Ajo Suryadi rang Sunua Nan Sabarih, pak Muharmein Zein rang Aua Malintang, mak Dutamardin rang Gasan Gadang, Inyiak Buyuang rang IV Angkek Padusunan sarato angku, mamak bundo jo adi dunsanak sapalanta nan ambo hormati,
Saroman nan disabuik mak Dutamardin, nan lahia di Padang, ketek di kampuang, sikolah di Sumut jo Aceh, kudian bakarajo di Sibolga lalu kuliah di Pakanbaru sajak babarapo tahun terakhir bamukim di Padang. Dari nan dicaliak pado berbagai wilayah, urang minang ko punyo bermacam profesi. Tantu nan tacelak bana iyo di pasa-pasa satiok kota nan ado, mulai dari kaki limo, nan bakadai hinggo ka pareman pasa. Satali bantuak nan manggaleh, nan pareman ko dimulai dari bawah sampai ado nan manjadi pengusaha. Kutiko masih di Pakanbaru, masih juo takana tanggalnyo, yaitu 22 Agustus 1999 ketua Pemuda Pancasila Provinsi Riau alm. Syafli Duyun Tanjuang tewas oleh pembunuh bayaran nan marupokan konspirasi induak angkang pareman dari Medan Olo Panggabean nan mancubo masuak ka wilayah Riau. Bang Duyun Tanjuang ko - baitu kami nan masih mahasiswa maimbaunyo - acok membantu kegiatan mahasiswa di Pakabaru, talapeh jo bisnis baliau nan bamacam ragam ko. Olo Panggabean nan ko alah petai-petai pulo sajak Sutanto menjabat Kapolri di tahun 2005, dimano bisnis ilegalnyo ditarah sampai ka akar-akarnyo. Pareman ko iyo tabagi seven pulo, bermacam-macam kurenah & caro beroperasi, dari nan legal, abu-abu, hinggo sampai nan hitam bana. Walaupun baitu, pareman urang awak ko masih pakai paretongan. Banyak nan manolong sasamo urang minang bahkan sato baiyo membantu pembangunan di nagari. Nan jaleh, walau pun pareman, selalu mamakai pola karajo samo, punyo sindikasi, kelompok nan mambuek jaringan karajo mulai dari level bawah hinggo sampai ka pucuak & indak bamain surang-surang sajo. Kesan urang minang ko nan indak bisa baiyo-iyo, individualis bahkan super induvidualis mungkin tatangkok dari suduik pandang akdemisi nan memang wilayah karajonyo indak mencapai seluruh sektor perekonomian nan ado. Antah kok iyo ado sosiolog ataupum antroplog nan amuah pai melakukan observasi ka pasa-pasa (itupun kok lai ado panyandang dananyo) & mengamati kegiatan di sinan mulai pagi hinggo laruik malam. Maklum sajo, pasa nan ko biasonyo kumuah, babaun, sumpek, semrawut dan sagalo macam kondisi semrawut nan alah hal lumrah pasa-pasa nan ado di Indonesia. Bisa pulo dicubo kalkulasikan bara persen wilayah pasa nan saharusnyo indak diperuntukan tampek manggaleh, alah manjadi lapak pulo, kudian bara jumlah kendaraan nan masuak, jumlah setoran keamaanan & beo nan dibayia tiok hari. Apokah hal iko indak diatur oleh dinas pasar nan marupokan tangan pemerintah untuak maatur pasa-pas nan ko? Kok lai bajalan kinerja aparat pemerintahan nan ko tantu balain pulo curitonyo. Dari celah nan tampak pado kelemahan koordinasi dimasing-masing instansi pemerintahan nan ko lah, pareman-pareman masuak mancari lahan bisnis nan bisa dikuasoi. Tantu hal iko pakai strategi, lobby, kalkulasi & penetrasi pulo. **** Babaliak ka pangka kaji, ijan sakali-kali juo manyabuik urang minang ko indak bisa bakarajosamo, baiyo-iyo, batido-tido. Sabab sebagai mahluk sosial kito paralu pulo jo nan lain. Apo nan tasabuik jo apo nan tacaliak dalam proses musyawarah mantun indak pulo paralu kito sorak-soraikan pabilo tajadi mis komunikasi untuak bamufakat. Sabab