Assalamu'alaikum wr.wb., Katiko urang sadang duduak basamo-samo sambia minun kopi di lapau Randah, maota ka ilia ka mudiak indak jaleh ujuang jo pangkano, tibo-tibo Sutan Panduko nak baru pulang dari rantauno di Taluak Kuantan, batanyo jo suaro agak dikarehan saketek;
'Maa mak Marah. Ambo ka barundiang sapatah jo mamak,' kecek no. 'A du kini Panduko? Laluanlah,' jawek mak Marah. Mandanga urang alah sarupo ka pasambahan tu urang salapau manahan angok sabanta. 'Rundiangan nan ka ambo sampai-an, iyo nak ka mintak sipaik gomah mak. Maagak musim nan samusin kini, kok nan di mukasuik lah dakek nak sampai, nan di ama lah dakek nak pacah, ari basadang laruik juo, tantangan piliah mamiliah, urang nan kajadi pucuak bulek urek tunggang di nagari awak, dek galanggang lah baransua usai, daulu limo nan balago, kini lah tingga duo nan ka dipiliah. Di antaro duo nan tingga ko, alah pulo di timbang-timbang, alah kami patuik elok-elok, alah ditungkuik di talantangkan, caliak jauah lah dilayangkan, caliak ampia lah ditukiakkan, lah nampak candono masiang-masiang, kok kilek baliuang iyolah ka kaki, kilek camin lah ka muko. Sajauah nan tampak di kami, iyo sulik ka mamparambiak, sabab ciek sayuik ciek senteang, raso ka tabedo kaduono. Namun samantangpun baitu, timbua juo cameh jo ragu, takuik juo kami ka gawa, bak mamang mak Marah juo, sio-sio utang tumbuah, kok indak sato kami mamiliah, kok ado pulo mudaraikno, maagak nan ka buahbarino, nan maa bana nan ka dipiliah, iyo nak mintak sipaik kami ka mak Marah. Sakitu rundiangan nan kadisampaian ka mamak,' jano Sutan Panduko. 'Alah sampai di Panduko,' kecek mak Marah pulo. 'Alah mak,' jawek Panduko. 'Ndak dikatoan alah, sapanjang buah rundiangan nan Panduko ka tangahan iyolah nan sabana rundiangan. Namun baitu, indak rago dirantang panjang, dikumpa sajo nak no singkek, dek awak lai baduo batigo pulo disiko, nak ambo pabisiak-an pulo dulu sabanta, basipaik mananti Panduko gak sajamang lai ka elok nan baitu?' kecek mak Marah, tasengeang. 'Lah sabana rancak tu mak,' jawek Panduko. 'Baa go Malin? Dek bisiak lah samo kadangaran, imbau lah samo kalampauan, baa nan ka rancak jano Malin go?' tanyo mak Marah malereangkan etongan ka Malin Ameh konsi baliau. Malin Ameh babisiak-bisiak pulo saketek ka suok jo ka kida sabalun baliak ka mak Marah. 'Maa Marah. Rupono sapanjang nan Marah antaan, iyo lah kami paengongan pulo disiko. Aa nan ka buah bari di kami di siko, sapanjang nan tajapuik tajangkauan dek Marah iyolah sato manompang sin kami. Sampaian banalah di Marah.' 'Lah elok disampaian baliak go kajiko ka Sutan Panduko?' tanyo mak Marah. 'Alah sadang rancak kiro-kiro Marah,' jawek Malin Ameh. 'Ma Panduko,' 'Lai mak,' 'Sapanjang rundiangan nan Panduko katangahan cako, iyo alah sabana taracak dalam undang, alah dalam katantuan nan balaku. Pakaro piliah mamiliah urang nan ka jadi imam, nan ka manarajui nagariko, nan ka jadi urang bapucuak bulek baurek tunggang, iyo paralu bana ditiliak dipareso. Tantangan pilihan nan tingga kinitu, nan alah dicaliak jauah di layangkan, dicaliak ampia ditukiakkan, alah tampak candono masiang-masiang, bak raso ka ciek senteng ciek sayuik, samo ado gawano kaduono. Namun samantangpun baitu, sabuang ka salapeh ari patang, kok awak maninggaan galanggang, lago tatap katajadi juo, eloklah disatoi juo agak sakaki, indak rotan akapun jadi. Sabab kok diuji bana samo merah, diukua bana samo tinggi, tantu ka ado juo siliah jo bedono, tagak awak di nan labiah merah, dipaciak nan labiah tinggi, sasudah itu ka Allah kito mamohon, mintak pitunjuak jo patolongan, mudah-mudahan tahinda sagalo nan buruak, indak tajadi sio-sio utang tumbuah, sakitu nan dapek di ambo manyampaian, alah ka sanang ati Panduko.' 'Alah sampai di mak Marah,' 'Kiro-kiro,' jawek mak Marah. 'Indak rago ambo rantang panjang, dikumpa sajo nak nyo singkek, sapanjang nan mamak curaipapakan, dalam pakaro piliah mamiliah, walaupun nan ka dipiliah indak mudah, dek ciek senteng ciek sayuik, tapi dek sabuang ka salapeh ari patang, indak elok awak maninggaan galanggang, diuji bana samo merah, diukua bana samo tinggi, dipiliah juo nan labiah elok ciek di antaro duo, indak rotan akapun jadi. Limbak nan daripado itu, kapado Allah kito mandoa mudah-mudahan tahinda sagalo nan buruak, tapaliaro nagari kito, kan baitu bana du mak?' 'Bana, insya Allah,' jawek mak Marah. 'Indak do lai dek pintak lah buliah kandak lah balaku lah sanang pulo ati kami, mak. Sabanyak nan mamak curaikan tadi, ketek tapak tangan jo niru kami tampuangkan,' kecek Sutan Panduko nan pagarah tu manyudahi pasambahan. Wassalamu'alaikum wr.wb., Lembang Alam ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
