Sambalado Palik Maco Tarubuak VS Sambal Ikan Roa 16 Oktober 2010 Sungai Pagu Ayia la Batumbuak, basimpang jalan rang ka Abai Oiiiiii simpang jalan lah ka Abai Yo laiiii, angan lalu paham lah tatumbuak oiii disinan badan mangko sansai… Oiiii lah laiiii disinan badan mangko sansai
Sanak palanta Tatumbuak….bahaso urang awak, mumet bahaso gaul di Jawa ko. Mungkin agak kurang persis terjemahannyo, tapi itu bana nan taraso kini. Mato alah bakunang-kunang, utak saraso baku, jari baranti sajo di ateh tuts computer, badan kahilangan raso. Jenuh…subana..jenuh. Batahun mempresentasikan hal nan samo, ampia sabangun jo buruh lagu di café-café, lagu nan samo badendangkan ratusan kali, indah dek nan partamo mandanga, tapi mode terror dek nan manyanyikan tiok ari. Itu bana nan taraso sanak, apolah ka ubeknyo. Mangko dilangkahkan kaki kalua, cigin sabanta mancaliak urang manggaleh. Ado nan manggaleh baju, sepatu, sampai ka nan manggaleh lampu. Urang lalu-lalang ba malam minggu, ado pulo nan maronggok maisok rokok arab, shisa kecek urang namonyo. Dek panjangnyo slang tampek asok lalu, raso ka mambalik ka pangka lihia. Etan disuduik sanak, tatonggok rancak kadai urang Manado, lapau Kawanua namonyo, disuduik tatulih tulisan arab, “Halal” bacaannyo. Mangko dironggokkan pulo badan di bangku malayang sakali pangana ka Tomohon, tabayang pulo gunuang Manado Tua, langkok jo Tarangetang di pulau Sangihe. Disinan di pasan pulo sagalo nan kaninan, apo itu sanak : 1. Ikan Cakalang Woku sapiriang 2. Sayur daun papaya sacipia 4. Mairiang dabu-dabu mantah 5. Langkok jo paragede jaguang Apo lai yo sanak, oh ado nan lupo, itu bana nan ka di cari, SAMBAL IKAN ROA nan takana. Tagalak sengeang si urang kadai, dari ma pulo urang ko tahu barang nan tasuruak, permintaan bana urang ka bapulang. Oi…sanak dari ujuang Sulawesi, jan di sangko si-Padang ko indak tahu barang nan lamak, sungguahpun disuruakkan bana di puncak cangkeh di Tomohon sinan. Kini angku bueklah lai, indak saba denai mancubo. Basigageh tukang masak mambinjek lado, yo lado nan samparono padehnyo. Bantuak buliah gadang saketek dari bareh, tapi kok padeh Allahurabbi, yon an mancubo sajo nan katahu. Mode manari si batu lado, mananti ikan roan an dibaka. Alah bakapusuang baun ikan kariang ko dib aka, disinan pulo ditumbuakkan ka lado. Ondehhh sanak, malakik mananti, yo janiah-janiah ayia ludah. Sairiang jo sambal ikan roa dihidang, saayun tibo nasi angek barasok, tabaun sakali harum di ruangan. Indak adoh lai sanak, kok suok naik bak cando balari, cakalang dibinjek, diputa jo sayua daun papaya, manyarato dabu-dabu matah, ditutuik dek palik jari ka sambal ikan roa. Sakatiko padeh manyangek, mancurah paluah di kaniang. Nan ditalingo raso barasok, dalam kapalo lansuang badantang. Raso ado nan mangguguah aguang. Sabana badantang sanak. Ilang sakali baku utak ambo. Diantaro padeh dibunuah dek the angek, talayang pulo pangana karanah bundo, kama tu sanak…?. Yon an takana SAMBALADO PALIK MACO TARUBUAK. Ondehhhhhhhhhh sanak. Mungkin banyak dari sanak nan alun mancubo, dek bantuak buruak babaun pulo, mungkin dek sakik iduik bana baru sambalado iko dibuek. Tapi sungguahpun baitu sanak, kok raso sabana santiang, apo lai dipalik jo nasi angek, duduak basanda di tonggak dangau, di tangah hamparan sawah kagadangan. Ambo kiro sanak, ikan roa jo maco tarubuak, kalau ka indak badunsanak dakek, mungkin baliau “badunsanak ayam”. Baa mangko mode itu sanak, kok raso yo indak jauah, leba sajo nan batikai. Kutiko kadibuek jadi sambalado, samo-samo badiang diateh baro, manitiak ayia ludah dek baunnyo. Kok ladonyo, lado terbaik nan diambiakkan, badan nan sadang masak tangguang, sadang di puncak raso padeh. Apo lain an takana sanak, kalaulah urang manggaleh nasi padang maniru caro manggaleh lapau sanak manado iko, mungkin akan labiah lamak rasonyo. Baa baitu sanak ?. Kalau kito pai ka warung Padang, alah basusun sagalo jamba, jamba nan di masak sajak subuah, tajilantang sampai tangah malam, bahkan ado pulo nan baulang barisuak pagi. Kalau di kadai Kawanua ko, kok kito pasan Cakalang Woku, sakatiko ikan di cakau, disinan badan di dabiah, dikinca sagalo bumbu, baru api mamasakkan. Yo sabana fresh bahaso urang kini. Baitu pulo sagalo nan lai, sakatiko jamba di kandak, disinan urang dapua mulai mamasak. Cubo sanak bayangkan, kalaulah samba di etalase kadai nasi uarang Padang diganti sajo jo makanan icak-icak dari plastic. Dek pandai tukang patuang, iyo marupo bana sagalo jamba, asli bana bantuaknyo. Kok jamba palasu disteleang di agiah rono nan rancak tantulah ka manggilo mangguguah salero. Nah kutiko urang manunjuak, kaninan samba apo, sakatiko urang dapua mamasak. Nio apo sanak ?, randang ?, ayam pop?, tunjang agak sapiriang ? atau dendeang batokok, co kilek urang dapua menyiapkan. Sabana fresh sampai di meja sanak. Nan raso indak ilang, apo lai harumnyo yo sabana manggilo, sabab saminik nan lalu baru di bangkik dari balango tanah. Ondehhhh sanak, cubolah bayangkan. Sakian dulu sanak, semoga curito ringan ambo lai indak manggaduah. Salam Andiko Sutan Mancayo Masih mainok-inok padehnyo sambal ikan roa. -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
