‘Deterjen, Sabun Madi dan Odol Naik'. Itulah judul barita surek kaba ‘Singgalang' kapatang. Barita-barita soal naiaknyo harago barang sajak duo bulan ko sabana manjadi paratian dek urang-urang di lapau Uwo Pulin.
Itu wajar, karano naiaknyo harago barang-barang kaparaluan iduik sahari-hari sabana mambuek kasadonyo marano. Pitih saolah-olah indak ado lai haragonyo. Biasonyo pai ka pasa mambao pitih duo puluah limo ribu, lah bisa mambali kaparaluan iduik sahari. Tapi, kini pitih sabanyak itu indak ado apo-aponyo. “Iyo sabana marasai awak kini. Kok lamo-lamo cando iko, bisa mati indak bacirik awak di nagari ko,” kecek Angah Piyan. “Baa, tu?” Tanyo Udin Kuriak. “Baa juo lai, nan ka di makan tu bana indak ado di rumah, karano indak bisa mambali. Sampai bilo awak bisa tahan makan jo samba lado bapalik se? Sampai bilo awak bisa makan indak ba samba? Sampai bilo anak-anak awak tahan indak makan goreang pisang? Sampai bilo pulo anak-anak nan baru lahia indak minum susu? Indak bana susu kaleang nan dibali di pasa, susu induaknyo tu bana nan indak baraie lai, dek ulah indak makan. Kasudahannyo tantu anak-anak di nagari ko busuang lapa, tingga kulik pambaluik tulang, lutuik gadang, mato cakuang,” kato Angah maagiah panjalasan. Kawan-kawannyo nampak maangguak-angguak, tando bisa mamahami jalan pikiran konconyo tu. Memang, naiaknyo harago kaparaluan iduik kini sabana mambuek sansaro urang banyak. “Kini, di barita surek kaba ko, sabun panyasah jo panggosok gigi lah naiak pulo,” sambuang Angah. “Panggosok gigi nan naiak, ambo raso lai masih bisa diakali. Kalau biasonyo awak pakai Pepsodent, Ciptadent atau Delident, mako bisuak ko ganti se jo bantoden nan lai murah,” tibo-tibo Tan Baro manyalo. “Kaluaran pabirik maa pulo bantoden tu, Tan?” Tanyo Uwo Pulin. “Produksi balakang rumah!” jawek Tan Baro singkek. Tapana Uwo mandanga jawek kawannyo. Baputa-puta pangana rang punyo lapau tu dek bapikia. “Batele Tan baro mah. Awak sarius, tapi inyo manggaleme,” kecek Uwo. “Eh, iko indak manggaleme doh. Bantoden tu indak maha gai doh. Malah, indak dibali pun bisa. Tingga maambiak se lai,” baleh Tan Baro. “Apo tu?” “Rumpuik banto! Di kampuang ambo sangkek saisuak, urang manggosok gigi indak pakai odol gai doh. Tapi pakai rumpuik banto atau ado juo pakai sabuik karambia. Nan ambo katokan bantoden tadi adolah banto punyo awak surang-surang. Baitu juo sabun, kalau indak ado sabun harum, pakai sabun panyasah atau samati-mati angin pakai buah kandikia. Indak juo bisa, pakai sabuik. Ijankan daki, kulik pun bisa takulayak dek pakakeh tu mah,” Tan Baro manjalehan sambia galak manih. Talompeklah galak urang salapau tu. Indak tabayang dek nan lain, di zaman kini masih bisa mamakai rumpuik banto untuak panggosok gigi atau sabuik untuak ganti sabun mandi. Tapi baa juo lai, kalau memang harago barang-barang naiak dan indak tabali lai dek masyarakaik, tantu indak kayu janjang dikapiang. Kalau paralu, babaliak ka caro-caro iduik primitif. Espe St.Soeleman (Singgalang OnLine) No virus found in this outgoing message. Checked by AVG Free Edition. Version: 7.5.516 / Virus Database: 269.21.6/1316 - Release Date: 06/03/2008 18:58 --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur & Lokasi anda pada setiap posting. - Hapus footer & bagian yg tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda pada Google Account di: https://www.google.com/accounts/NewAccount?hl=id Agar dapat melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
