Waalaikumsalam w.w. Sanak Fitr Tanjuang dan para sanak sa palanta, Dari tinjauan ilmu politik, masyarakat banyak ko tabagi dalam duo bagian gadang, nan dinamokan elite nan jumlahnyo saketek, dan massa, nan jumlahnyo gadang. Kakuatan politik talatak di tangan elite, karano disitulah bakumpuanyo pitih, kakuasaan, koneksi, kamampuan manajemen, dan juo kaahlian manyusun strategi, taktik, dan teknik baorganisasi.Baa juo dima kakuasaan banyak, di sinan pitih banyak, dan sabaliaknyo dima pitih banyak ka sinan pulo malakoknyo kakuasaan. Di ma duduaknyo massa ? Massa ko hanyo bondong aia bondong dadak sajo, kama angin kareh ka sinan inyo pai, karano umumnyo massa indak punyo punyo pimpinan, dan indak punyo struktur, dan indak punyo kakuasaan sarato indak punyo pitih, hampia saroman jo itiak pulang patang, ikuik sia nan bajalan dimuko. Baa urang awak ? Indak usah dibuktikan bana, urang awak ko labiah banyak marupokan massa sajo, jarang nan mamacik tampuak pimpinan sabagai elite nan manantukan nasib bangso. Lapisan elite biasonyo dipacik dek urang Jawa, disusul kini dek urang Batak (!), urang Palembang, atau kini urang Bugih. Urang awak nan dahulu jadi elite, antaro tahun 1945 -1955, adolah urang Minang istimewa, produk dari suatu kurun sejarah nan istimewa, generasi 1920-an. Sasudah tu, maluncua taruih manaruih, sampai kini. Baa mako sampai baitu urang awak ko ? Kalau kito pikia-pikia, mungkin karano budaya Minangkabau indak punyo konsep kekuasaan, 'egalitarian' kato pak Muchtar Naim, nan biasonyo jadi kebanggaan kito. Salain itu urang awak indak pulo basalero bana ka kekuasaan jo kekayaan, tapi bangga kalau diagiah sapiriang duo piriang kekuasaan dan kekuasaan dek nan bakuaso, misalnyo diangkek jadi mantari. Cito-cito urang awak kan paliang tinggi jadi mantari sajo, kan? [Apo indak paralu ditinjau baliak apo nan kito banggakan ko? Egaliter, tapi hanyo bak pasia ditapi lauik, indak ado apo-aponyo]. Urang awak juo indak suko baorganisasi nan punyo pimpinan, kalau baorganisasi, indak banyak nan amuah baiyo bana bakarajo sacaro badisipilin, banyak nan 'angguak anggak dalam duo tangah tigo, unjuak nan indak babarikan', 'papek di lua runciang di dalam', 'suko manembak di ateh kudo', 'indak baluluak maambiak cikaurau'. Mungkin itulah sababnyo organisasi urang awak ko indak ado nan kuwaik. Jadi baa dalam kompetisi politik kini ? Kito kan samacam manunggu 'rimah-rimah politik' sajo, mudah-mudahan ado urang awak nan diangkek jadi mantari,atau dirjen, dan nan samacam tu. Atau sekedar ikuik bangga, karano nan sadang bakuaso tu adolah 'urang sumando' awak. Indak ado samo sakali jejaring (network) urang awak nan operasional dan saliang mandukuang untuak maju, saroman 'dalihan na tolu' di urang Batak. Saparati kito liek, tautamo dalam babarapo tahun balakangan ko, kalau ado surang sajo urang Batak di suatu tampek, dalam wakatu singkek inyo akan batambah manuruik deret ukur, karano tiok urang Batak diharuihkan dek adatnyo untuk mahelo duo orang Batak lain nan bakaik margo jo inyo sabagai marga hula-hula dan marga boru. Di awak, susunan sarupo indak ado. Sacaro pribadi ambo mandapek kesan bahaso dari segi tatanan bamasyarakat adat Minang memang indak dirancang untuak mampasatukan urang Minang, apolagi untuak saliang tolong manolong, saroman nan dilakukan dek urang Batak. Kito diaja untuak bapikia dalam ukuran mikro, saparati dapek dilek dalam pepoatah 'Adat salingka nagari'. Pangalaman ambo 'baminang-minang' sajak tahun 1966 -- 43 tahun -- sabana susah bana mampasatukan urang awak ko. Hampia samo jo susahnyo mampasatukan urang Arab. Kalau ado urang awak ko maju dalam karier, biasonyo adolah karano usaho surang-surang, indak ado bantuan terstruktur dari urang Minang lainnyo. Baru kalau alah berhasil, rami-rami kito mangatokan: 'inyo tu urang awak mah'. Baa kalau gagal ? Sampai rangik indak ado nan kamanyapo doh, baitu bana kaadaannyo. Budaya urang Cino -- nan mampunyoi akar dalam ajaran Kong Hu-Cu -- sangaik