Sidi Maghindo, nan sadang duduak disuduik mahiruik teh talua, iyo sabana panasaran, baa dek sampai disitu sajo caritonyo...??. Indak tahan manahan diri, Sidi Maghindo, manangkek tangan, saroman urang di DPRD kabatanyo,.... "Mak Marah..., jo Sutan Paduko, tolonglah ambo dimaafkan...., iyo indak tahan dek ambo untuak batanyo ka bakeh mak Marah, jo Sutan Paduko....." "A.......apo pulo nan angku tanyokan Sidi...?" jawek mak Marah. Urang salapau mamasang talingo, manunggu apo kalanjutan nan ka tajadi. "Ambo iyo indak bisa papantun, bagurindam doh mak, cando mak Marah jo Sutan Paduko cako tu. Tapi io sanabana panasaran ambo. Apo sampai disitu tadi tu pituah piliah mamiliah pucuak...pucuak a..tadi tu mak...", Sidi Maghindo manjawek mak Marah "Pucuak bulek urek tunggang....", jawek mak Marah "A..., iyo pucuek bulek...., pucuak bulek nan maa nan harus kito piliah mak...?.. Kalau di ambo, dek karano nan ciek senteang, nan ciek lai sayuik, kalau indak ciek juo nan kito piliah baa pandapek mak Marah tu...?". Tanyo Sidi Mangindo langsuang kapokok masalah.
'Kan alah den sampaikan, cako Sidi. Indak elok maninggakan galanggang. Rancak sato pulo awak sakaki. Mukasuik den, datang juolah kito ka TPS tu barisuak ko, ikuik manantukan sia nan kajadi urek bulek aka tunggang nagari kito, ko......". Mak Marak manjalehkan. Urang salapau mulai babisiak suok kida. "Ambo indak satuju, mak...!. Dek karano, nan surang sabananyo bisano mangamek-ngamek sajo. Nan ciek lai, kaki tangan urang lain. Kalau beko inyo gadaikan nagari ko, kito tabaok rendong.., mak..!!." Sisi Maghindo mulai kareh suaro nyo. Urang salapau manahan angok. "Jadi baa nan sarancak nyo dek angku Sidi...?."manyelo Malin Ameh "Iko, nan paliang rancak kito karajokan..." jawek Sidi Maghindo. "Kito datang ka galanggang. Indak sakadar datang, tapi masuak ka galanggang. Ambiak karateh suaro, baok kabiliak pancoblosan, cucuak ka ampek-ampek gambar nan ado di karateh tu....!!". "Baa dek ka ampeak-ampeak e dicucuak...?" manyelo Ajo Laweh. "Supayo, karateh suaro tu, indak dicucuak dek urang lain..., Jo. Ajo kan banyak mandanga baa ciluah nyo pamilu kapatang ko. Kalau kito indak mancucuak, baeko dipagunokan dek urang lain....,urang lain nan mancucuak kan karateh tu... A tantu inyo cucuak an nan katju dek inyo...!. Jadi..., dunsanak kasadonyo...baa gak ati....?" Sidi Maghindo samangkin basumangaik. Urang mulai heboh di lapau randah tu. Ado nan satuju jo Sidi Maghindo, ado pulo nan indak satuju. " Ambek cah...!" , mak Marah mangareh kan suaronyo. Urang tadiam kasadonyo. "Sarancag nyo, pakaro piliah mamiliah pucuek bulek nangko, kito sarahkan sajo ka hati nurani masiang-masiang...., supayo indak tajadi silang sangketo...., baa tu gak ati...?", mak arah batnyo ka urang salapau. "......a....., iyo cocok bana tu mah, mak......", jawek urang salapau randah. Akhianyo, urang baliak ka kopi no surang-surang. Lapau taraso agak haniang........... Sidi Maghindo, maghiruik rokoknyo..., dalam hati inyo bagumam,".... carito ko alun salasai.......". stlembang_alam <[EMAIL PROTECTED]> wrote: Assalamu'alaikum wr.wb., Katiko urang sadang duduak basamo-samo sambia minun kopi di lapau Randah, maota ka ilia ka mudiak indak jaleh ujuang jo pangkano, tibo-tibo Sutan Panduko nak baru pulang dari rantauno di Taluak Kuantan, batanyo jo suaro agak dikarehan saketek; 'Maa mak Marah. Ambo ka barundiang sapatah jo mamak,' kecek no. 'A du kini Panduko? Laluanlah,' jawek mak Marah. Mandanga urang alah sarupo ka pasambahan tu urang salapau manahan angok sabanta. 