Sanggeus disakompet duankeun ku Pa Adang, dina poe minggu isuk-isuk
kira-kirajam 07.00 WIB kuring nyiapkeun strategi pikeun ngabaleus omongan Pa
Adang waktu di sakola. Kuring muru warung sangu huduk Ibu Tinah anu kasohor
pang gurihna jeung pang pelemna. Harita kuring meuli sangu huduk anu eusina
semur tempe sakeret, goreng bala-bala jeung endog sahulu, hargana Rp. 150.
Meunang ngabungkus, terus kuring menta uyah ka Ibu Tinah "Bu gaduh uyah teu"
Ceuk Ibu Tinah "Gaduh, kangge naon jang?" Tembal kuring "Aya peryogi we, tiasa
teu abdi nyuhunkeun dua sendok?" Teu kungsi lila Ibu Tinah ngasongkeun wadah
uyah bari pokna "Ieu jang, nyandak we sacekapna". Kuring ngawadahan uyah dua
sendok kana duan cau terus dibungkuskeun terus nganuhunkeun ka Ibu Tinah "Hatur
nuhu Bu". Geus kitu kuring indit ka warung kolontong Ibu Ebah rek meuli kopi
Liong sabungkus. Geus meli kopi, terus kuring balik ka imah. Di jero imah terus
kuring ka dapur nyokot muk (cangkir
gede) terus dieusian kopi jeung uyah terus ditinyuh ku cipanas. Kopi
diaduk-aduk ameh uyahna larut. Saterusna kuring kaluar imah bari mawa bungkusan
sangu huduk jeung sacangkir kopi, terus muru ka imah si Ajot batur sakola lain
kelas anu imahna henteu jauh jeung imah Pa Adang. Ajot murid anu deukeut jeung
Pa Adang, da uanggal peuting si Ajot jeung batur-baturna sok ragem aya di imah
Pa Adang. Kasampakeun harita si Ajot keur aya di imahna. "Jot kuring ieu
katitipan bungkusan sangu huduk jeung sacangkir kopi pikeun Pa Adang" ceuk
kuring ka si Ajot. "Leuh sangu huduk ti saha? Tara tisasari maneh bura bere
kieu ka Pa Adang. Atuh anteurkeun we ku maneh sorangan?" tembal si Ajot. Ceuk
kuring "Iiih manehmah, ieu sangu huduk jeung kopi lain ti kuring, tapi titipan
ti Ibu Nita. Pan maneh anu deukeut jeung Pa Adang maneh. Kieu Jot, basa kuring
keur lulumpatan olah raga, panggih jeung Ibu Nita di warung huduk Ibu Tinah,
manehna meuli sangu huduk jeung mawa
sacangkir kopi, basana ceuk Ibu Tinah : Ieu panganterkeun ka Pa Adang"
Ibu Nita nyaeta salah sahiji guru di sakola kuring anu ngajar pelajaran
Keterampilan jeung Kesenian. Ceuk beja Ibu Nita jeung Pa Adang keur
deudeukeutan (bobogohan), da maranehna masih keneh pada lajang.
"Heueuh kitu mah, ku kuring dianteurkeun ka Pa Adang" ceuk Ajot katingalina
sumanget pisan. "Tapi bejakeun ieu sangu huduk langsung ti Ibu Nita, ulah
palantaran kuring nyah, geura indit anteurkeun, sugan maneh meunang ponten alus
ti Pa Adang" ceuk kuring nitah si Ajot supaya buru-buru mikeun bungkusan sangu
huduk. Leos we si Ajot indit, bari kuring nuturkeun rada anggang ti tukang.
Kacaritakeun di imah Pa Adang harita manehna keur aya di teras imah keur
nyihaneut gogodoh (pisang goreng). si Ajot langsung mikeun eta bungkusan sangu
huduk ka Pa Adang. "Pa ieu sangu huduk sareng cikopi titipan ti Ibu Nita" Pa
Adang rada ngerungkeun beungeut, rada heran "Ti bu Nita, ari maneh panggih
dimana jeung Ibu Nita" ceuk Pa Adang ka Ajot. Tembal Ajot ngabohong "Tadi nuju
abdi lari pagi, pendak sareng Ibu Nita di warung sangu huduk Ibu Tinah". Ceuk
Pa Adang "Ooh kitu" bari eta bungkusan sangu huduk dibuka "Geuning haneut keneh
Jot jaba ieu cikopina panas keneh, cocok ieu mah, maneh hayang Jot?" Pa Adang
nawaran si Ajot, ceuk si Ajot "Nuhun Pa, kaleresan abdi tos sarapan, abdi
ngiring raos we" Am eta sangu huduk didahar ku Pa Adang "duh meni pulen ieu
sangu huduk, bisaan nyah nu nyieun ieu sangu huduk" ceuk Pa Adang, eta
bungkusan sangu huduk ampir erep, geus kitu kop kana cikopi, terus surudut
cikopi diuyup, teu lila cikopi diburakeun deu
bari pokna "Aduh jador ieu cikopi naon!!! Rasana meni asin kieu!!" Ajot anu
harita diuk dina korsi gigireunna olohok "Duka atuh Pa, dan abdi mah mung
sakadar nyandak" tembal Ajot.
Kuring dipikajauhan nempokeun henteu kuat hayang seuri dina hate ngomong
"Kabayar, impas ayeuna mah, mantakan ulah nyakompet daunkeun" terus ngibrit
lumpat........... the end.
Kuring anu
