Urang longok heula Raja urang nu dihurup ku musuh genepan! Perangna rosa jasa Eta genep papatih Ku Raja urang laju ditubruk laju diawut-awut diluluh digulung-gulung dirampid jadi ngahiji Mani pating polonyon tina jubah inyana Ting arenyut Jiga tetep lesot tina wadahna! Ting aruyek sabuligir jiga engkuk pilegeeun!
Balad Banten waktu neuleu kabeh papatihna deuk dipodaran ku Raja Sunda Hanteu taregaeun. Laju Reok wae ngaleut cara sireum siraranggge ngagurumut raja urang! Atuh mani haliwu Raja urang! Nya harita Opat patih Banten bisa budi Ngan eta bengkong nu duaan arinyana mah hanteu kaburu sabab kaburu modar mantare. (manten? WLY) Tapi marodarna ditareunggeulan urang Banten! saba ku haliwu-haliwuna ngagurumut Urang Banten teh teuteunggeulna sateunggeul-teunggeulna bae! Datang ka loba balad Banten kararojor Cigenden ku baturna keneh! Urang caturkeun Patih Banten anu opat Ariyana bisa budi Laju ngorejat bari ngarawel jubah! Tapi Lantaran ngorejatna bari haliwu, nya atuh ngarawel teh sarawel-rawelna bae. Hanteu areungeuh pahili jubah! ku haliwu-haliwuna; Kai Cakra hanteu eungeuh pahili jubah, Kai Jaya hanteu eungeuh pahili jubah, Kai Asep hanteu eungeuh pahili jubah, Kai Tubagus hanteu eunggeuh pahili jubah! Jaba ti pahili teh, inyana hanteu engeuh, make jubahna teh, Tabalik! Nu pikeun cokor dipake di ruhur Ari cokorna diasupkeun dina beuheung jubah! Atuh leumpangna mani jiga nini-nini hudang ngajuru ......! Ninggang di Kai Cakra anu begang nu karawel teh jubah godombroh, pakean baturna nu jangkung gede Atuh barang dipake teh ka ruhur leuwih sasiku, ka handap leuwih sadeupa! Ceuk pikir inyana: "Bener sakti si Raja Sunda! Ieu jubah mani kieu! Karuhur Teu kadeuleu langit Kahandap teu karasa napak!" Nya gudubrag bae inyana labuh, Tikudawet Nincak jubah panjang teuin! Ceuk pikir inyana: "Panjang teuing! Ngaing beubeurkeun!" Laju jubah panjang teh dibeubeurkeun digulungkeun ruhureun cangkeng, atuh tembong BURAHOLna! Der perang deui! perang rosa, perang rosa jasa; Terus perang leuwih ti rosa jasa! Raja urang najan gagah najan sakti, tapi ari diruhun digurumut mah nya haliwu oge! Nya kapaksa inyana mundur kadeseh kabeulah kaler. Datang ka palebah birit leuwi! Tah didinya inyana katubruk kunu ngahurup Tapi Raja urang Laju motah rosa jasa! Nya lajuna mah gujubaaaar! Raja urang ragrag ka leuwi! Gujubar Kai Asep kabawa ragrag, inyana ngarawel jubah Kai Jaya, Kai Jaya ngarawel jubah Kai Cakra, Kai Cakra ngarawel jubah Kai Tubagus. Tapi Lantaran jubah Kai Tubagus mah dibeubeurkeun Nya karawelna teh BURAHOLna! Nya gujubaaaar! Jawara Banten anu opat kabedol kabawa ragrag Laju perang di dasar leuwi! Balad Banten eureun perangna, Balad Pajajaran eureun perangna, lalajo nu keur perang di dasar leuwi! Nya jadina teh euweuh nu perang didaratan kabeh jarajang teges nareuleu nu galungan di dasar leuwi! Kabeh pasedek-sedek! Datang euweuh nu areungeuh Balad Pajajaran nyarelap di balad Banten, balad Banten nyarelap di balad Pajajaran! Eungeuh-eungeuh soteh aya nu hitut! Ceuk balad Pajajaran: "Hitut Banten yeuh! sejen deui peledekna!" Ari inyana ngalieuk teh baruk geuning lain batur sakamandoran, tapi musuh urang Banten! Nya der perang deui! Perang di daratan perang di dasar leuwi! Ting gulutuk sora batu, ting sareak sora koral, tingkiricik sora geusik! Burial! Burial! Cai kiruh di dasar leuwi umpalna neunggaran gawir! Ngagulugur gawir nu urug, ngaguruh tangkal nu rubuh, tangkal jati gararede sisi leuwi sabrang wetan rungkad ambles kabawa palid! Ari palidna? Nyarangsang di birit leuwi Tah didinya engkena teh ngadeg hiji lembur nu ngaranna di kiwari Bantarjati. Urang tunda deui, sina jadi lembur Bantarjati! [Lajengkeuneun]