'Rundiangan nan ka ambo sampai-an, iyo nak ka mintak sipaik gomah mak. Maagak musim nan samusin kini, kok nan di mukasuik lah dakek nak sampai, nan di ama lah dakek nak pacah, ari basadang laruik juo, tantangan piliah mamiliah, urang nan kajadi pucuak bulek urek tunggang di nagari awak, dek galanggang lah baransua usai, daulu limo nan balago, kini lah tingga duo nan ka dipiliah. Di antaro duo nan tingga ko, alah pulo di timbang-timbang, alah kami patuik elok-elok, alah ditungkuik di talantangkan, caliak jauah lah dilayangkan, caliak ampia lah ditukiakkan, lah nampak candono masiang-masiang, kok kilek baliuang iyolah ka kaki, kilek camin lah ka muko. Sajauah nan tampak di kami, iyo sulik ka mamparambiak, sabab ciek sayuik ciek senteang, raso ka tabedo kaduono. Namun samantangpun baitu, timbua juo cameh jo ragu, takuik juo kami ka gawa, bak mamang mak Marah juo, sio-sio utang tumbuah, kok indak sato kami mamiliah, kok ado pulo mudaraikno, maagak nan ka buahbarino, nan maa bana nan ka dipiliah, iyo nak mintak sipaik kami ka mak Marah. Sakitu rundiangan nan kadisampaian ka mamak,' jano Sutan Panduko. 'Alah sampai di Panduko,' kecek mak Marah pulo. 'Alah mak,' jawek Panduko. 'Ndak dikatoan alah, sapanjang buah rundiangan nan Panduko ka tangahan iyolah nan sabana rundiangan. Namun baitu, indak rago dirantang panjang, dikumpa sajo nak no singkek, dek awak lai baduo batigo pulo disiko, nak ambo pabisiak-an pulo dulu sabanta, basipaik mananti Panduko gak sajamang lai ka elok nan baitu?' kecek mak Marah, tasengeang. 'Lah sabana rancak tu mak,' jawek Panduko. 'Baa go Malin? Dek bisiak lah samo kadangaran, imbau lah samo kalampauan, baa nan ka rancak jano Malin go?' tanyo mak Marah malereangkan etongan ka Malin Ameh konsi baliau. Malin Ameh babisiak-bisiak pulo saketek ka suok jo ka kida sabalun baliak ka mak Marah. 'Maa Marah. Rupono sapanjang nan Marah antaan, iyo lah kami paengongan pulo disiko. Aa nan ka buah bari di kami di siko, sapanjang nan tajapuik tajangkauan dek Marah iyolah sato manompang sin kami. Sampaian banalah di Marah.' 'Lah elok disampaian baliak go kajiko ka Sutan Panduko?' tanyo mak Marah. 'Alah sadang rancak kiro-kiro Marah,' jawek Malin Ameh. 'Ma Panduko,' 'Lai mak,' 'Sapanjang rundiangan nan Panduko katangahan cako, iyo alah sabana taracak dalam undang, alah dalam katantuan nan balaku. Pakaro piliah mamiliah urang nan ka jadi imam, nan ka manarajui nagariko, nan ka jadi urang bapucuak bulek baurek tunggang, iyo paralu bana ditiliak dipareso. Tantangan pilihan nan tingga kinitu, nan alah dicaliak jauah di layangkan, dicaliak ampia ditukiakkan, alah tampak candono masiang-masiang, bak raso ka ciek senteng ciek sayuik, samo ado gawano kaduono. Namun samantangpun baitu, sabuang ka salapeh ari patang, kok awak maninggaan galanggang, lago tatap katajadi juo, eloklah disatoi juo agak sakaki, indak rotan akapun jadi. Sabab kok diuji bana samo merah, diukua bana samo tinggi, tantu ka ado juo siliah jo bedono, tagak awak di nan labiah merah, dipaciak nan labiah tinggi, sasudah itu ka Allah kito mamohon, mintak pitunjuak jo patolongan, mudah-mudahan tahinda sagalo nan buruak, indak tajadi sio-sio utang tumbuah, sakitu nan dapek di ambo manyampaian, alah ka sanang ati Panduko.' 'Alah sampai di mak Marah,' 'Kiro-kiro,' jawek mak Marah. 'Indak rago ambo rantang panjang, dikumpa sajo nak nyo singkek, sapanjang nan mamak curaipapakan, dalam pakaro piliah mamiliah, walaupun nan ka dipiliah indak mudah, dek ciek senteng ciek sayuik, tapi dek sabuang ka salapeh ari patang, indak elok awak maninggaan galanggang, diuji bana samo merah, diukua bana samo tinggi, dipiliah juo nan labiah elok ciek di antaro duo, indak rotan akapun jadi. Limbak nan daripado itu, kapado Allah kito mandoa mudah-mudahan tahinda sagalo nan buruak, tapaliaro nagari kito, kan baitu bana du mak?' 'Bana, insya Allah,' jawek mak Marah. 'Indak do lai dek pintak lah buliah kandak lah balaku lah sanang pulo ati kami, mak. Sabanyak nan mamak curaikan tadi, ketek tapak tangan jo niru kami tampuangkan,' kecek Sutan Panduko nan pagarah tu manyudahi pasambahan. Wassalamu'alaikum wr.wb., Lembang Alam ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________ ** Anakbangsa : EmErDe Palar ** --------------------------------- Do you Yahoo!? New and Improved Yahoo! Mail - 100MB free storage! ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
