Hatur nuhun kana waleranana. Karaos ngajenan kana sagala rupi asupan. Ningali sakitu seueurna biografi nu tos aya, oge ASOS, sareng ensiklopedia karaos simkuring tos lawas tamelarna kana karya carita basa Sunda. Padahal nuju ngora mah tukang ngimeutan buku sareng majalah Sunda. Upami ngabandungan kirang nerekabna minat maca karya carita basa Sunda atanapi/sareng tokoh urang Sunda di masyarakat, panginten kedah nganggo taktik hubungan masyarakat nu langkung mikat ka balarea. Ku pangemut pribados aya sababaraha taktik nu tiasa dilarapkeun, upamina wae ayakeun acara bedah buku atanapi pedaran biografi tokoh dibarung ku raramean nu dirojong ku iklan. Teu sawios upami dikaitkeun sareng kampanye pencalonan presiden, wakil presiden, atanapi gubernur sareng wakil gubernur oge. Upami teu aya muatan politikna, tiasa dikaitkeun sareng muatan lokal kurikulum atanapi ekstra kurikulum di sakola (aya keneh kitu?), upamina pedaran buku teh diadumaniskeun sareng lomba tulis, baca, sareng biantara basa Sunda pikeun barudak sakola ti SD dugi ka mahasiswa. Oge lomba nu merenah kanggo balarea. Ngarah rame pisan kedah aya sponsorna ti tokoh nu bade makalangan ka pemilihan, sareng perusahaan nu resep ka urang Sunda, atanapi produkna dipikaresep/dipikabutuh ku urang Sunda. Mung omat, karya cipta nu siga gambar Dayang Sumbi nu ditangkelkeun dina surelek pangersa (astaghfirulloh!) ulah dugi ka ngiring ancrub dina sagala acara. Matak isin ningalina. Hatur nuhun kana perhatosanana.
A. Dimyati Send instant messages to your online friends http://uk.messenger.yahoo.com