mamantiangkan hubungan kekeluargaan suku/clan, nan kalau ambo indak salah disabuik she. Di dalam she ko, ado hubungan struktural nan ketat antaro kakak-adiak, nenek moyang- bapak ibu - dan anak. Caliaklah film-film Kungfu. Nan khusus adolah urang Yahudi, walaupun manganuik adat matrilineal sarupo urang awak, tapi sabana kuaik persaudaraannyo, walaupun alah batebaran di saluruah muko bumi. Baa mako baitu ? Iko paralu kito palajari. Nampak dek ambo -- antaro lain -- karano adat matrilineal urang Minang dikaikkan jo bidang pertanian sajo, dan dilimbagokan dalam harato pusako tinggo sarato jo sistem waris mawaris dan silang sangketo nan takaik jo itu. Karano katurunan samakin banyak sadangkan tanah sagitu ka sagitu juo, mako makin batambah tahun makin batambah silang sangkeko. Nampaknyo di urang Yahudi indak baitu. Bukan tanah dan harato pusako tinggi nan mereka pentingkan, tapi kualitas sumber daya manusianyo. Mereka mamiliah karier dalam bidang industri dan perdagangan, keuangan dan perbankan, sarato musik, media massa, filsafat, ilmu pengetahuan dan teknologi. Salamo ko jarang mereka nan bergerak di bidang pertanian nan baru mereka tangani sasudah tabantuak negara Israel dalam tahun 1948. Jadi baa lai ? Manuruik pandapek ambo, salamo kito alah pueh diri jo 'adaik lamo pusako usang' sajo, indak amuah maadokan kaji ulang dima posisi kito dalam abaik ka 21 nan sabana kancang parubahannyo dek ilmu pengetahuan jo teknologi, dan indak amuah pulo mambuek tarobosan dari kabuntuan nan ado salamo ko, jan bamimpi bisa masuak jadi elite Indonesia ko jo kakuatan sandiri. Kalau maju surang-surang tantu bisa, dan alah banyak dilakukan dek urang awak. Hanyo hasilnyo adolah sampai tingkek mantari jo eselon satu sajo.[Pak Hatta jadi wapres itu suatu pengecualian.] Ringkasnyo, kalau kalompok-kalompok suku bangso Indonesia lainnyo -- saparati Jawa, Batak, Palembang, Bugih, atau Cino -- punyo tatanan organisasi nan ketat dan sacaro basamo-samo maatur strategi dan taktik untuak marabuik kakuasaan di lapisan elite, urang awak sabana nyaman hiduik di tataran massa sajo, sambia manunggu 'rimah-rimah kakuasaan' nan diagiahkan urang lain ka urang awak sacaro perseorangan. Kalau memang itu nan kito inginkan, keadaan kini alah sasuai tumah jo sistem nilai dan struktur sosial kitu. A juo lai. Talabiah takurang mohon maaf. Wassalam, Saafroedin Bahar (L, masuk 72 th, Jakarta)
--- On Thu, 5/21/09, Fitr Tanjuang <fitr.tanju...@gmail.com> wrote: From: Fitr Tanjuang <fitr.tanju...@gmail.com> Subject: [...@ntau-net] Re: Tentang Gamawan Fauzi To: RantauNet@googlegroups.com Date: Thursday, May 21, 2009, 4:27 AM AslmWrWb Mak Saaf, di milis lain nan ambo ikuti, adoh analisa model iko. Baso nan manantukan sia nan ka manang pemilu ko indak awak2 nan rakyat badarai ko doh. Tapi kelompok2 minoritas nan solid sarato ciek suaro. Logikanyo, kalau rakyat badarai ko suaronyo iyo badarai2 ka saluruah calon, sadang kelompok iko suaronyo taarah. Misalnyo adoh 170juta pemilih sadang 150juta pacah 3 masiang2 50juta. Kalau kelompok ko bisa ciek suaro walaupun jumlahnyo hanyo 10j, inyo bisa jadi penentu sia nan ka manang. Kok kito liek lobi yahudi di USA, iyo bana pulo rasonyo. Hanyo sajo ambo baru mandanga kalau ruponyo adoh pulo di nagari kito. Kelompok tu minimal adoh 4, 1. pengusaha peranakan Cino jo penguasaan ekonominyo 2. kelompok NU nan taat ka kiyainyo 3. PKS nan militan ka ustadznyo 4. PDS jo kelompok kristennyo. Tapi NU lah bakurang pengaruhnyo dek lah pacah (atau dipacah dek Gus Dur). PDS pun alun nampak bana kekuatannyo doh. Jadi tingga kelompok 1 jo 3. Nah, Sofyan Wanandi lah mendukung JK, sadang PKS ka SBY. Baa tu manuruik mak Saaf. Iyo bana analisa tu? Cieklai, urang Minang indak masuak etongan doh, dek suaronyo indak bisa disatukan. Caliak se lah milis ko...:) Wassalam fitr tanjuang lk/34/Albany NY On 5/19/09, Dr.Saafroedin BAHAR <saaf10...@yahoo.com> wrote: --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---