Assalaamu'alaikum wa rahmatullahi wa barakaatuhu, Angku Boes,
Manuruik pandapek ambo nan sangaik dangka, arati manjalankan syariah Islamko adolah managakkan aturan, hukum, baiak untuak urusan muamalah sasamo manusia maupun untuak urusan jo Tuhan Allah manuruik nan diparintahkan dek Allah Ta'ala di dalam Al Quran. Iduik awak di ateh duniako kan iyo indak ka bisa lapeh dari paraturan-paraturan do. Katiko awak bajalan di labuah gadang ado paraturan lalu-lintas, katiko awak bajua bali ado paraturan dagang, katiko awak bakarajo ado paraturan upah maupah di parusahaan tampek awak bakarajo. Sagalo macam paraturan tu mustino dikawal jo 'hukum', jo katatapan nan jaleh untuak kapantiangan basamo. Kadang-kadang humumko taraso kareh ka suatu pihak, dek awakno tipak nan kanai ka dihukum, padohal padanan karajo nan manyababan awakno ka dihukum tu jauah labiah parah pulo lai. Ambo ambiak contoh ketek, biasono iko nan sangaik bana disorot dek urang-urang orientalis, tantang hukum qisas. Tahun 95, di daerah Jakarta Timur ado sakalompok kaluarga (surang laki-laki, jo anakno, jo kamanakanno) mambantai, mambunuah sacaro 'keji' surang padusi jo 3 urang anak-anakno. Katiko dibao kapangadilan, kanailah awakno jo hukuman duo puluah tahun pinjaro, nan biasono, jo pangurangan hukuman berkala, hukuman tu mungkin bisa manjadi tingga 10 atau 12 tahun. Hukum sarupo iko salah kecek al Quran. Urang nan mambunuahtu wajib hukumno, sabana wajib, sarupo jo wajibno manjalankan puaso, untuak dihukum mati jo hukum qisas. Iko Al Quran nan mamarintahkan. Baa mangko mantun? Kecek al Quran pulo supayo ado jaminan katanangan hiduik dek kalian, wahai urang-urang nan baraka. Supayo takuik urang, supayo indak basilanteh angan sin urang mambunuah urang lain. Cubolah awak caliak kanyatoanno. Jo hukum nan ado kiniko, di nagai awak Indonesiako. indak ado takuikno saketek juo urang main bunuah do. Iko sabuah contoh. Contoh kaduo, ampia samo, pakaro ciluik, pakaro maambiak arato urang lain. Jaleh katatapan di dalam al Quran tantang hukum nan musti di tagak-an untuak mangeliminasi rampok rampeh, ciluik maliang ko. Karek tanganno urang nan manciluik tu! Baa aturanno, ciluik sagadang aa nan musti dikarek tanganno tu, iko diaturno di hadits Rasulullah. Tapi kecek hukum nan balaku kiniko, ciluik ayam masuak pinjaro sakian bulan, cilok kain urang tajamua masuak pinjaro sakian bulan. Ciluik arato nagara sakian milyar indak jaleh amek kama paino. Kan nampak nan bahaso hukum awak nan balaku kiniko sabanano timpang sarato indak adia? Tapi urang alergi juo jo hukum Islam, di nagari nan panduduakno mayoritas baagamo Islam ko. Contoh katigo, pakaro zina. Parintah al Quran nan partamu tantang zinako adolah 'jaan didakek-i zina'. Jan dicari-cari urusan nan ka mambao awak sampai tataruang dek parzinaan ko. Banyak jalan nan musti di sandereh-an sabalun tajadi zina tu dan iko diaturno dek Islam, ado di dalam al Quran, atau sudahtu biko ado ditarang-an dek hadits-hadits Rasulullah. Muloi jo caro bapakaian urang padusi. Tutuik rapek-rapek aurat awaktu supayo jan mamanciang gairah urang laki-laki. Iko katantuan, iko dijalehkan dek syariat, ado dalam al Quran. Tapi 'awak' basipakak juo. Mancari-cari helah juo, sainggo tajadi juolah nan katajadi. Indak tangguang-tanguang lo santiangno urang awak di Indonesiako, bahkan 'ya sudah, dilokalisir sajo tampek bazinatu'. Aa nan tajadi sasudah itu? Samakin marak urang bazina, indak takuik-takuik bagai urang do kaiduik 'kumpul kebo'. Walaupun awal-awalno bana hukum nan diwarisi dari Bulando maancam juo ka pazinahan tu. Tapi difinisino alah jauah panggang dari api. Kalau urang tu suko samo suko indak tamsuak kategori bazina lai. Kan iyo abih padi dek jawi jadino lai. Namun awak indak picayo juo. Jano al Quran, dera urang nan bazinatu. Jano nabi Shallallahu 'alaihi wasallam, rajam urang pazina nan alah bakaluarga tu. Jo urang-urang nan bapaham orientalis, ih kejaaam...hukum Islam tu. Padohal Allah Ta'ala manyipaikkan bana, cubolah silau baliak di surek al Maidah ayat 50 (Apakah hukum jahiliyah yang mereka kehendaki? Dan hukum siapakah yang lebih baik daripada hukum Allah bagi orang-orang yang yakin?). Cubo pulolah simak diujuang-ujuang ayat 44, 45 jo 47. (Barangsiapa yang tidak memutuskan hukum menurut yang diturunkan Allah, maka mereka adalah orang-orang kafir (44), adalah orang-orang zhalim (45), adalah orang-orang fasik (47).) Baa mangko awak indak picayo juo? Kalau awak indak picayo, indak amuah mangarajoan parintah Allah, indak manjalankan hukum sarupo nan ditatapan Allah yo itulah nilai awak di hadok-an Tuhan Allah. Kalau indak tagoloang kadalam kalompok kapia, kok indak zhalim, kok indak pasiak. Urang-urang nan basungguah-sungguah baimanno, musti maarok-an musti baikhtiar supayo hukum Allah ko tagak. Bahaso sasudah itu biko alun juo kasampaian lain urusanno, samo kito mintak-an ka Tuhan Allah katolonganNo. Ambo iyo salut jo usao urang-urang Islam di Canada tu marintis tagakno syariat Islam bagi komunitas Islam disinan. Nan takuik kapado tagakno syariat Islam dimaa sajo di ateh bumi Allah ko indak lain salain dari musuah-musuah Allah. Baitu kayakinan ambo. Mudah-mudahan bamanfaat. Wasalaamu'alaikum, Lembang Alam ----- Original Message ----- From: "boes" <[EMAIL PROTECTED]> To: <[EMAIL PROTECTED]> Cc: <[email protected]> Sent: Sunday, September 11, 2005 9:42 AM Subject: [EMAIL PROTECTED] Shariah Islam Akhir² ini Toronto heboh dengan dua kata bahasa Arab, Shariah Islam. Shariah Islam akan diagendakan dalam kehidupan masyarakat Islam dan sedang diperjuangkan untuk mendapat legalisasi ke Pemerintah Canada. Website http://www.rantaunet.org _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ____________________________________________________
