[AHMAD, DITEMPAT DITIMUKEUNANA GUCI ABAD KA 13] AHMAD, DITEMPAT DITIMUKEUNANA GUCI ABAD KA 13
GUNUNG batu nu perenahna di Blok Popojok Desa Cileuleuy Kecamatan Cigugur saminggu katompernakeun ngadadak jadi kacapangan. Lain bae masarakat nu panasaran dalah ti Balai Arkeologi (Balar) Bandung ngutus tim ka eta patempatan. Pon kitu deui Kantor Suaka Serang Provinsi Banten (nu ngahususkeun kana panalungtikan kaarkeologian) nyejakeun. Datangna tim arkeologi ngadongkang ka eta patempatan alatan meunang beja ti Dinas Kebudayaan dan Pariwisata (Disparbud) Kabupaten Kuningan. Yen di Gunung Batu ditimukeun guci jeung gerabah (pependil : basa Kuningan) tina jeuro taneuh ku Ahmad, 20 taun, warga Kampung Puhun RT 1/1 Desa Cileuleuy Kecamatan Cigugur salah saurang tukang ngali batu di eta lelewek. Jangkung gucina kurang leuwih 40 senti meter, garis tengahna 30 centi jeung warna koneng gading. Sedengkeun pependil (pendil) jangkungna kurang leuwih 18 senti, garis tengahna kira-kira 20 sentian jeung warnana pulas hejo. Eta guci jeung pependil, ayana tina beungeut taneuh jeurona kurang leuwih 40 meteran. Kapanggihna oge teu dihaja. Basa Ahmad, di suruh bapana Salim, 50 taun, sangkan mantuan mobil keur ngunggahkeun keusik nu dibeulina. Kepala Dinas Kebudayaan dan Pariwisata (Disparbud) Kabupaten Kuningan, Drs. H. Yayan Sofyan, MM., nu ditepikeun ku Kepala Bidang Kebudayaan Suryono, S.Sen., "Kaayaan topogarpi taneuhna nu sababaraha lapis samentara bisa dijinekun. Ayana gunung batu satutasna Gunung Cireme bitu, kira-kira taun 1856-an. Sabab di dinya aya pasir rupana lemes, kualitas nomer hiji nu asalna tina lahar. Pon kitu deui batuna nu diutahkeun ti jeuro kawah. " Lapisan taneuh samodel kitu, ceuk Suryono, bisa ngamankeun barang-barang nu kabawa palid ku lahar. Kawas Ahmad, nimukeun guci jeung pendil atawa nu sejena manggihan piring keramik dina kaayaan beleger kusabab kasimeuhan keusik. Teu kadempet atawa katinggang batu. "Mun dianalisis leuwih gemet deui samemeh Cireme bitu di eta lelewek geus aya pilemburan," pokna. Dumasar anggapan awal ti pihak Balai Arkeologi Bandung jeung Serang, ceuk Suryono, guci jeung pendil umurna geus ratusan taun. Copelna ti abad XIII [GUCI ABAD KA XIII & XVI NU DITIMUKEUN DI GUNUNG BATU] GUCI ABAD KA XIII & XVI NU DITIMUKEUN DI GUNUNG BATU atawa ka tujuh belas. Lantaran jenis barangna mangsa jaman Eropa aya di Indonesia. Lain jaman samemehna, nu dibawa ku Ong Tin Nio ti Cina. Keur mastikeun bener atawa henteuna guci jeung pendil di bawa ka laboratorium di Serang. "Guci jeung pendil teh minggu kamari di bawa ka Serang pikeun ditalungtik nu leuwih gemet. Ke hasilna baris katohyan saminggu atawa dua minggu ka hareup. Boh umurna jeung asal-usulna. Naha ayana di Cileuleuy teh dibawa ku bangsa Eropa, hususna Belanda atawa ti para sudagar nu nyejakeun mampir atawa memang aya tradisi nyieun keramik?" pokna. Hasil panalungtikan ti laboratorium, ceuk Suryono, baris dibewarakeun ka masarakat. Mun hasilna positip mibanda ajen inajen sajarah luhur. Pastina oge gunung batu nu legana 70 hektar bakal dipenta ka masarakat sangkan teu dikali deui. Tujuanana keur panalungtikan nu leuwih gemet. Naha rek di eksavasi (ngali) atawa dicokot keusikna keur sampel panalungtikan di laboratorium.
