Diantara karya kamotekaran Abah Surya nyaeta mangrupa buku Nur Hidayah jeung Nurul Hikmah. Nur Hidayah eusina saritilawah basa Sunda Al Quran dina wangun dangding Pupuh sunda. Sedengkeun ari Nurul Hikmah eusina ringkesan tina Nur Hidayah dina wangun nadoman.
Jiga Kumaha Eusina teh? Hayu urang toong babarengan. Keur babandingan urang sandingkeun jeung "Al Qur'an dan Terjemahnya" terbitan Departemen Agama. Urang pilih salah sahiji surat nu pondok we nya, Surat Al-Ikhlas. Tarmamah Al-Ikhlas basa Indonesia: 0. Dengan menyebut nama Allah Yang Maha Pemurah lagi Maha Penyayang. 1. Katakanlah: "Dia-lah Allah, Yang Maha Esa, 2. Allah adalah Tuhan yang bergantung kepada-Nya segala sesuatu. 3. Dia tiada beranak dan tiada pula diperanakkab, 4. dan tidak ada seorang pun yang setara dengan Dia" Tarjamahan Nur Hidayah, jiga kieu: 0. Kalayan Asma Nu Welas Asih 1-2. Pupuh Kinanti Abdi sumanggem saestu sinaksenan lahir batin, Alloh teh Nu Maha Esa, mung ka Alloh abdi muji, ka Alloh abdi neneda, neda welas asih Gusti. 3-4. Pupuh Kinanti Abdi sumanggem saestu, Alloh teh estu abadi, teu ramaan teu putraan, sareng taya nu nyasami, teu aya anu nandingan, sadaya ge mahluk Gusti. Versi nadoman Nurul Hikmah jadi kieu: Ka Alloh abdi nyalindung, dina panggodana setan, Kalayan asma Nu Agung Alloh Anu Welas Asih, ALLOH Nadoman surat Al-Ihlas, kaimanan ulah waswas, Yen Alloh Nu Maha Esa, Alloh Nu Maha Kawasa. Mangga urang sasarengan Kedal ucap pangangkenan yen mung Allah Maha Esa Nu nyiptakeun jagat raya. Mung ka Alloh urang muji, wiridan asma Ilahi, ka Alloh urang neneda, mugi dijaga diriksa Mangga urang kedal lisan kedal ucap pangangkenan Alloh teu kagungan rama sareng teu kagungan putra Alloh Anu Maha Suci henteu aya nu nyasami henteu aya nu nandingan Alloh agung tan wangenan.
