Da JP
Lai baurak selo uda dek dendang ko ruponyo. Tabayang dek ambo, ma hao
angek Pakanbaru, sasak AC mambunuah panehnyo, nan kompor di tangan
indaklah lupo. Kok lai talakik, Januari ko badan mahampia ka Pakan,
dibukak lapak, di hampa lapiak sambia manikam jajak.
Bilah ambo kirim pantun ciek, digeso tali rabab tuo. Sairiang jo iruik
kopi paik, manggabubu aso tambakau nomor sambilan.
Lah tacelak Muko-Muko di Bangkahulu
Manembak Inggrih di tabek suku
Lah tampak mungko ambo dahulu
Sabak tangih dek tasakek rindu
Sikaduduak tumbuah manjelo
Salo-manyalo jo Bungo Kincuang
Asam bapaga rono kayu surian
Duduak nan indak maradeso
Raso bacinto kanai pancuang
Tasansam kironyo dek kenangan
Salamaik malukah bisuak da
Salam
andiko sutan mancayo
jupardi andi wrote:
Andiko Sutan Mancayo dan dunsanak palanta RN
mambaco dendang kuliner nan sutan nyanikan, iyo malayang pikiran ambo
di tahun 1990, tapaso badan diri ko raso masuak baliak bapulun-pulun
diterowongan waktu, katiko masih bujang sabana palala, indak ka dunia2
dugem, indak ka dunia gonjang ganjing diskotik jo mabuak2an pai malala
tapi suko pai malala ka kampuang2 lai juo ado tawaran karajo nan
daerahnyo dakek pasia jo gununang padalaman ambo tampin pantang mailak
dek ambo, di Muko2 katiko tu ambo, kok lah si gulai anak hiu sutan
dendangkan, iyo takana One tampek ambo tingga dimuko2 tampek ambo
barumah lah sarupo badunsanak jo one dan abah baitu ambo panggia laki
one ko, One sabana santiang mambuek samba2 buruak ala urang pasia
sabana lapeh salero buruak ambo jo One ko, racikan bumbu serba alami
dan manual pantang pakai masin atau alat2 elektronik dalam manggiliang
dan maramu bumbu, baitu juo dapuanyo dibalakang rumah pakak dek asok
manggabubu dek kayu api untuak mamasak, dapua nan tagantuang
balango-balango nan ikuanyo lah itam dijilek api, disinan pangek jo
gulai dimasak, tanah liek balango ko yolah manyatu jo sagalo harum
bumbu nan sutan dendangkan ko
Si Gulai ikan hiu aia bangih nan sutan dendangkan sarupo bana nan
dibuek one, iyo baduan pucuak sikaduduak ambo bana kadang2 pai
maambiaknyo di samak2, kok lah babuah sikaduduak jo buahnyo baraia co
tinta pena ramilah si buruang punai inggok, lalu gulai ko balado ketek
mangapuang kalau suko bisa juo ditambahkan asam durian atau tempoyak
kecek urang palembang/bengkulu, bisa juo jo daun kincuang sigulai anak
hiu ko, kalau ndak ado anak ikan hiu biasonyo jo ikan gaguak kok
sadang musim yo agak sabalah mato nelayan mancaliaknyo, batundoan jo
kaki sajo ikan ko, ambiak sajolah bara ka diagiah pambali isok yuang,
kecek nelayan katiko maambiak ikan gaguak.
Gulai ikan hiu badaun sikaduduak asam durian lakek tangan one yo ndak
ka ambo lupokan, taragak ambo indak pai ka muko2 tu
Oiii Sutan Mancayo..kalukan pantun ciek buek ambo nan ado kato2 (Muko2
One< anak hiu, gaguak, jo daun si kaduduak)
kalau ndak sutan balakukan kandak ambo, mako badan diri nan masuak
terowongan waktu indak kalua2 ka jaman kini :)
Wass_jepe
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
