Mamak2, Kakak2 sarato dunsanak di palanta, khususnyo ka Sanak Armen, Soal kepriabdian urang Minang, nan manyabuik2 soal pencopet, ambo kutip dari makalah Prof. HHB Saanin Dt Tan Pariaman (1980). Cubo diliek baliak: jaleh apo nan ambo tulih dilatak dalam tando kutip. Jadi, itu bukan pandapek ambo. Saanin ko salah sorang urang awak ahli psikologi angkatan pertama Republik. Mungkin pandapeknyo indak lompong sagu sajo doh. Keceknyo apo nan nyo kemukakan dalam makalah tu ditulih sasudah labiah 10 tahun mengamati banyak pasien sakik jiwa urang awak, baiak di rantau maupun di kampuang. Memang ndak cukuik aneh bahaso di kampuang awak banyak basobok urang gilo (malah di abaik 21 ko masih ado nan bapasuang). Di zaman kolonial antropolog ragawi Dr. de Zwaan lah tertarik meneliti banyak urang gilo di Minangkabau (liek: Rupo e artikel lengkap Pak Saanin tu ado di buku ko: Pariaman, H.H.B. Saanin Dt. Tan. 1980. “Kepribadian orang Minangkabau.” In: M.A.W. Brouwer et al. (eds.), Kepribadian dan perubahannya, pp. 139-164. Jakarta: Pt. Gramedia. Pak Saanin ko (nan namo e diabadikan kini untuak namo rumah sakik Gaduik) aslinyo urang Pasisia, tapi mungkin niniak muyang e ughang Piaman, sabab di balakang namo e ado gala 'Dt. Tan Pariaman'. Soal maasah kapiamanan (atau kaminangkabauan sacaro umum), ambo maambiak jalur budaya: mancubo mamahami bahaso sastra indang, baikayaik, sarafal anam, simarantang, rabab Pariaman, pantun, dan genre2 sastra Minang lainnyo nan ado di luhak dan rantau nan lain. Memang itu bidang nan ambo sukoi sajak dulu sampai kini. Kalau soal 'ughang2 gadang' baameh babungkah di Pasa Tanah Abang, Blok M, dll., sasuai ambo jo kecek Sanak Aulia di bawah, itu tantu lah lain pulo onggok e tu. Kawan2 nan jadi tukang ameh di parantauan lai acok juo bakontak. Satiok ambo pulang ka Jakarta, salalu ambo mampir manjanguak sorang famili nan manggaleh ameh di Pasa Ikan, Jakarta. Di sinan ambo tagak agak sajam duo jam maota2, maliek2 aktifitas urang bajua bali. Tapi indak atensi ambo untuak tau labiah jauah soal saluak-baluak dunia padagang ameh ko. Indak pulo atensi ambo untuak mamakai cincin ameh gadang baukie bakarawang mamakai parmato buah dalimo, walau acok ditawarkan dek adiak ambo ko. Di Jakarta ko ka mungkin sajo tu nyo ado pareman ughang Piaman atau dari luhak nan tigo dan rantau nan lain. Alun takilek tantu alah takalam kito tantang itu. Tahun 1860-an sajo Muhammad Saleh Dt Rangkayo Basa (Meik Saleh), pedagang Piaman nan terkenal di abad ke-19, dalam auotbiografinyo: 'Wiwajat hidoep dan perasaian saja', manulih bahaso di Susoh jo Tarumun (Aceh Barat) lah ado pareman urang awak (Minang mukasuiknyo) nan jadi 'rajo' di palabuhan, nan sation kolek barang masuak dari ma sajo, paralu manyetor gak ciek atau satangah karuang gambia atau bareh ka inyo. Menarik (dan sasuai jo kecek Sanak Armen) kutiko kolek Meik Saleh masuak dari Piaman, pareman urang awak ko pun mamintak bareh sakaruang dari Meik Saleh. Tapi sasudah maota2 dalam bahaso Piaman, akhirnyo perei sajo lai, ndak kanai 'pajak' doh kolek Meik Saleh. SABAB SASUDAH MAOTA2 JO MEIK SALEH TANBUKAK RASIO: RUPO E PAREMAN KO MANDEH E URANG KURAITAJI, HE HE.UNTUK KONTEKS INDONESIA, KESETIAKAWANAN ETNISITAS ITU MASIH TAMPAK, WALAU WUJUDNYA MUNGKIN BERBEDA2 ANTARA SATU ETNIS DAN ETNIS LAIN. Soal urang Minang jadi pareman (itu saabih2 akan), ambo kiro indak baitu kaget bana awak. Bukankah dalam kaba Cindua Mato sajo lah disabuik'an namo 'pareman-pareman rang awak' nan manguasoi Bukik Tambun Tulang? Sia nan malinteh di sinan harus rela malapeh barang di badan, kalau indak ingin jadi maik. Nan jaleh, kalau ado nan sikolah antropologi, rancak juo mah manaliti dunia pareman urang awak ko, indak sajo di Jakarta, tapi di Medan, Palembang dll. (Salah satu narasumber e