Itu sababnyo
mako wacananyo baputa-puta pado soal sako dan pusako sajo, indak
kambang-kambang, dan indak mampu marespons baitu banyak masalah maso kini. Itu
juo sababnyo ambo mamutuihkan wacana soal adat jo dalam RN nan lalu, karano
pembicaraan indak kabambang lai, dan alah jadi steril.
Mau indak mau ambo memang mambandiangkan urang Batak jo urang awak. Di kito
sacaro normatif antaro ayah jo anak sajo indak ado hubungan sosial, antaro lain
indak sapasukuan, indak ado dalam ranji, dan indak ado harato warisan, padohal
kito mangaku baagamo Islam, nan maajakan bahaso hubungan nasab tu malalui Ayah.
Syukur alhamdulillah, norma sarupo tu alah banyak ditinggakan urang Minang
dalam kenyataan iduik sahari-hari. Manuruik panalitian Unand tahun 1978,
sabanyak 92.8% urang Minang alah iduik dalam keluarga nan tadiri dari ayah,
ibu, dan anak-anak, karano itu sabananyo -- diakui atau tidak -- sacaro
pelan-pelan alah tajadi samacam 'silent social revolution' di Minangkabau tu.
Hanyo panganuik paradigma lamo ko sabana gigih, walau kenyataan indak
mandukuang lai.
Ambo alah cukuik banyak manulih tantang soal ko, sahinggo rasonyo indak
paralu ambo ulangi dalam kesempatan ko. Posisi ambo paliang akhir adolah
pabiakan sajolah kito maanuik paradigma nan cocok dek kito surang-surang,
sambia ba-'fastabiqul khairaat'. Tipak di ambo, Islam sajo rasonyo alah labiah
dari cukuik.
Dalam pancaliakan ambo sabananyo kamajuan karir pado tingkek strategis tu
juo banyak tagantuang pado kamampuan kito, indak saluruahnyo pado hubungan
kekerabatan, walau raso solidaritas kekerabatan itu bisa sangaik mambantu.
Sudah barang tantu suku-suku minoritas paralu maadokan aliansi jo suku
mayoritas. Dalam hal ko urang Batak jo Cino sabana piawai. Mereka salain ka
dalam sabana kuaik, kalua mereka mambuka hubungan karajo samo jo suku Jawa, nan
baa juo akan tatap manang karano jumlahnyo saparo jumlah penduduk Indonesia.
Sacaro perorangan ado juo urang awak nan mambuka hubungan aliansi tu, tapi
rasonyo sacaro manyaluruah, kito alun mangambangkan strategi tu, antaro lain
karano hubungan struktural antaro sasamo urang Minang alun jaleh bana, tautamo
pado tingkek supra nagari.
Tantang supir ambo ? Namonyo Armandy Chaniago, jaleh urang awak.
Wassalam,
Saafroedin Bahar
hanifah daman <[EMAIL PROTECTED]> wrote:
Masih jam duo, kok bapak manyuruah hanifah babuko ???
Hanifah mambandiangkan suku suku lain nan kalau ado nan sadang di ateh di
kamehino sado nan bisa dikamehi. Ndak paduli pantas atau indak pantas .. toh jo
konsep " BERSAMA KITA BISA " mereka iyo saliang bantu
mambantu, bak tabiang jo aua. Yo bana badaso kalau ado nan di ateh.
Apo bapak pernah mantun katiko bapak jadi pejabat ??? Jangan2 sopir bapak
Jawa. Karano nan rajin baraja dan amuah di suruah suruah eh loyal iyo suku Jawa.
Satantangan urang awak ...
Dek umumno posisi strategis dipacik suku lain ... tantu urang awak taimpik
galombang. Kalau indak punyo kamampuan istimewa, sulik untuak dilibatkan urang
lain di tingkek stratewgis. Balain jo katiko sikola ... murni persaingan otak.
Tapi katiko bakarajo .... buanyak faktor nan mampangaruahi. Maaf taraso
mambuang aia kalauik.
