Tarimo kasi Mak Ngah (d/h Pak Syamsir Syarif) nan ambo horomaiki. Maaf, batua nan Mak Ngah ingekan, sarupo nan tatulih di bawah. Tampaknyo ambo alah "tajangkik pulo panyakik babarapo urang kota" mancampua adukkan antaro cirik jo kasungai, dan labiah lanjuik...... mangatokan babi haram tapi babu halal..!!! He he hee...)
Maaf, Mak Ngah. Karano memori ambo error ka maso 39 tahun nan lalu, mako nekad mamakai istilah "janjang gudang" manjadi "janjang ampek puluah". Pado hal ambo tau, nan dikatokan "janjang ampek puluah" itu, iyo janjang nan arah ka parantian oto Payokumbuah. Sakali lai, maaf. Tantang saluang di "janjang ampek puluah", di era ambo sikola di Gaduang (istilah lain kota Bukiktinggi) tu, memang masih ado ambo liek, Nan laki-2nyo buto, dan bininyo normal (ukatu tu, 1969 inyo sadang mandapek anak partamo bayi laki-2). Tiok Rabu jo Sabtu lai rutin inyo manyaluang di sabalah kida awak ka naiak janjang dari arah parantian oto. Samanjak ambo pindah dibaok Rang Gaek "marantau Cino" ka Batawi (26-10-1970) ambo indak panah tau lai soal panyaluang "Malin Mangana" nan panuah mamori bagi dunia remajambo tu. Kalau Mak Ngah adolah Guru STN-II Lambau Bukiktinggi (1955) sabana mambuek ambo tasintak. Soalnyo kutiko MakNgah jadi guru tu, ambo baumua baru etongan bulan. Jadi, istilah anak mudo kini, "zaman awak agak babeda". Kutiko ambo di Lambau, nan jadi Kapalo STN-II adolah Pak Putiah (St. Parmato). Mudah-an MakNgah masih alun lupo ju sosok Pak Guru nan ko. Guru Motor Bakar kami banamo Pak Rustam, Guru Gambar kami Pak Ardin HS, dan Guru Praktek Bengke kami (kalau ambo indak salah ingek) namonyoPak Jamain (urang Kotogadang) nan wajahnyo mirip "urang kaliang" (maaf). Baa mangko ambo masih apa namo-2 Pak Guru nan maajo ambo 39 tahun saisuak? karano baliau tu dakek & sayang ka ambo. Kalau Mak Ngah namuah picayo, alhamdulillah untuak tingkek STN-II Bkt memang si mm ko ranking satu. Guru-guru nan ambo sabuikkan di ateh tu rato-rato maagieh ango di rapor/ atau ijazah STN-mbo angko 8 sadonyo. Super kan, Mak Ngah?? (he he heee...). Jikok ditaruihan mangana-ngana maso remaja mudo mantah di Kota Tri Arga ko bisa-bisa mambuek mato ambo balinang. Bukan karano susahnyo hiduik kutiko tu. Bukan itu MakNgah. Ambo jadi tamanuang, baa kok ukatu tu capek bana rasonyo bajalan, yo? Baru kapatangko rasonyo, ambo mancilok-cilok manonton filem di Bioskop Eri di bawah janjang gudang. Kabatulan nan punyo Bioskop Eri tu anaknyo (Rum Hanafi) adolah kakak kelas ambo di STMN Padang Gamuak (1970). Jadi, kalau kapepet nio manonton iyo ambo manyalek-nyalek ka baliau untuak dapek dimasuakkan (stalah filem main babarapo minik) ka dalam Eri (manonton perai). He he e... Kini nan ambo caritokan di ateh, kutiko ambo pulang babarapo kali satalah larek di rantau puluhan tahun, hanyo tingga kenangan. Bioskop Eri alah punah, STN-II Lambau indak babakeh, dan diganti jo gaduang SMP. Samantaro gaduang SMAN-I Bukiktinggi di muko STN-II Lambau masih tetap megah... sarupo samanjak tatagaknyo dulu. Ambo raso Mak Ngah, cukuik sampai di siko dulu awak banostalgia ka maso lalu. Soalnyo, samakin MakNgah mancukie-cukia ambo, samakin banyak nan kalua beko siso-siso panganambo kutiko manjadi remaja mantah di Gaduang tu. Ukatu tu ambo adolah remaja agak super MakNgah. Ukatu tu umua baru jalan 15 tahun, tapi namo si mm ampiang tiok Sabtu atau Minggu mancogok di Minggguan Singgalang, Mingguan Padang Pos, Haluan Minggu, Aman Makmur Minggu atau RRI Bukiktinggi maisi rubrik-rubrik seni (puisi, cerpen bahaso minang, gurindam, atau pantun mamantun). Namun......, kutiko nasib mambaok ambo musti pindah maikuik Papa ka (MABAK) Jakarta, ka sado alahe ambo tinggakan.......... Salam dari ambo sakaluarga buek keluarga MakNgah di Banduang. Kalau Mak Ngah (panah bacarito, dan iko tingga dalam memori kapalo ambo) pulang ka gadih Maninjau, mako ambo (si mm ko) dapek gadih Lubuakbasuang nan tacokok dek ambo di bumi Betawi tahun 1984. Kini kami dikarunia Allah SWT anam urang turunan (3 laki-2, tigo padusi) nan sadang payah-payahnyo manuntuik ilimu di PTN/PTS. He he he.... Salam maaf & horomaik dari kami sakaluarga di Bekasi. mm*** ________________________________ From: sjamsir_sjarif <[email protected]> To: [email protected] Sent: Fri, June 25, 2010 1:15:36 PM Subject: ANTALAH YUANG....!!!!===>Re: [...@ntau-net] Jam Gadang jadi Surga Pejalan Kaki Angku mm***, Mungkin Angku kaliru, "Janjang 40" ko nan madok ka Utara di Pasa Ateh Bukittinggi, manurun ka Jalan Payokumbuah. Mangko banamo Janjang 40 karano anak janjangno nan paliang ateh ka Pasa Ateh tu jujmlahno 40. Di Janjang 40 tu lah dahulu ado "Malin Mangana" nan manyanyi tiok hari jo pantun-pantunnyo nan disanangi urang sabagai sijmbol Janjang 40 tu. Janjang nan ado "tampek talangek" nan nan angku kecekan di bawah Jam Gadang tu madok ka Selatan ka Jalan Sapiran Birugo. Namo janjang tu "Janjang Gudang". Di atehnyo saisuak ado Toko Kacamata, lupo namono. Sabalahno ado lo Restoran bagai, antah aa namono lupo lo. Mungkin dek lamak gulai gejeboh di resoran tu lai indak tabaun bagai hawo semerbak dari tampek nan baleak di bawah tu ... Jadi Angku dari ST-2 Lambau pulo mah yo? Rindu pulo MakNgah jadino karano MakNgah jadi Guru sinan sisuak tahun 1955. Salam, --MakNgah Sjamsir Sjarif -. -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
