BK (10) : Petak Sampelo Basigageh Buyuang Koboy kapasa mancari si Upiak Leba, konco palangkinnyo, tapi ibaraik co kuciang sanang ka mancik sarok, ka dimakan takuik badan manjadi sambok, kadipabiaan aiii manambah parangainyo puloh, ka ditinggakan jo sia awak bakaja-kajaan, agak coga gaya Buyuang kini pakai baju jaih bagarih warna krem bagai, co bintang pilem 'tahun katumba' nampak di urang, bia agak lusuah nan pantiang lasuah, a lah pangana Buyuang kini basigageh bana mancari si Upiak. Dicaliak Petak Galeh Upiak nan disampiang janjang gudang kanaaik, tampek Upiak mangaleh, bilo diukua lawehnyo ciek satangah kali duo meter, alah pakai merek pulo kini, 'ah ado bendera pulo warna putiah pucek tagayuik, si Upiak sadang basanda co urang baru mandapek 'BT'. Di bae langsuang dek Buyuang Buyuang Koboy Upiak...Ebaik Kau kiniko, mangko ari urang sadang basitungkeh mancari 'peak', Kau 'malepok' duduak basanda co urang di Lapau minum pagi nampak di Uaden, indak taraso ge mintuo lalu... Upiak Leba Oi...Tuan...dari ma Tuan..., manga Tuan tagageh, jarang-jarang Tuan lewaik siko langsuang ka petak galeh Ambo. Buyuang Koboy Kau bana nan Uaden cari mah, Uaden ka minta 'PeSe' ka Kau Piak... Upiak Leba PeSe a loh du Tuan, jaso Tuan a nan Ambo pakai, ko kanai 'pantik' lo Ambo Buyuang Koboy Indak ingek Kau sarano, nan Kau ka ikuik pulo sato batuka baju kauih tiok sabanta tu, patang Uaden caliak Kau alah pakai kauih Itam pakek, patang cek lai Kau pakai Ijau taruang dari ma lo Kau dapek pangana ko indak dari Uaden, di hetong bara tu Kau aruih mambayia dek alah di tunjuakkan jalan. Baa kicek urang kini Konsultan nan bayianyo maha tu mah, nan karajonya maagiah urang nasiaik. Upiak Leba Eii.. Tuan coitu mennyo pakai PeSe, indak Tuan kicekan Ambo katahu jonyo Buyuang Koboy Eppp.. Uaden sorakkan bekoh ka galanggang rami baa..gak ati.. Upaik Leba (Sambia maingkek langan) Oiiiet, Ambo sorak-an lo Tuan...baa indaknyo di Tuan, bapilin-pilin ge awak jadih di Ambo.. Buyuang Koboy Onde-onde Upiak saba...., saba, jan pambangih co itu , jadi malah, aniang Uaden, indak ado PeSe, 'aaa.., baa ko maleh-maleh men Kau magaleh kini Piak. Bamerek gai Petak Kau kini, tambah ado bandera putiah pucek bagambar 'Sampelo Taleak' tu. Mereknyo agoah...Pos Pengaduan Petak Sampelo. Sampelo Taleak itu tu kan kalompok nan ka ikuik pamilihan wakia pasa bisuak Piak, alah batuka loh kauih kau kini liak yo.. Upiak Leba.. Ssst..,kini Tuan nan tanang dih..bia Ambo caritokan. Tahu Tuan ndak baa ko Ambo latakkan merek jo bandera tu di Petak Ambo ko, Ambo dapek limo piah, labiah gadang dari ganti mangganti kauih nan anyo ciek piah nan Tuan karajokan tuh. Sia nan maagaiah gadang, Ambo tuka lo lai, saminggu lai lah ado pulo nan mancater, limo piah tambah jo tilakuang sumbayang, bara lasuah nyo tuh di Tuan Buyuang Koboy. Namuah se Kau tu Upiak, untuak Sumbayang kau pakai Tilakuang dari mandapekan caro co itu, patuik lah maleh kau mangelah kini yo, 'mangalasau' men di pabanyak.. Upiak Leba Dek Tarago, kaba'a jo di Tuan li, Tilakuang tu indak ka Ambo pakai surang doh, tapi ka Ambo latakan di Surang Simpang , pakai basamo-samo, kan ebaik di Tuan tu ah.. Buyuang Koboy Ebaik bagai manah, sumbarang dikau lah Piak, baa nan kicek Kau se lah. Ma PeSe Uaden itu nan jaleh kini... Upiak Leba.. PeSe a... jo lai di Tuan, kan lah Ambo jalehkan.. Buyuang Koboy.. Itu nan tadi, nan kini PeSe 'tutuik muluik', kalau indak Uaden sorakkan karajo Kau mangaleh Merek di petakko kini... Upiak Leba.. Jan...jan Tuan... jan disorakkan...Iyolah Ambo agaih 'Wang Danga' ka Tuan, tapi jan kiceka-an ka urang ndak, Ambo alun tarimo peak dari nan punyo Merek tu lai...minggu katibo pulo cek nyooo Buyuang Koboy Oiii...Alai... DYEK Jakarta, 100108
--~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
