Da Jepe jo Sanak Palanta
Sakatiko sampai di mungko kantua, babukak sakali kompor tuo, mancigin
lalu balasan, balasan jauah dari Kota Pinang. Kok kota pinang ka dibaco,
tampek Inggirih panah singgah, kasinan Tuanku Lelo ma ayun padang,
malendo sagalo tibo, bacarai anak jo bapo, banyaklah gadih manjadi
rando. Dek napasu manjadi rajo, abih di pangkeh dek Ulando.
Bana nan uda sampaikan, indak denai harok kepeang benggo, tapi cinto
baracun nan ka mambunuah, dek itu bagesek juo si rabab tuo, naknyo di
ganjua juo sagalo rantau, usah manjadi si rantau Cino. Samantangpun dek
pandainyo urang dapua, bakawan tempe nan jo randang, baralah ka
lamaknyo, nan badan iyo babeso, indak ka kuniang deknyo kunik, indak ka
merah deknyo sago. Disinan mangko mambatuak si Karakatau, bacarai malah
Andaleh jo tanah Jao, indaklah ka mungkin raso padu, bak urang Pauah jo
urang Padang, ba lego Pagai malah jadinyo. Makonyo tabik buku Lampuang
Karam, buku ajo dari ulando.
Tipak di badan ambo, dek kasiah ombak, ta titi riak ka subarang, tibolah
badan di tanah tapi, disinan tagak Emma Haven, Taluak Bayua caro kini.
Salamaik si biduak pincalang, salamaik dari parau baracuang, tacaliak
juo ranah bundo, tasapo juo handai to taulan, di sauak aia dimandian
diri, di tapian tampek mandi, jauah di kaki Gunuang Marapi.
Kok lai pulo kasian riak jo ombak, tatampuah pulo ranah urang Malayu,
salamaik badan dari bono, mailia pincalang di sungai Siak. Disinan
batamu dusanak kanduang, nan babendi bugih hitam. Nak ditampuah kadai
tuo, tampek katupek ba gulai paku. Mandaki sangek sagalo padeh, mati
dibunuah teh paik jalang, baitu bana pasan mandeh, usahlah lupo jo
tampek pulang.
Kalaulah matoari lai sayang, talakik pulo kito bakuliliang nagari,
Piaman ba pantai Gondoriah, lapeh ka Gasan badampiang Tiku, lakeh
mandaki ka Matua, disinan Maninjau kito lewati, manurun ka Sungai
Jariang, tibo di ngarai kito mandaki, taparogok jo Bukittinggi, mahampia
tanah Palupuah, urang kayo nan tingga disinan, nan punyo Bank Nasional
di tanah Jao. Tibo pulo bendi di Kumpulan, manurun ka Malampah Ladang
Panjang, sakatiko tatumbuak di Padang Sawah, Kinali alah tibo pulo,
Simpang Ampek Koto Sibadaguang, luruihlah jalan ka Muaro Kiawai, kito
sapo malah si Ayia Bangih. Baitu pulo Talu koto kenangan, ba rimbo Panti
mangko Lubuak Sikapiang. Antahlah bilo rasaki ka manjalang.
Sakitu dulu da
Salam
Andiko Sutan Mancayo
[email protected] wrote:
Andiko dan Sanak Palanta
Ndee yo raso barubek mambaco dendang Sutan ko, alah babarapo hari ambo ndak mancohgok di
palanta ko, dek utak sadang "angek" paralu fokus dan kosentrasi manyalasaikan
karajo
Dari Kota Pinang ko, katiko lah agak dingin utak, lah makan siang pulo, sambia mairuik kopi angek sadaguak2 di baco juo pakiriman sutan nan mambuek hati jo jantuang amvo ramuak, ramuak dek iri Sutan lah bakuliliang ka ranah
Sabana sero karajo bantuak iko, pitih dapek, tapi candu lapeh cuo, candu cinto
ka ranah tampek mandian, candu ka kesenian tradisi, candu ka alam ranah nan
elok mulai dari pasisia pantai sampai ka gunuang
Nah ikonyo candu nan sabana candu kalau lah baurusan jo los lambuang, ndak do
lai..lai indak jo lagu Sutan Batawi Andiko, walau rantau di Jawa lai indak
lamak juo Randang dari pado tempe, kok cakak nan alun babaleh di rantau bialah
samantaro co itu
Tapi lah tibo di ranah babaleh sakali cakak ko jo masakan dan jajanan pusako
Bundo
Foto nan dilapeh ka lapau saiber ko lah ambo sigi, nan dendang jaan ditanyo..manggarumeh
ambo deknyo, raso ambo mairingan langkah sutan satiok lapau nan disinggahinyo, raso kulek
badendang lo lidah jo garaman ambo kok Sutan malapeh salero di Ranah hanyo dek mambaco
Dendang Kuliner sutan nan "bapiuah-piuah" ndak panyakik nan ka mambunuah sutan
do, tapi mati juo sutan ditikam raso jo samba2 buruak pusako Bundo
Sajak kaki sutan dari Batawi mainjak ranah minang Bajadi bana Sutan mahawo kami
di lapau saiber ko mah :)
Tabayang bana baa lah bagilintin dasuih mandasuih lidah Sutan manyantuang
katupek gulai paku tu, raso ado nan taicia kuah di ujuang bibia Sutan tu
nampaknyo dek ambo dek sakiang bajadi bana kulek lidah, marasoi si gulai paku
Kok ka Pekanbaru molah awak cubo pulo katupek gulai paku di muko masajik An Nur, padehnyo
sabana "mambunuah"..matinyo padeh yo kito tulak sajo jo aia the angek pirang :)
Kok bakaringek ubun2 kito dek padehnyo ko, jaan lupo baok handuak ketek sitokar
kaliang ndak talok jo tisue do Sutan Mancayo oiii
Oke lah kalo begitu
Ambo tunggu Sutan di Pekanbaru..kok lai babelok ka rantau bumi lancang kuniang
ko, bia wak kambangkan juo lapiak buruak sambia manggesek sirabab tuo
tampuruang, ndak benggo urang nan awak harok tacampak ka lapiak buruak nan awak
kambang, tapi nan awak harok hanyolah generasi mudo minang satinggi2 teknologi
jaman kini dengan budaya pop dengan segala kemodernannagari lua, ndaknyo jaan
lupo jo seni tradisi, kuliner, adat dan budayo Ranah Minang
Salamaik tibo baliak di Batawi, Andiko
Tatap Sutan Mancayo salamonyo..jaan barubah manjadi Sutan Batawi
Salam-Jepe
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