Bapak bagilah iolmu strategi bapak dun ka kami, salain bamodal santiang, ulet
.. baa carono bisa mamutuih jejaring urang nan sangaik kuaik kini gon. Dulu
urang alun punyoi jejaring kayak kini ladoh ...eh eh tantu bapak nan labiah tau.
Salam
Hanifah Damanhuri
"Dr.Saafroedin BAHAR" <[EMAIL PROTECTED]> wrote:
Waaalikumsalam w.w. Ananda Hanifah,
Wawasan manciuik bukan bararti karano indak pandai. Nan pandai banyak, tapi
cakrawala atau horizon pamikirannyo bisa tabateh di tingkek kaum, suku, dan
nagari sajo. Cubolah Ananda caliak bara bana urang awak maso kini nan bapikia,
manulih, atau mangecek manganai soal-soal nasional, dan regional, apolagi
soal-soal tingkek internasional saroman para pendahulu kito dahulu. Ambo
kadang-kadang juo heran, indak kurang banyaknyo sanak-sanak kito nan sabana
santiang, sikola alah malanglang buana, tapi tibo jo wawasan indak labiah dari
nagari ka nagarinyo surang sajo, dan susah bana diajak mambahas Minangkabau
sacaro kasaluruahan.
Kader ambo? Rasonyo lumayan banyak. Jan lupo, ambo kan dosen, penulih, dan
penceramah. Tiok urang nan baraja, mambaco, atau mandanga pandapek ambo , dan
indak manantangnyo, apolagi nan satuju dan mangambangkannyo labiah lanjuik,
ambo anggap kader ambo. Dalam dinas pun ambo manggadangkan dan mendorong maju
anak buah ambo. Salah surang, karyawan 'cleaning service' di kantua ambo di
Sekretariat Negara, salain ambo kirim naiak haji juo ambo dorong baraja taruih,
kini alah jadi sarjana dan bakarajo di Sekretariat Kabinet. Supir ambo manjadi
ahli komputer di Sekretariat Negara.
Itu manuruik pandapek ambo, bisa bana dan bisa salah Nanda. Salamaik babuko,
labiahkan untuak ambo saketek.
Wassalam,
Saafroedin Bahar
hanifah daman <[EMAIL PROTECTED]> wrote:
Assalammualaikum Wr Wb Bapak Saaf yth
Hanifah sato pulo sakaki
Baraja dari PAMILU nan lalu.
Tetangga hanifah nan banamo Bpk X, sekretaris dari IKM kota Bengkulu nan
mancalonkan diri di partai PKS. Baliau seorang pangusaha yang sukses di
Bengkulu. " Kalau nak nio sato marubah negara, awak mesti talibaik
didalamno ". Mantun katono, sahinggo baliau maju mancalonkan diri. Sabagai
sekretaris IKM tantu baliau harok ka dapek suaro dari rakyaik Minang nan ado di
Bengkulu.
Namono politik dan awakpun barado di kampuang urang, sahari jelang PAMILU.
beredar selebaran gelap yang manjatuahkan reputasi bapak X tersebut. Ya sudah
... kalah. Sasudah itu, pacah pulo kongsi dagangno. Akhirno baliau hijrah
maninggakan Bengkulu.
Kalau wawasan urang awak manciuik, mangetek dll. Rasono bapak paralu
mambuktikanno, darimano bapak manyimpulkan mantun ?
Sabab dibangku kuliah indak saketek urang awak nan masuak sapuluah besar doh.
Manuruik hanifah ndak itu alasan utama no doh. Salah satu alasanno adolah ...
pejabat Minang indak pernah mambuek kaderisasi. Kalau alah di ateh ndak takana
lai jo rakyaik badarai. Contohno .... bapak sendiri ... mano kader bapak ???
Maaf bulan puaso ngajak debat. Jangan marah ya pak, kan puasaaa
Wass
Hanifah Damanhuri
"Dr.Saafroedin BAHAR" <[EMAIL PROTECTED]> wrote:
Waalaikumsalam w.w. Nanda Syahreza,
Ambo juo ingin mancaliak urang awak ko masuak ka sagalo partai -- saroman
zaman revolusi 1945 dulu -- dan di tiok partai tu jadi urang gadang. Kiniko
nampaknyo nan banyak di PAN sajo, sabagai sambuangan ormas Muhammadiyah nan
memang banyak urang awaknyo. Sabagian lai ado di Golkar, syukur ado pak Fahmi
Idris nan duduak di pimpinan.
