Assalaamu'alaikum wa rahmatullaahi wa barakaatuhu,
Ambo indak panah mandanga istilah "Tahlilan" di Kampuang Awak doh saroman
nan Angku Lembang tarangkan sacaro detail tu. Nan tadanga dan nan diadokan
cuma mandoa "Manujuah Hari".
Inti dari manujuah hari ko tampak di ambo cuma mangumpuakan
dunsanak-dunsanak dakek nan tadinyo lah basamo-samo ikuik manyalanggarokan
panguburan almarhum atau almarhumah. Itu rasonyo dianggap sabagai raso
tarimo kasih dari ahli waris ka sanak kirabat sadono. Nan datang cuma nan
dakek-dakek sajo nan manggikuti suasana barusuah hati muloi dari hari
maningga sampai mangubuakan sarato "manaiakkan pusaro".
Memang diadokan "jamuan makan" (nan biaso pulo diababuik "madoa") dan
dibacokan salawat tambah saliang maoh-mamaohkan sado kito nan tingga, antah
bilo lo ka tibo giliran awak, untuak mampaharek raso kasiah sayang
antaro Sanak Sudaro sakorong kampuang.
Ka ahli bahaso Arab, ambo batanyo, apo asa kato "TAHLILAN" ko? Kok indak
ado nan jaleh, tantu baliak lo awak ka Rangkayo Rahima manjalehkanno.
Salam,
--Nyiak Sunguik
44199
From: "Muhammad Dafiq Saib" <[EMAIL PROTECTED]>
Date: Fri Nov 11, 2005 3:26am
Subject: Re: [EMAIL PROTECTED] Mengenai Tahlilan [EMAIL PROTECTED]
Assalaamu'alaikum wa rahmatullaahi wa barakaatuhu,
Tahlilan jo tata caro maadokan mangaji (biasono) Yasiin basamo-samo, di
daului sarato disudahi jo mambaco 'kalimat thayyibah' kecek nan mambao
acara, yoitu mambaco awal surek al Baqarah, ayat Kursiy, akhir surek al
Baqarah, surek al Ikhlas, al 'Alaq jo anNaas, sudah itu mambaco tahlil Laa
ilahaillaalaah basamo-samo dst. dst., lalu kecek nan mambao acara kasadoan
amalan taditu pahalono dikiriman untuak nan mati. Sudah itu dibacoan doa,
diawali jo mambaco surek al Fatihah baulang-ulang, masiang-masiang
dikirinan ka arwah nabi Muhammad Shallallahu 'alaihi wasallam, ka arwah para
sahabat, ka arwah Syekh Abdul Kadir Jailani, tarakhir ka si mati di rumah
nan maadoan tahlillan taditu. Panutuik acara biko, tuan rumah
mambagi-bagikan besek, kotak baisi nasi jo lauak pauak, sadangkan juadah
kue-kue nan dikatangahan tuan rumah salain dimakan saketek, ba
pamasuak-masuakan pulo ka dalam kotan/besek nan dek para hadirin sudah itu
dibao pulang, sabagai 'barakaik' kecek mareka.
Sarupo itu acara tahlilan nan tampak di ambo baiak salamo sapakan sasudah
urang mati, sudah itu hari ka 40, hari ka saratuih, hari ka saribu dsb.
Iko memang mandarahdagiang di samantaro masyarakaik baitu pulo di
lingkuangan tampek ambo tingga kiniko, walaupun sacaro baransua-ransua alah
barubah juo saketek.
Katiko tajadi kamatian nan ado tuntunan Rasulullah adolah mandatangi
kaluarga si mati untuak manghibur nan disabuik 'takziah'. Ma'na dari takziah
ko adolah untuah manghibur kaluarga simati, disampiang untuak, manganaan
bahaso sado awak pasti ka mati pulo, jadi supayo basiap-siap maadoki
kamatiantu. Dan manolong maagiah makan ka kaluarga si matitu sarupo hadits
baliau nan diriwayatkan dari Abdullah bin Ja'far, nan mangecek-an; Tatkalo
datang kaba kamatian Ja'far (tabunuah dalam parang) Rasulullah SAW basabda;
'Buek-an makanan untuak kaluarga Ja'far karano alah manimpo mareka
kamalangan nan manyusahkan mareka.' (Hadits riwayat Bukhari - Muslim).
Sadangkan dalam paraktek tahlilan nan balaku di sabagian masyarakaik awaktu
banyak kasalahan-kasalahan nyato sarupo barikuik;
1. Dibaco Yasiin sarato surek-surek nan lain barami-rami. Iko alah
batantangan jo parintah mambaco al Quran nan ado didalam ayat al Quran
sandiri, ' Apobilo dibacokan al Quran handaklah angkau dangakan elok-elok
dan angkau diam supayo angkau mandapek rahmat (Q-7: 204).'
