Jatsu Argaratek idatzi du: > Durangoko azoka ez da kultura kontsumitzeko modu zuzena, euskaldunon > kontzientzia kulturala garbitzeko aitzakia bat besterik ez da.
Baliteke horretaz zerbait egotea Durangon, baina niri iruditzen zait hori baino askoz zabalagoa eta anitzagoa dela azoka. Internet pornografiaz beteta dago, baina internet ez da pornografia bakarrik. Niretzat Durangoko azoka izugarrizko aukera da. Atzo poltsaz kargatuta etxera bidean gentozela hori nenkarren buruan. Zenbat gustatzen zaidan Durangoko azokaren buztan luzea! Dantzarien Biltzarrak argitaratutako 4 DVD eta CD-rom bat erosi nituen. Urte osoan zehar ez didut dendetan aurkituko horiek. Ezta txistulari elkartearen standean erosi nituen partitura zaharrak ere. Biarritzeko txistulariek ateratako CD bat, dantza argazkiekin egindako bi egutegi, Gatuzaineko euskal antzerki tradizionalei buruz argitaratutako liburu bat, Jose Antonio Azpiazuk liñuaren Hªri buruzko idatzitako liburu,... eta nobedadeekin batera aspaldiko liburu batzuk. Izan ere, argitaletxe eta banatzaileek urtero zakukada liburu zahar ateratzen dituzte kutxetatik Durangon, eta hori izugarrizko aukera polita izaten da. Aurten adibidez Zutoiaren standean Iztuetak 1824an argitaratutako liburu baten 1968ko argitalpenaren 4-5 ale atera ditu. Urteak neramatzan liburu horren bila eta hara nere begien aurrean! Auñamendiren mahaian ere Jesus Elosegiren liburu zahar batekin egin dut topo eta hura ere pozez gainezka hartu dut. Nik erositako liburu, CD eta DVD horiek guztiak ez dira inoiz sartuko Durangoko "salduenen" zerrendetan, baina niretzat izugarrizko altxorra dira, denda arruntetan inoiz aurkituko ez ditudanak. Beraz, gora Durangoko azokaren buztan luzea!! Aurrera begira uste dut Durangoko azokak buztan luze horretan sakontzeko aukera polita duela. Hainbat elkarte daude urtean (eta batzuk bizitzan) liburu bakarra argitaratzen dutenak. Horietako gehienak ez dira iristen ez Durangora ezta dendetara ere, eta ederra litzateke horrelako lanentzat Stand batzuk jartzea, hamaika amaren emaitzak bildu eta eskainiko lituzkeena. oier. _______________________________________________ Adi gero, mezuak bidaltzeko: [email protected] http://www.eibar.org/zerrenda harpidetza eteteko: [EMAIL PROTECTED]