Kasimpulannyo adolah : wawasan urang awak ko memang alah manciuik, mangetek,
ba-'involusi', bak kato Clifford Geertz kalau ambo indak salah. Padohal
papatah kito maajakan 'alam takambang jadi guru', 'maambiak tuah dari nan
manang', 'tuah sakato cilako basilang'. Nampak di ambo kudian ko kito samo
sakali indak ado baraja apo-apo, baiak dari nan kalah maupun dari nan manang.
Jadi apo nan alah kito karajokan ? Rasonyo basianyuik sajo. Dima tumbuah dima
disiangi. Wadduhhhh. Sia nan bisa -- dan basadio baiyo bana -- untuak kito
ajak barundiang marancang dan mambangun maso datang Minangkabau sacaro
konseptual dan pro aktif?
Wassalam,
Saafroedin Bahar
muhammad syahreza <[EMAIL PROTECTED]> wrote:
Assalamu'alaikum wr.wb.
Dari Ayah Saaf :
kito urang Minang memang indak dirancang untuk basatu tapi untuak bapacah
balah, sakaum-sakaum sakaum, sasuku-sasuku, jo sanagari-sanagani. Rasonyo alun
ado nan manulak pandangan ambo tu sacaro mandasar pulo. Jadi mungkin sakali
pandangan ambo tu ado juo batuanyo saketek.
Sasuai usul Ayah Saaf dulu, mungkin labiah ideal kalau perantau minang yang
alah sukses di berbagai provinsi di Indonesia kito usulkan / dukuang untuak
masuak dan terjun ka partai-partai di provinsi-provinsi beliau badomisili dan
bausaho tu. Kito yang ingin ado perubahan bisalah mambantu dengan
program-program yang ideal agar beliau-beliau ko bisa jadi urang yang paliang
bapengaruh/pemimpin di partai-partai tu, dengan harapan beliau-beliau ko bisa
sampai ka senayan walau mewakili provinsi-provinsi luar Sumbar. Kalau lai urang
awak se yang mayoritas di senayan tu, kan ado tontonan baru yang rancak tu, baa
urang-urang awak yang dirancang untuak bapacah balah tu barundiang? Apo kah
mereka bisa basatu jo bakarajo samo untuak mambantu Sumbar? atau tambah
basibanak jo basipakak? Walau beliau-beliau ko alah jadi rajo ketek di
provinsi-provinsi lain.
wassalam
Reza
---------------------------------
Shape Yahoo! in your own image. Join our Network Research Panel today!
---------------------------------
Building a website is a piece of cake.
Yahoo! Small Business gives you all the tools to get online.
---------------------------------
Moody friends. Drama queens. Your life? Nope! - their life, your story.
Play Sims Stories at Yahoo! Games.
---------------------------------
Don't let your dream ride pass you by. Make it a reality with Yahoo! Autos.
---------------------------------
Be a better Heartthrob. Get better relationship answers from someone who
knows.
Yahoo! Answers - Check it out.
---------------------------------
Need a vacation? Get great deals to amazing places on Yahoo! Travel.
--~--~---------~--~----~------------~-------~--~----~
===============================================================
Website: http://www.rantaunet.org
===============================================================
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Posting email besar dari >200KB akan di banned, sampai yang bersangkutan
menyampaikan komitmen akan mematuhi Tata Tertib yang berlaku.
- Email attachment, DILARANG! Tawarkan kepada yang berminat dan kirim melalui
jalur pribadi.
===============================================================
Berhenti (unsubscribe), kirim email kosong ke: [EMAIL PROTECTED]
Webmail Mailing List dan Konfigurasi keanggotaan lihat di:
http://groups.google.com/group/RantauNet/subscribe
Dengan terlebih dahulu mendaftarkan email anda pada Google Account di:
https://www.google.com/accounts/NewAccount
===============================================================
-~----------~----~----~----~------~----~------~--~---
