Keur mahasiswa kungsi maca novel terjemahan wedalan Gramedia, judulna teh WANITA, karangan Paul I Wellman. Setting caritana jaman Yunani Kuno (Byzantium), nu boga lalakonna Theodora, ungkluk (punten) jalanan anu miskin, tapi ku kapinteran jeung kalicikanana manehna akhirna jadi Ratu, sang pangawasa. Theodora didukung ku kokolot tukang jajaluk di jalan-jalan Konstantinopel (istambul ayeuna). Novel ieu, nu aslina mah judulna THE FEMALE alias "SANG BIKANG", nempokeun kumaha ambisi awewe miskin nu geus dianggap runtah masyarakat akhirna jadi pangawasa.
Rame pisan, bisaan nu ngarangna. Lamun inget kana novel eta, sok kapikiran naha di dunya nyata aya kitu awewe anu siga kitu? Teuing teu apal ngan asa kaingetan poe ieu Antasari Azhar arek divonis, jeung aya artikel dina detikNews soal Rhani Juliani saksi kunci kasus Antasari.judulna teh : "Rhani Juliani, Memimpikan Karir Mapan Kini Hidup Dalam Cibiran " (http://www.detiknews.com/read/2010/02/11/072019/1297191/10/rhani-juliani-memimpikan-karir-mapan-kini-hidup-dalam-cibiran). Rhani Juliani, awewe anak jalma sederhana (pisan), cenah hayang ngarobah nasib, manehna sakuat tanaga "bajuang" ngarobah nasibna, jadi caddy golf, jadi itu ..., jadi ieu ..tepi ka dikawin siri ku boss. Meureun manehna oge hayang make "cara Theodora", ngan hanjakal tujuanana teu kabeh katepi, manehna meunang popularitas tapi oge wareg ku "caci maki". Geuning "Theodora" teh ngan aya di dunya dongeng ...... Baktos, WALUYA
