Andiko ....andiko ......iyo bana padek dendang kuliner siang ko, kalau indak
taguah iman di dado, bisa bata puaso dibueknyo. Dibaco dibarih partamo,
"Seri Dendang Kuliner X : Katupek Gulai Paku" nan tabaco. Dibaco taruih ka
alinea partamo, saraso ingin mandanga kaset dan VCD nan dibali di Tanama
Rekor tu. Dek kami di rantau, tantu indak samudah dan sakumplit itu koleksi
kaset dan VCD nyo. Sasudah itu, tabik hati nak manaruihkan mambaco Dendang
Kuliner ko pado alinea kaduo, katigo dan sataruihnyo sampai habih. Tibo di
manjalehkan Gulai Paku jo kaluak paku kacang balimbiang itu, tabik
salero...turun naiak jakun2 dibueknyo...astaghfirullah.....kironyo babuko
masih lamo lai ....ampek jam satangah lai.
Taruihlah Andiko bacarito di seri Dendang Kuliner nan ka XI dengan topik dan
samba nan labiah tradisionil dan spesifik lagi.
Wassalam,
HM Dt. Marah Bangso (53-)
----- Original Message -----
From: "andikoGmail" <[email protected]>
To: <[email protected]>
Sent: Thursday, February 04, 2010 12:14 PM
Subject: [...@ntau-net] Seri Dendang Kuliner X : Katupek Gulai Paku
Seri Dendang Kuliner X : Katupek Gulai Paku
Malakik barangkek, diadokkan bendi ka tangah pasa raya Padang. Masih
baserak sagalo bangkalai, lauik rang Piaman nan marentak. Tapi dek kaba
baiak bahimbauan, kaba buruak bahamburan, saciok bak ayam, sadanciang bak
basi, lah bahapuih sagalo tangih, lah mulai kariang tanah pakuburan, mulai
di pancang tonggak ruko, mulai ditumbuk sagalo cabiak, alah mulai pulo
badanguang kumbali pasa raya nangko. Tapek di mungko Tanama Rekor rem
badacik, sakatiko tagak mahambuah, mancari Rabab Galuak pasan Ajo Suryadi.
Balirik sagalo kaset, timpo batimpo jo VCD, basusun salauang klasik,
batimba jo sagalo rabab, manyolo pulo dendang pauah, ikuik manyarato
salawat dulang. Yo nan ambo binjek, Dendang Pauah Pasan Karantau, Rabab
Piaman Raun Subalik, ndak namuah tingga Rabab Pasisie nan bacarito tentang
Gampo di Ranah Minang.
Sajuak sakatiko, dek barek sipatu supir, basigageh bendi manuju bandara,
tagageh sampai dipintu, sakilek urusan salasai, alah maronggok pulo di
lapau Garudo ko. Dilatakkan sagalo pokok galeh, kaki taayun ka susunan
jamba. Tapek disabalah suok, manonggok pariuak modern, ba listirik baru ka
iduik, dari Agam tanago bakirim. Disinan badan tasintak, sakatiko salero
tabik, gulai paku malah kironyo. Kuahnyo janiah-janiah tangguang, mandi
bamandi si pucuak paku, iyo sabana datang nyo untuang, nan tacinto bana
nan batamu. Kok pakunyo tinaman mulo, tanaman purba balinteh zaman. Hijau
bakaluak badan diri, tagak nan tageh di tapi tabiang, disinan mangkonyo
lahia kato sati,
kaluak paku kacang balimbiang,
tampuruang lenggang-lenggokkan,
anak di pangku kamanakan di bimbiang,
urang kampauang di patenggangkan,
tenggang ka usah ka binaso.
Baitu bana pasan nan takanduang, di tiok kaluak si bungo paku.
Sahampia dari gulai paku, tasusun rancak si katupek nan bakabuang ampek.
Bahabih hari bareh di abuih, babju jo puncuak ruyuang nan sati. Asakan
katupek lai manjadi, bialah rila pucuak ndak kajadi daun. Baitu juo si
bareh Solok, bananti sajo galagak ayia, bapiciangkan mato mancaliak api,
di balango tanah badan diabuih, ruok nan maimbau dagang lalu. Sakatiko
katupek basusun, datang manyiram kuah gulai paku, putiah nan indak
tagantikan, elok basandiang jo kuniang kuah gulai. Paku nan bak hiasan,
ukiran wajib rumah gadang.
Kok rasonyo, antahlah apo kadisabuik, tapajam mato sakatiko, katiko sendok
partamo masuak muncuang, mailia kuah ka salo lidah, mamakiak rangkungan
mamintak sato, tapi dek lamak baru jatuah, batahan sajo niek gigi nan
kamangunyah. Balamo-lamo di dalam muluik, baisok bana sagalo pati, pati
raso nan sarik basuo, apokah lai di parantauan.
Sakitu dulu dendang di baco, dek urang alah maimbau, nan kapa alah maraok,
kalauik sati rantau batuah, kok rasaki lai ka maungkok, tajalang juo ranah
bundo, tasilau juo sagalo dunsanak, bajinguak juo tapian tampek mandi.
Salam
Andiko Sutan Mancayo
--
.
Posting yg berasal dari Palanta RantauNet ini, jika dipublikasikan
ditempat lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi; 3.
One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
