Kalau ambo lain pulo da Samba wajib di rumah ukatu itu adolah yang berbahan dasar talua, mulai dari talua bulek, talua dadar, sampai ka randang talua. Tapi nan acok batamu yo goreng talua bulek.
Partamo, talua ayam atau talua itiak di abuih dulu sampai masak bana dengan tando kuliknyo alah rangkah dek gulagak ayia. Kaduo, kuliknyo dikalupehan. Pado sesi iko ambo sato manolongnyo mangalupehannyo karena kalau tingga lakek beko dikuliknyo, itu adolah hak ambo mamakannyo...he..he.. Katigo, mandeh mulai manjarang minyak goreng kiloan, namo tenarnyo adolah minyak "Arau". Tapi ndak samo perusahaannyo jo kemeja Arraw nan maha itu da...he.. Ka Ampek, kutiko minyak alah cukuik angek, dengan tando alah agak barasok tipih kuali ko, mako mulai talua di tajunkan ka kuali. Mandasia sakali talua ko. Tandonyo masak, talua iko akan keriput coklat. Ka limo : mandeh ambo siap mamasuak kan lado merah segara nan di gialiang jo batu lado. Mandasia minyak deknyo, api kompor minyak tanah nan mereknyo buterfly (kompor elit zaman itu) di ketekkan. Harum lambek laun manyeba di suduik dapua. Enam : Kalau alah cukup matang, disiramlah talua abuih goreng ko jo lado goreng tadi. Setelah itu mandeh ma ambiak daun pisang, disangai salayang di ateh tungku. Alah agak layua, daun di cabiak dan dibungkuikkan ka nasi angek. Di puncak nasi angek nan barasok harum ko, di cugankan talua abuih goreng tadi sambia di siram jo lado goreng tadi. Minyak samba lansuang mailia diantaro nasi. Tapi indak cukuik itu sajo, disamping talua, alah bapulun pulo pucuak ubi abuih, langkok jo sambalado jariang. Jariang iko di baka, lalu diagiah adonan lado merah jo tomat abuih, bakinca jo bada kariang nan di baka dalam cupak bareh jo baro tungku. Untuak malngkoi baka ko, di gorengkan pulo dek mandeh karupuak ubi (karupuak laweh) Sungai Tarab. Tapi nan labiah lamak kalau karupuak mantah iko di panggang diateh baro, yo sabana lengkap seronyo. Sasudah itu, dimasuakkan mandeh ayia ka dalam tabuang ayia, pakai teh salayang untuak paronomyo. Tapi kalau momennyo adolah Pacu Kudo di Bukik Gombak, menu semakin lengkap dengan tabu. Tabu da, supayo indak balanjo lai, ditabang mandeh tabu di balakang rumah. Di kupas elok-elok dan di potong saukuran. Tabu ko kemudian dibao ka galanggang pacu kudo ko. Tapi di galanggang ado pulo urang nan manjua. tabu bapotong elok-elok, kemudian di atua jo lidi. kalau indak salah zaman itu, sa atua tabu haragonyo 50 rupiah. Di saku baju putiah ko, dimasuakkan pitih agak baru 500 rupiah, bia agak mambayang kalua. tapi kok pulang mamak dari rantau saat itu, pitih 500 ko baganti sakali jo pitih 5000, atau bahkan 10.000. Yo raso paliang gagah awak di kampuang. Sampai di galanggang pacu kudo, banyak pulo anak-anak nan datang. Alah panuah tribun kayu nan sangajo di buek di tapi galanggang. Nan tribun tertutup ko atok jo dindiangnyo daun karambia di anyam. Nan anak-anak ko banyak ba baju sikola, langkok sarato jo topi merahnyo nan bagambar lambang tut wuri handayani. Anak-anak ko, bukan cinta sikola sahinggo harus pakai baju sikola SD lengkap ka acara-acara pantiang mode pacu kudo ko, tapi hanya baju sikolahlah baju terbaik yang dimiliki waktu itu. baju rayo nan ado alah lusuah, manunggu baju rayo tahun dimungko lo baliak. Alah 5 rit kudo balari, awih jo lapa datang manyerang. Di dakilah pinggang bukik ketek di Bukik Gombak tu, mancari kayu nan agak rimbun, untuak mambukak baka tadi jo kawan-kawan jo keluarga. Eh tasasek ka karumunan di baliak samak-samak, kironyo urang sadang mambukak dadu jo barambuang disinan. Alah ado pulo kasino ketek disinan. Akhianyo kami mahinda se, sambia mandanga mamak ambo mangecekkan, jan di contoh nan mode itu, indak ado urang nan kayo dek Judi !, lai tadanga buyuang ?. Salam andiko sutan mancayo Pada 14 April 2010 13:57, <[email protected]> menulis: > Lanjuik carito mandaki gunuang Singgalang > > Sakiro jam 4 Sore, kami tibo di balai Koto Baru, lah diturunkan