*Seri Dendang Kuliner XII : Dendeng Batokok RM Mintuo *
Lubuak Salasiah di Ranah Solok Balam jambi baok ka Limau Lunggo Tarantuak kasiah di bao lalok Didalam mimpi kok lai basuo Sanak palanta, Di kelok lapeh lubuak salasih, baru salasai cevrolet lamo mandanguih, datang manyambuik rimbo pinus, bajambatan ketek antaronyo. Pinus tagak semba manyemba, bagulasau angin mamintehnyo. Dipiuah stiur ka kida, datang mabaleh nan suok, di sinan tatagak cevrolet tuo, tagak tatumbuak dipintu lapau nasi. Lapau banamu lapau mintuo. Kok lah sanak sempat singgah, singgah malakik rambang patang, dingin manjala dari puncak pinus, manggulasau lapa ka lambuang tangah, barantilah sajuak dilapau mintuo. Sungguahpun lapau banamo lapau mintuo, tasingguang jamba, tabayia juo. Tapi bialah sanak, dek lamak gatok ubi dililih, balepoh pulo lado salayang, bialah saku dikaruaknyo. Baru sajo sanak duduak, diadok meja tuo nan dimakan zaman, datang jamba nan basususun, susun rancak ibaraik siriah di carano. Tapi ciek nan ka dibaco, yo pokok galeh kapalo jamba, samba lamak banamo dendeng batokok, batokok raso-roso ka bacarai, bacarai urek nan jo dagiang, raso ndak ka baelo mamutuihnyo, cukuik untuak gaek indak bagigi. Dendeang yo sabana taba, ba habih minyak dagiang diabuih, lambuik manjalang malakik gacah, disinan datang si batu lado. Tokok nan bantuak bangih-bangih sayang, “gemes” cari jaonyo, tokok nan indak ma maramuakkan cukuik pauruik badan nan leno. Nan dagiang dagiang santiang, kabau bujang nan barabahkan. Kabau sati garih si binuang, sumpah nan ka ma maradeso si cucu adam. Dimalah harum indak ka manggilo, bagulimang bawang putiah malah salayang. Bawang nan tibo manantang galombang, malinteh malaka nan ba parompak bugih. Manyabuang nyao mualim kapa, asa lai sampai ka ranah bundo. Nan asamnyo, batarak ka gunuang Pasaman, batapa ka gunuang Sago, asa lai rareh si limau tujuah rupo, tumbuah sabatang di tapi jurang, bacakak jo sagalo dewo dewi, disinan raso mangko ka sampai. Asam nan indak ka mamadiahkan, hinggo mambuek lidah manari, janiah-janiah si ayia ludah. Alah langkok sagalo adaik dagiang, disinan lado mudo ratak mananti. Lado nan bukan lado sumbarangan, lado santiang di sawah kagadangan. Asa lai raso ka samparono, bialah badan di ambiak mudo, sungguhpun indak ka rela tampuak malapeh, bialah tingga dahan tampek bagantuang. Disinan sampai pituah bareh solok, bareh nan lambuik padi kasayangan. Asok manggulapua di ateh piriang, indak ka baku dek angin sanjo. Janlah lupo manyemba sagalo uwok, batanam taruang jo pucuak parancih, parintang hari disuduik pondok, malakik minum kawa siang hari. Yo bana santiang baunnyo, mangguah iman bulan puaso, datang pulo sambalado, lado bapalik di ujuang cipia. Ndak tatahan rentak si karupuak ubih, daruak bak cando si kacang randang, dek angeknyo si kuali, lupolah badan nan jo kuliknyo. Nan pangabisan, kalau raso awih-awih tangguang, pasan pulo si kopi susu, minuman kabasaran tokeh jawi, minuman juragan di paburuan. Sahiruik raso ka sampai, iruik kaduo mato tapajam, baitu bana raso manikam, raso indak ka baliak ka tanah ranatu. Jakarta, 20 Maret 2010 Andiko Sutan Mancayo -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe To unsubscribe from this group, send email to rantaunet+unsubscribegooglegroups.com or reply to this email with the words "REMOVE ME" as the subject.
