Urang kocapkeun Ki Santang deui! Kadeuleu ti awang-awang palebah Leuwi Sipatahunan Loba jasa jelema keur saling ganden! Ceuk pikir Ki Santang: "Boa-boa! jeung kadeuleuna jiga lain somah ngaing kabeh!"
Gajleng! Ki Santang luncat tina mega, megana mani semplak sabeulah! Sesemplekan mega nu beulah Murag! Ragragna malang, nyampay dina lamping sakalereun Gunung Gede. Engkena Dihandapeun ngadeg hiji lembur nu kiwari disebutna MEGA MENDUNG! Lajukeun urang Ki Santang! Jrut inyana turun! Jlig inyana nepi! Jung Inyana nangtung, kadeuleu aya numpukan, ngagunuk cara picung buruk! Ceuk Ki Santang bari tulak cangkeng: "Nahaeun yeuh?!" Ceuk nu ngagunuk: "Nu areleh perang!" Ceuk Ki Santang: "Urang mana?" Ceuk nu ngagunuk: "Urang Pajajaran!" Ceuk ki Santang: "Eleh ku saha?" Ceuk nu ngagunuk: "Ku urang Banten!" Ceuk Ki Santang: "Kumaha make areleh?" Ceuk nu ngagunuk: "Lalicik sih! kaci make ngegel ceuli, nyolok mata jeung nyingkabkeun samping!" Ceuk ki Santang: "Lain licik! Eta teh aturan perang nu anyar! Tapi kumaha sabab perang?" Ceuk nu ngagunuk: "Ngabelaan Raja!" Ceuk Ki Santang "Dimana Raja?" Ceuk nu ngagunuk: "Tuh didasar leuwi! Keur dihurup ku opat urang!" Ki Santang teu loba deui catur laju inyana tuturubun Ngajubar! Lep! Inyana teuleum! Tapi kusabab caina kiruh, teu kadeuleu Mana Bapa, mana musuh! Ceuk Ki Santang: "E-eh! Mun neunggeul bari teu neuleu, bisa salah anu keuna! Leuwih hade, ieu leuwi hade ngaing bedahkeun! Nya der dibedahkeun! Ka hilir Ciliwung guntur! Ka girang Ciliwung surut! Kocapkeun anu garelut! Hanteu areungeuh Sipatahunan mingkin saat! Barang beak cai kiruhna, kadeuleu ku Ki Santang Raja eudeuk diporeatkeun! Teu antaparah! Saebur raja direbut! Lung! Dikadaratkeun! Anu karebut musuhna, karuhan bae ambek jasa! Kadeuleu ku ariyana aya musuh anyar! Laju pating surungkuy Ting garebay ngarajol bari raranggeum eudeuk nyekek beuheung ki Santang! Ki Santang mah ngeunah seuri! Laju leuwi dikubek deui, kiruhna kiruh jasa. Datang ka euweuh nu bisa kadeuleu! Ki Santang mah, inyana laju ngadapang malang dina pamontengan! Inyana ditubruk ku opat patih Banten Tapi Ki Santang ngejat bari ngagakgak! Pamontengan laju bedah, nyeot buburialan! Atuh kaceot opat patih Banten! Hulu inyana ngadalagor batu, mani remuk ka batu-batuna! Awak inyana naleunggar cadas, mani rarungkad gawir-gawirna! Nya marooooodar! Laju paralid Laju engkena nyarangsang! Anu saurang di lebaheun kiwari tanah Jelebud. Anu saurang deui di bilangan kiwari di tanah Bojong Gede Saurang deui Di bilangan kiwari tanah Citayem saurang deui di bilangan kiwari tanah Sawangan! Tapi saha nu nyarangsangna? Saurang geh datang ka iraha oge Moal aya nu nyaho! Lantaran waktu paralidna marake jubah nu pahili pahili ka pangkat-pangkatna! Ngan bae Engkena kabejakeun cenah mah jaradi karamat! Tunda deui! Keun sina jaradi Karamat! [Lajengkeuneun]
