Ambo
ba “Minang-Minang”
By
: Jepe
Dalam ba “Minang-minang” ko
tarutamo manyangkuik adapt dan budaya nagari kito kaji ambo yo nan
ringan-ringan sajonyo, kok nan barek-barek tu lai tahu juo ambo saketek
ibaraiknyo alun putuih bana kajinyo dek ambo.Nah kalau segala sesuatu alun
putuih kaji dek ambo, tantunyo ambo agak gamang manyampaikannyo ka urang. Ambo
agak takuik mamakai sabun mode kini nan bamerek Asbun. Alias Asa Babunyi. Kecek
pepatah diam, hantok, haniang tu ameh, mako asbun ko ambo ibaratkan Basi Bakarek.
Tantu sanak lai tahu basi
bakarek, lai laku juo tapi lah murah kok dijua, dek pamuluang jaman jadul di
nagari awak nan tasabuik tukang boto basi bakarek ko inyo bali bakilo sajo lai
basi bakarek ko. Jadi ambo barusaho sakuek tanago kok ado kaji nan alun putuih
dek ambo indak namuah ambo sampaikan ka urang, beko satangah-satangah jadinyo
labiah parahnyo manjurus ka Asbun. Nan paliang
ekstrim parah dan babahayo basi bakarek ko contohnyo paku bakarek, kok cilako
urang dek ambo tainjak paku bakerek ko luko dan bisa kanai tetanus.
Tapi kok ambo maota jo urang nan
gadang ota, bisa lo lah ambo gadang ota dek lai samo-samo asbun, dek lai
samo-samo basi bakarek, tangguang sajo resiko masiang-masiang sia nan ka kanai
tetanus ha..ha..ha.
Jadi ambo baminang-minang ko yo nan
ringan-ringan sajo nan ambo dapek dari mambaco buku adat dan budayo Minangkabau
tu ditambah pangalaman ambo maota-ota dkampuang jo nan tuo-tuo, inyiak-inyiak,
mande-mande, datuak-datuak dan penghulu. Pendalaman lo stek dilapau pakan-pakan
dikampuang mandanga carito masyarakat badarai. Ringan kaji ambo baminang-minang
ko samakin sumangaik ambo kok ado rasonyo nan manggalitiak keingintahuan ambo
nan kadang-kadang sepele nan rasonyo urang agak tacangang ambo iseng sajo
mananyonyo. Apolai manyangkuik pusako kuliner nagari awak nan kayo dan terkenal
lamak, digemari dan dinikmati dek lidah suku lain.
Sebagai contoh katiko ambo pai
baralek kakampuang ambo, manjalang marapulai naik kaateh rumah gadang tagak
dulu dijanjang lalu Mak Tuo ambo bapantun bantuak iko “
“Cubadak tangah laman diculuak jo
ampu kaki…bla..bla..bla”
Iko yo tagalitiak ambo
mandanganyo, yo penasaran ambo mah “Nggak sopan amat ya dijuluak jo ampu
kaki..sama tangan ngapa”. Penasaran jaan dibawok mati, arwah penasaran tu
bergentayangan bantuak pilem suzana jadul..he..he ingek taruih ambo joke dari
kawan sakolah ambo ko.. Lah usai alek ko sambia mangalai-ngalai diateh rumah
gadang sambia mamakan kue kampuang nan lamak-lamak, ambo batanyo ka Mak Tuo
ambo “baa kok cubadak tu dijuluak jo ampu kaki” urang nan bakumpua diateh rumah
gadang tu tapurangah, salamo ko lah puluhan kali pantun manyambuik marapulai ko
diulang-ulang indak ado nan batanyo bantuak itu.
Mak Tuo ambo manjalehkan dialam
yo ado cubadak nan tumbuah randah diateh saketek ditanah jadi manjatuahkannyo
jo ampu kaki sajo ditunja. Ambo caliak faktanyo dialam yo bantuak itu mah nan
cubadak ko yo babuah banyak nan randah diateh tanah saketek sajo. Iyolo
mah “The Great Job ..Karajo nan hebat
mah Mak Tuo yo sabana efesien, efektif dan hemat energi,
Hemat energi atau tanagonyo tantu
awak sadang tagak tanago ko full manghantam cubadak tu jo ampu kaki bia lareh,
cubo bandingkan ko marunduak lo awak, apolai nan awak sadang sakik pinggang jo
rematik tantu samakin payah awak marunduak, lalu awak puta lo jo tangan cibadak
ko ambo raso labiah banyak energi nan tabuang dari pado sadang tagak dihantam
jo ampu jari.
Disikolah ambo caliak falsafah
nagari awak “Alam Takambang Jadi Guru” nan arif mambuek awak bapikia logis,
realistis dan masuak aka, contoh lain kok bulek lah bisa digolongkan atau nan
bulek ko tantu lancar digolongkan dari pado dilayangkan. Di Alam cubo ambiak
batu nan bulek golongkanlah katanah nan data tantu labiah “smooth” inyo
bagalindiang, iko dapek dipahami jo ilmu Fisika nan awak pelajari disakolah
dulu dek permukaan batu nan bulek ko titik singguamg katanah permukaannyo ketek
sajo tantu gaya gesekannyo ketek pulo, Jiko vector gaya dorong maju kamuko bola
manggalindiang ko gadang, samantaro gaya gesekan vector kabalakang nan ketek
bana tantu resultannyo gadang bana daya dorong ka muko alias batu bulek ko kancang
manggalindiang.
Banyak contoh lain jiko ambo
sabuikan nan alam ko manjadi guru, dari alam awak banyak baraja nan kuaso lah matur alam ko sedemikian rupa
agar segala sesuatu bergerak sebagaimana mestinyo, tapi awak manusia ko nan
marusak nan mambuek sang Khalik berang sahinggo alam tu sorang nan manghukum
awak.
Baliak ka kaji baminang-minang ambo nan ringan
dan menggelitik keingin dalam tahuan ambo jo adat budayo nagari kito ambo dapek
pengetahuan di buku nan ambo baco tu dari
diskusi-diskusi sanak disiko nan labiah “teknis” atau dalam kajinyo ditambah
carito Ibu ambo, tantunyo ambo baliakan ka alam nan takambang nan bisa jadi
guru nan indak pernah gadang ota (bohong), lalu akhirnyo ambo mancubo baliakan
ka Al Qur’an dan Sunnah Rasul nan
kebanyakan ambo dari mambaco baco, danga dan pahami dari sanak-sanak nan dalam
juo kajinyo dan juo pengalaman iduik salamo ko.
Akhir kato dari ambo, kok naik ambo kateh rumah gadang
nan sadang indak baurang tantu ndak ado nan katalantuang dan tasipak urang dek
ambo, tapi ambo dek naik karumah gadang (baca :Milist PPSP dan RN) nan rami
tantu kanaik ado nan talantuang, kok ka turun ado nan tasipak dek ambo, maklumlah ambo candu
manonton dan bakomen bola, tapi kok
disuruah bana ka galanggang indak bola nan ambo sipak tapi bisa jadi urang nan
kanai sipak.Jampang kok ado pulo kecek nan talonsong nan indak pado tampeknyo
talabiah takurang , yo ambo mohon mo’oh
sajo dipabanyak. Mo’oh yo sadonyo.
Pku, Manjalang lalok (22.00 WIB 4 Des ’08)