dek ANS > Pasisia di tapi jalan muko balai nan hiruak pikuak juo jua bali (bursa) > sayua mayua > > Kami pai kalapau randah disubarang, lapau petak khas ruko2 papan di ranah > minang pinggia jalan di Koto Baru nan baloteng randah bakurisi jo mneja dari > kayu, baitu juo bopet palatak samba. Babingkai kaco > > Yo lah banyak pemuda2 anak SMA jo Mahasiswa tarutamo dari Kota Padang > tumpah ruah di Koto Baru sore tu nan tujuan pai mandaki Gunuang Singgalang > di jalur (track) nan alah pasa manuju puncak danau talago Dewi yaitu jalur > Pandai Sikek taruih ka Pemancar TVRI di pinggang Gunung Singgalang akhir > jalan nan baaspal bisa ditampuah oto. > > Kami dilapau tu singgah mangopi di cuaca sore nan lambok2 tangguang > dinginnyo tapi lai indak hujan. Minum kopi angek yo sabana syahdu jo pisang > goreng angek dan goreng ubi jala merah nan rapuh dan kamek, > > Lah salasasi mangopi kami bali nasi bungkuih sajo nan bapisahkan sambanyo > > Nah ikonyo samba wakatu bujang nan paliang "mancandu" bana dek ambo kok > andiko gulai cancang > > Tapi yo ambo goreang ayam kampuang balado minyak2 tangguang bagian ka > sayoknyo tu, nasi bapisah baitu juo ayam goreang baminta kuah cancang jo > rabuang > > > Satantang goreang ayam kampuang mudo balah ampek balado minyak tangguang > ko, wakatu ambo mudo2 dulu adolah samba nan mancandu bana dek ambo > > Mande ambo tahu bana jo salero buruak ambo jo samba ado duo nan suko > dibuekan mande ambo samba > > > Nan partamo goreng ayam tu nan kaduo goreng baluik balado baminyak > tangguang di rancah jo goreang patai bakulik nan diirih serong > > Jampang dulu ado kabar berita yang menyedihkan "ayam peliharoan mande dek > akuak" mako iko "bad newa is a good news" dek ambo > > Riang gembira penuh suka cita ambo manyambuik berita buruak ko dan itu > adalah "ayam dek akuak" > > Kalua sakali surek perintah lisan dari Mande > > "Oiii nak kanduang tangkok lah ayam dek akuak tu, ndak ado ubek e lai tu, > pisau sajo lai ubeknyo" > > Tanpa membatantah, surat perintah lisan segera dilaksanakan mande > > > So Easy mah alias kaji manurun manangkok ayam paliharoan kami nan dek akuak > ko > > Nan ayam ko lah maam sajo di kasiak, lalok2 dek akuak incek mato e, raso2 > ka pisah nyawo jo badan lai, tanpa perlawan yang berarti ayam ko lah dicokok > sajo ndak babarapo lamo baco Basmallah lah baradu pisau jo talihia ayam ko > > Seperti biaso lah dibuekan dek mande ambo samba nan ambo paliang suko "ayam > goreang balado baminyak tangguang" nan ladonyo di tumih/digoreng jo minyak > tanak dari kampuang yo harum, pacah salero dek raso harum dan lamak lado > goreng ko > > Apolai di padu serasikan dek mande ambo jo gulai toco buncih barancah jo > kaki ayam, talihia ayam jo hati kalang ayam dek akuak tadi..masuakan pulo > incek patai, untuang ndak ado karupuak jangek balatuih di randamkan ka toco > ko, kok ado sabana padiah mah gulai toco mande ambo ko, nan toco dibali toco > terkenal di kota padang adolah Toco buatan urang di Tapi Pasang > > Segala sesuatu berlalu dengan tenang dan menghanyutkan ambo makan jo > goreang ayamkampuang balado minyak tanak jo gulai toco mande..ampunnnnn ha > ha ha > > Datang mande > > "Diusap-usapnyo kapalo ambo, sambia mangecek > > "Yo gadang salero bana Datuak Suku anak ambo ko" ha ha ha > > (Datuak Suku panggilan sayang mande ka ambo karano keceknyo ambo mirip > mandiang Datuak Suku kampuang ambo, nampaknyo bapangkek, bakepeang banyak, > manjadi pejabat juo ambo baru ka dapek gala datuak di jaman kini ko baru > bisa he he he) > > Andiko beko sambuang liak mandaki ko sasudah bali nasi taruih kamni ka > stasiun relay TVRI, di tunggu lo samba andiko mandaki gunbuang dan samba > buruak dari mande buek Andiko tu > > > Wass-Jepe > > Sent from my BlackBerry® smartphone from Sinyal Bagus XL, Nyambung > Teruuusss...! > > -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe To unsubscribe, reply using "remove me" as the subject.