bisa dimintak Sanak Armen Zulkarnain mah: misalnyo soal latar belakang sosialnyo, soal merepresentasikan identitas keetnisannyo, dan siklus hidupnyo. Nan menarik, banyak mantan pareman ko nan lah 'patah kuku' di di rantau akhianyo pulang ka kampuang. Ado nan sadar jadi rang surau, ado pulo nan kulikaiknyo co biaso, tapi tantu indak co di rantau lai. Di kampuang ambo, Sunua, ado 3 urang kini tu: sorang mantan 'urang gadang' di terminal bis Rawamangun (kebetulan badan e iyo gadang lo). Sajak ANS jo NPM lah sandek dikupak dek seo kapatabang nan murah, kini lah baliak wee ka kampuang, jadi tukang uni los lambuang dari balai ka balai, mintak kopi perei dari kawan ka kawan; sorang lai mantan pareman di Palembang: kawan ko putuih kaki e ciek hinggo paho karano kanai tuja dek pisau urang Komering baracun ipuah. Tapaso bapontong... kini banamo si 'J.....pontong' di kampuang. Bajalan jo tukek kini di kampuang. Gaya e tatap pareman, maota di lapau manggadang taruih, bantuak ka dibali e seluruh isi cubahak di lapau, tapi sia urang kampuang nan ka namuah kanai otanyo? Di balakangnyo urang mancibia; sorang lai mantan pareman gadang lo di Palembang (dulu sangkek kuaik di Palembang, amaknyo pakai galang jo lontin ameh bauntai co toko ameh bajalan di 27 Ilir indak sia juo nan talok manjambret doh, dek anaknyo kapalo pareman di sinan). Pernah wakatu pulang kampuang sangkek masih jadi pareman di Palembang, inyo bunuah sorang urang agak mereng utak di kampuang: nyo banaman paja mereng utak ko ka dalam tabek. akhianyo maningga. Masuaklah pareman ko masuak pinjaro di Karan Aua. Sabulan dalam pinjaro inyo ilang. Polisi buluih luambek. Sasudah tu tadanga inyo lah tibo di Palembang liak. Kini mantan pareman gadang Palembang ko lah mauni kampuang, manjadi panitia pambangunan surau. Dunia rang Minang di rantau ko barono2 bantuak ula tampuang ari. Nan coga tabarumbuang tampak jauah, nan lain masih banyak nan takalimbun. Nan jaleh, sasuai jo kecek Pak Saanin tadi: mungkin ado nan harus dipaliek'an ka rang banyak, tapi ado pulo nan paralu (atau tapaso) disuruak'an, walaupun nan disuruak'an tu tagolong carito sukses juo (tamsuak jadi pareman gadang baanak buah banyak di rantau urang). Sabab dek tadi tu: 'malu nan indak dapek dibagi'. Wassalam, Suryadi
Dari: Aulia R. Putera <auliaput...@gmail.com> Kepada: "rantaunet@googlegroups.com" <rantaunet@googlegroups.com> Cc: MuharmeinChaniago <muharm...@yahoo.com>; Armen Zulkarnain <emeneschoo...@yahoo.co.id> Dikirim: Senin, 30 Juli 2012 5:25 Judul: [R@ntau-Net] Re: Permintaan klarifikasi Kriminalitas Ughang Piaman ---- sebuah visi tentang bung Ahok: orang Minang (super)individualis Mak Anwar Djambak nan ambo hormati dan sanak palanta Rantau. Net. Permintaan klarifikasi ko bukan dari ambo pribadi tapi saroman nan ambo kutip datang dari panguruih organisasi syah babadan hukum nan mahimpun ughang Piaman di parantauan. Dek karano "sinyalemen" tantang ko dimuek sacaro terbuka di palanta, makonyo selain alah dimintakan klarifikasi langsuang kapado add Armen melalui jalur prinadi, dianggap paralu pulo dek panguruih dimukasuik untuk malewakannyo di palanta. Ciek lai, mungkin dek ambo ughang Piaman gadang dirantau walaupun sakali sakali lai maota ota juo jo ughang ughang gadang nan disabuik sabuik dalam email add Armen, tapi kok yo jo "rahasia umum" nan ciek ko yo ndak tabukak rahasionyo ka ambo do lai. Mungkin mantun pulo jo ajo Suryadi, singgo takah tulih Armen paralu pulo mah "maasah kapiamanan ajo satantang hal mantun, sabab ambo nan urang mudiak Pikumbuah sajo lai tau, baa ko urang Sunua indak joleh?" Salanjuiknyo ambo pulangkan ka sidang Palanta nan berhormat. Aulia/Lk/46 th/Sicincin kini sadang marantau di Jakarta Sent from my iPad -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
