Assalaamu'alaikum wa rahmatullaahi wa barakaatuhu
Babarapo pakan nan lapeh mak Ban bacarito pangalaman baliau ampia kanai copet.
Pakan nan lapeh ado pulo pangalaman ambo ampia kanai gadele alias kanai pangua.
Ambo mamasang iklan ka mangontrak-an rumah di surek kaba Kompas. Ado urang nan
mangecek-an awakno baminaik nak mangontrak rumah tu, dek dakek ka BCA
Kalimalang, sabab padusino dimutasian dari BCA di Bandung ka BCA Kalimalang tu.
Ambo tanyoan alah angku caliak bagai rumah tu. Jano, alah sasuai sajo jo
kaparaluanno.
Batanyolah no pakaro arago. Ambo agiah tahu, diagono saketek. Langsuang pulolah
ambo satuju. Sudah itu, kecekno pulo kadibayiano sakali tando jadi, sapatigo
dari arago sewo kontrak. Dalam ati ambo, iko iyobana serius bana urang ko
komah. Alah ka mambayia DP sabanyak itu sakali, padohal basuo sajo alun jo
ambo. Nan kecekno pulo, duo hari sasudah itu, bararati ari Ahad kapatang awakno
ka datang malunasi harago, sakalian untuak manandotangani surek kontrak. Eh,
iko iyo bana basungguah-sungguah nampakno komah, kecek ambo dalam hati.
Patang hari, awakno manalepon baliak, mangecek-an bahaso pitih alah
ditransferno. Tolonglah caliak, jano. Pailah ambo mancek ka ATM. Rupono alun
ado lai doh. Ambo taleponlah no baliak mangecek-an alun ado pitih tu masuak
lai.
Kecekno pulo, tunggulah sabanta, bialah awakno manalepon ambo baliak sabab
awakno ka mancek ka BCA mananyoan baa mangko pitih alun sampai. Babarapo minik
iyo ditaleponno ambo baliak. Disambuanganno pulo ka Hello BCA, mangecek kami
batigo via talepon. Sabalun tasambuang ka hello BCA tu, ado nada imbau, ado
jawaban masin panjawab dan tarakhir jawaban operator. Angku nan kamanyeo
rumahko mamuloi kecek jo mancaritoan bahaso ano alah mantransfer pitih tapi baa
mangko indak sampai. Kecek patugas BCA, pulo, maaf, memang taditu ado masalah
di kantuano, dek komputer indak on line. Cubolah cek kini baliak, jano.
Ambo masuak pulo lah baliak ka ATM tu. Ambo pareso pulo baliak. Indak ado ciek
juo do. Ambo laporan pulo sarupo itu (kami masih tatap tasambuang di talepon
sajak labiah kurang 10 minik). Batanyo urang BCA tu, apo ambo yakin bahaso
indak ado tambahan saldo. Ambo kecek-an yakin. Batanyo pulono, baraso sado nan
samustino, buliah dicaliakno dari tampekno. Ambo sabuikanlah saldo BCA ambo,
nan memang gunono iyo ka tampek lalulintas pitih sajo. Isino tingga 200,000
rupiah. Kecek angku BCA tu pulo, nampakno iyo bamasalah komputer kami, antah
dek aa kolah. Baa kok awak cubo mantransfer sabagian ka account lain kalau ado,
jano. Kecek ambo, alun curiga bagai laido, jadih tapi kartu ambo tingga di
rumah. Kecekno, ancaklah diambiak kartu itu dulu, samantaro kami cubo mamelok-i
disiko, mancari apo nan salah.
Kecek ambo ka urang nan ka manyeo, sudah sajolah, bialah bisuak sajo ambo
caliak baliak sabab ari alah patang. Mambana-bana no, sabab ano khawatir
pitihno nan alah disetorno ka bank BCA itu indak jaleh dima latakno kini.
Tolonglah dicaliak-an baliak pak, ambo ingin pitihtu alah sabana tasubarang ka
account apak, jano.
Jo niaik elok, sasudah sumbahyang isya, pai pulo ambo baliak ka ATM, dikawani
minantu. Minantu batanyo, apo ambo yakin iko bukan panipuan. Agak badatak juo
ati saketek. Tapi baa pulo jano kamanipu, sabab ano kamangiriman pitih ka ambo.
Tapi jadihlah, ambo paratian bana apo nan kadikarajoanno.
Tibo di ATM ambo hubuangi pulo baliak urang nan ka manyeo rumah tu. Sarupo
tadi, disuruahno pulo ambo manunggu sabanta. Awakno pulo baliak nan manalepon
ka ambo dan dihubuanganno pulo baliak jo hello BCA. Mangecek pulo kami batigo.
Mako disurauhlah ambo mamasuak-an kartu ambo jo operasi saolah-olah ambo ka
mamntransfer pitih malalui account BCA. Nan kecek urang (operator BCA
gaduanganko) ambo ka dibimbiangno malakukan transaksitu nan baitu salasai ka
account ambo ka langsuang masuak pitih nan ka ditransfer.
Disikolah gadele pandiano tu. Disuruah ambo malakukan 'transasksi lain',
manakan transfer antar bank, manakan bank BCA sabagai tujuan. Ambo alah
mambantah, iko kan saolah-olah ambo nan kamantrasfer go, kecek ambo. Indak pak,
jano. Ambo urang BCA, kaambo agiahan kode transfer nan musti apak masuakan,
sudahtu transfer ka account apak ka langsuang tajadi jano. Jadih pulolah, kecek
ambo cubolah agiah ambo kode transfer to, nan musti dimasuak-an katiko masin
batanyo bara jumlah rupiah nan ka dikirim. Dibacoanno angko-angko nan dimuloi
jo 0 sudah tu angko sambilan, sambilan dan lain-lain nan kudian ka manjadi
sarupo 09978765. Sudah itu diagiahno pulo nomor account nan musti diisi katiko
masin mananyoan. Ambo tanyoan, iko nomor sia? Iko nomor apak nan ka mangirim
pitih ka apak, jano.
Stop.
Galadia, ka angku kicuah tagak ambo. Iyo santiang aka angku yo, kecek ambo.
Baranti operasi kami sudah itu.
Kok nyampang, ado nan baurusan agak mirip, baliauko, nan suarono sangaik sopan,
mangecek ba assalamu'alaikum, nan tanyato baniaik indak elok, mako nomor nan
mahubuangi ambo tu adolah 081808152447. Ka ambo mangaku banamo Deni Setiawan.
Co itulah carito kicuah tu.
Wassalamu'alaikum
Lembang Alam
____________________________________________________________________________________
Looking for last minute shopping deals?
Find them fast with Yahoo! Search.
http://tools.search.yahoo.com/newsearch/category.php?category=shopping
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet.
- Tuliskan Nama, Umur & Lokasi anda pada setiap posting.
- Hapus footer & bagian yg tidak perlu, jika melakukan reply.
- Email attachment, DILARANG! Tawarkan kepada yg berminat & kirim melalui jalur
pribadi.
- Posting email besar dari >200KB akan dibanned, sampai yg bersangkutan minta
maaf & menyampaikan komitmen mengikuti peraturan yang berlaku.
===============================================================
Berhenti, kirim email kosong ke: [EMAIL PROTECTED]
Daftarkan email anda pada Google Account di:
https://www.google.com/accounts/NewAccount?hl=id
Agar dapat melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
