Uda, iko pangalaman pribadi yang ambo curitokan. Ukatu sikolah itu, kami mandaki 11 urang, kalau tipak di kami, yo urang paik-paik iduik se nan mandaki. kalau kini dipikia, antah apo nan di cari kutiko itu. Mode iko curitonyo :
Urang padang marantang banang, dipunta mangko dilipek, dilipek lalu dipatigo, Kok dirantang namuah panjang, elok dipunta nak nyo singkek, singkek sakadar ka paguno. Kami yo mandaki jam 12 malam, dari stasiun yang uda sabuik. Kami bajalan ba iringan, mamudiak di jalan ayia. Alah lamo rasonyo bajalan, nan katua rombongan mangecekkan, barantilah awak disiko. Tapek di di mato ayia nan partamo, malakik ka mato ayia kaduo, setelah itu baru tabiang tinggi nan banamo cadas, disinan kito matohari tabik. Dek parentah ketua rombongan, manggalayak se kami duduak. Ado nan mulai mambukak baka, ado nan maiduikkan kompor parafin, kompor anak gunuang ukatu itu. Nan ambo, bacari tampek duduak nan agak santiang, agak tatinggi dari tampek itu, ado kayu gadang, dek pangkanyo sabana gadang, raso duduak disinggasana diantaro ureknyo. Tapi dek malang katumbua, baru sajo awak duduak, mato lansuang mangantuak, batambah pulo badan panek mandaki, mako talaloklah ambo. Rasonyo ambo sabanta talayang, kutiko jago, haniang sajo tadanga, hanyo beberapa bunyi binatang malam. Sangko ambo, kawan-kawan juo talalok. Ambo ambiaklah senter, kutiko ambo senter bakuliliang, takajuaik gadanglah ambo, ternyata kosong sakaliliang ambo, hanyo samak jo kayu gadang nan ado. Dek takuik, ambo matikanlah senter, manyalasaikan angok nan sasak. Lalu mulai bapikia, baa lai ko. Kalau ambo tetap duduak disinan, ambo takuik jo ula atau urang sibunian, tapi kalau bajalan, ambo takuik juo jo binatang dan urang sibunian. Akhianyo, sahabih-habih takuik, ambo kaluakan pisau sirauik dalam tas, ambo kaluakan Alqur'an ketek, ambo pacik senter, bajalanlah ambo sorang dengan pandangan luruih sajo ka jalan ayia nantun, indak talok ma engong suok kida. Dalam hati, ambo badoa agar salamik dan ambo baco ayat-ayat alquran nan hapal. Ambo lawan takuik mandanga bunyio-bunyian rimbo. Tadanga dek ambo, siamang mulai babunyi, tando hari mulai akan pagi. Ndak lamo, didanga tuhan doa ambo, ditangah jalan batamu ambo jo bekas unggunan di buek dek pendaki lain. Ambo ambuih-ambuih apinyo supayo iduik. Setelah iduik, ambo duduak disinan, ambo baco alquran ketek ko sorang, indak ambo padulikan bunyi-bunyian nan tadanga. Eh tibo-tibo, raso kaputuih urek jantuang, di balakang ambo tadangan bunyi langkah-langkah, ambo dek takuik, indak barani mancaliak, ambo tunggu sajo apo nan ka tajadi dengan berdoa. Ternyata..................ternyata.................. Ado tigo urang anak dari Padang, talambek mandaki, jadi talambek pulo sampai. Aduhhhhhhhhhhhhhhhhh, sungguah lega ambo. Urang itu heran manga ambo surang di tangah rimbo ko. Ambo caritokanlah kalau ambo tatingga dek kawan. Lalu ambo manompang ikuik jo rombongannyo. Ahianyo, ambo baru batamu jo kawan ambo ko, di cadas ukatu fajar alah datang dan matoari pagi alah mancogok. Ambo berangan kawan ambo ko, manga ambo batinggakan. Ternyata kawan ambo ko alah tigo kali balari mancari ambo ka tampek baranti tadi, tapi indak basuo dek inyo doh. Inyopun panik, baa manjalehkan ka urang gaek ambo, kalau ambo ilang di bao sibunian. Baitu pangalaman ambo da Salam Andiko Pada 15 April 2010 12:09, <[email protected]> menulis: > Lanjuik carito mandaki gunung singgalang jadul > > Lah salasai kami mambali nasi bungkuih kami manaruihkan perjalanan ka > Pandai Sikek manuju tampek parantian samantaro manjalang tangah malam > mandaki yaitu stasiun relay TVRI nan talatak di kaki gunuang singgalang > > Tampek ko yo favorit dek pendaki gunuang sangkek tu tampek bakumpua2 > mangalai2 di halaman dan pelataran stasiun nan luas, kami bagabuang jo > pandaki2 gunuang nan lain lapeh magrib nasi bungkuih nan di bali di lapau > Koto Baru tadi kami makan basamo2 hari yo sabana dingin, lah lakek jaket > tantara di badan ambo jo sebo di kapalo > > Salasai makan kami basantai2 dulu sambia maota2 atau lalok-lalok ketek > manunggu sakiro jam 12 an > > Akhirnyo tangah malam kami mulai mandaki gunuang singgalang tu jo rombongan > nan lain, jalur nan kami tampuah yo la pasa dek acok ditampuah dek urang > mandaki jadi ndak ado halangan nan berarti langkah demi langkah akhirnyo > subuah kami sampai di puncak talago dewi > > Lah banyak pulo rombongan pandaki bakumpua disiko, manjalang matoari naik > lah tarang di talago dewi ko yo sabana takjub awak di ketinggiuan tu sunyi, > sepi, dingin, pemandangan rancak, aia talago nan janiah raso di nagari ateh > awan di dongeng2 awak di puncak tu > > Lah pueh menikmati sagalo keindahan di puncak gunuang singgalang jo talago > dewi sakiro jam 8 an kami turun lai > > Itulah kenangan ambo jo kawan2 pai mandaki gunuang singgalang lai indak > barek bana dalam arti tingkek kesulitan mandaki ko bagi para pemula indak > barek dan manyeso diri asal kondisi lai fit (sehat) tingga manikam jajak > pandakian nan alah ado kecuali mandaki mambuek jalur baru > > > Wass-Jepe > > Sent from my BlackBerry® smartphone from Sinyal Bagus XL, Nyambung > Teruuusss...! > ------------------------------ > > -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe To unsubscribe, reply using "remove me" as the subject.