proses nan ko akan selalu dinamis, kito paralu pulo maaukua kapasitas masing-masing antaro pandapek, kinerja, kondisi lapangan nan ado jo resouces nan ado. Tingga di kito sajo babaliak ka diri masing-masing, sabab lidi mantun indak bisa manjadi sapu kalau indak dikabek jo kebersamaan, nan marupokan kumpulan urang nan dari berbagai latar belakang untuak tujuan nan samo. Pengalaman babarapo tahun terakhir babelok ka nagari-nagari, banyak pulo nan manjadi parasaian mancaliak kurenah urang awak di kampuang, mulai dari nan badarai hinggo nan manjadi sipangka di nagari. Namun ambo sendiri menilai hal iko indak patuik dilewakan, sabab apo nan tajadi disuatu nagari cukuik hanyo urang di kampuang sarato anak nagari di perantauan nan paralu tahu. Hal itu akan bisa disalasaikan pabilo polemik nan ado, dimusyarahkan jo caro batampek-tampek & babiliak-biliak saroman apo nan kito sabuik babiliak kaum, babiliak suku, babiliak nagari. Tantu antaro urang minang nan ko nan punyo latar belakang nan bebeda, bisa pulo babiliak-biliak untuak bakarajosamo mampasamokan dalam wadah organiasi perantau nan ado. Tasirek dari apo nan disampaikan pak ketua Muharmein kapado ajo Suryadi, kok iyo ado tanampak nan buruak dari urang awak ko, rancak untuak kito mampasamokan dimaso mendatang, sabab ughang Piaman ko punyo wadah organisasinyo, nan ambo danga dari nan lain sarato nan tacaliak dari nan sudah-sudah lai punyo apresiasi nan tenggi untuak mamajukan kampuang halaman sarato organisasi rantau sacaro basamo-samo. Tipak di ambo sendiri, nan mamiliah bakarajo di lapangan dari nagari ka nagari, selalu maupayokan agar komunikasi antaro sipangka di nagari bisa tahubuang jo organisasi rantaunyo. Walau dengan keterbatasa nan ado, tatap diusahokan apo nan bisa dicubo untuak itu. Tantunyo, statemen nan indak pado tampeknyo takadang mambuek raso ibo dihati, apolai datang dari urang nan saharusnyo labiah patuik mengenal baa sabana dinamisnyo masyarakat minang nan ko. Baa kok bitu? Takadang pabilo kito mancaliak urang di kampuang nan kini bakarajo di sawah jo ladang, nan tampak biaso-biaso sajo layaknyo urang kampuang, setelah duduak sambia maota kian kamari, punyo pengalaman bapuluah tahun diperantauan. Dalam adat jo ugamo, kan lai disabuikan untuak bausaho marubah nasib, tingga tapulang kapado rasaki jo garih hiduik kito masing-masing. Mungkin dek karano umua nan memang alun satahun jaguang, takadang raso latiah manahan hauih jo lapa dibulan puaso, talabiah pulo mambaco statement nan manuruik ambo pribadi marupokan malu nan sabana malu nan indak bisa kito bagi, talonsong kato-kato nan indak pado tampeknyo, mohon kapado angku, mamak, bundo sarato dunsanak sapalanta untuak dibari maaf, sabab nan bana mantun iyo datangnyo dari Allah azza wajalla, nan salah tibo dari diri kito sendiri nan marupokan mahluk nan dhaif ko. wasalam AZ/lk/34th/caniago Kubang, sadang di kampuang babako ka Canduang Koto Laweh, Agam Inyiak Buyuang, salain nan batigo tu, ado 2 lai nan tatingga, mak Pondah jo Munir Pandeka. Maso itu hanyo urang awak nan mamacik dunia abu-abu kota Medan ko. Tantu dimaso mendatang ko ado juo nan manyabuik hal nan sarupo, bisa jadi ambo khilaf untuak manyalak baliak, sabab kurenah mantun manambah sarik karajo sosial nan taruih diansua-ansua bara nan bisa dikaokan badan. -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