Mambaco barami-rami, sabagian mambaco teks batulisan latin dek sabanano
butohuruf Arab adolah amalan bodoh dan salah dan mangado-ado, dek maraso nan
bahaso mambaco Quran tu mamproduksi pahalo. Padohal mmapabiyaan urang salah
mambaco al Quran tanpa mameloki bacoanno tu, alah tamasuak kakaliruan.
2. Mamproduksi pahalo untuak dikiriman ka simati.
Kecek sia awak mambuek pahalo kalau nan dikarajoan tu salah. Kalau bacoan
awak itu indak batua. Kalau urang mambaco sacaro indak batua di sampiang
awak tapi awak pabiyaan sajo. Amalan nan ka dapek pahalo tu adolah amalan
nan Allah ridha awak malakukanno. Kecek Allah tantang taratik di dakek urang
mambaco al Quran adolah sarupo ayat (Q-7: 204) di ateh tadi. Jadi kiro-kiro
lai ka ridha Allah kalau awak karajoan nan sabaliakno? Lai kadapek pahalo
awak du kiro-kiro?
3. Pahalo nan dibuektu ka dikiriman ka urang nan alah mati.
Jo aa ka dikiriman? Sia nan ka mambao pakirin awak? Amalan awaktu, kalau
Allah ridha, indak kamungkin ka untuak urang lain jatuahno do. Indak ka
mungkin ka dibuek-an untuak urang lain do. Firman Allah, ' Dan bahwasanya
manusia itu hanya memperoleh ganjaran dari perbuatan (amal) yang
dilakukannya. (Q-53: 39)'
Mangiriman amal ka urang mati samo rumik jo indak mungkinno jo mambagi
sehaik awak jo urang sakik. Ado dunsanak awak sakik kareh, mandarito sangaik
dek sakikno tu. Awak sihaik walafiat, ingin awak mambagi sehaik awakko jo
dunsanak awak nan sakiktu. Indak dapek doh.
4. Tamasuak pulo mambagi pahalo bacoan al Fatihah ka arwah nabi, ka arwah
sahabat-sahabat nabi, ka arwah syekh Abdul Kadir Jailani.
Iko jaleh parbuatan maado-ado nan indak ado dalilno. Nan ado tuntunan nabi
hanyolah bashalawat kapado baliau jo caro nan alah baliau ajakan pulo
bacoanno. Indak ado baliau mintak pakirim pahalo bacoan al Fatihah do. Tapi
manuruik 'pambao acara' jo caro iko awak maambiak barakaik nabi jo para
sahabaik bahkan syekh Abdul Kadir Jaelani supayo baliau-baliauko mandakek-an
awak ka Tuhan Allah. Jadi awak mandakek ka Allah jo caro KKN, indak
langsuang sajo bamohon do. Antah dima asa usua ilimuko.
5. Dibarek-i tuan rumah nan sadang kamalangan tu untuak manjamu awak.
Batantangan jo parintah nabi di hadits nan awak sabuik di ateh, supayo awak
maringankan pandaritaan urang nan kanai musibah. Iko manjadi tradisi,
sainggo indak buliah mangecek-an indak. Tapasolah urang nan kamatian
manjua/manggadai untuak maadokan malam tahlilan. Supayo urang datang
mangiriman pahalo sudah itu urang-urangko dijamu, dibuek-an besek. Saandaino
ciek besek banilai 7500 rupiah sajo, nan datang batahlilan 40 urang,
etonglah surang bara ka barek baban si ahli musibah jadino. Bapahalo du awak
jo amalan nan sarupo itu?
6. Untuak ustad nan mamimpin tahlilan tu baresek-an pulo amplop saketek
kasakuihno.
Ikopun panjapuik barakaik malalui urang siak. Masya Allah. Jadi manggalehno
kirono kapalo urang siak cako tu di rumah urang nan kamatian. Bahonor pulono
untuak mamimpin acara tadi. Indak salasai pulo 'adaik' kalau indak
diresek-an tu amplop kasakuihno. Labiah buruakno kadang-kadang, kok indak
diresek-an, jadi sabuik-an di labuah sudah itu. Kosong doang, jano. Masya
Allah.
7. Saandaino nan mati adolah kapalo kaluarga, nan maninggaan anak-anak yatim
dibalakangno.
Mako urang-urang nan hadir di acara tahlilan tu alah mamakan arato anak
yatim, nan Allah maingek-an, bahkan mandakek-ino sajo dilarang. 'Jaan kalian
dakek-i arato anak yatim,' firman Allah. Awak nan hadir bagalak-galak,
tega-teganya, malakukan, mamakan arato nan ditinggaan si mati untuak
anak-anakno. Cubolah etong baliak bara pokok samalam tahlilan, bara jadino
kalau sapakan, bara pulo untuak 40 hari, saratuih hari, bara pulo untuak
sataun, untuak saribu hari.
Namun... marubah tradisi iyo indak mudah. Dilingkuangan ambo tingga kini,
alah 13 taun ambo manyampaian katarangan sarupo nan di ateh tu. Dari 100
persen tahlilan katiko ambo datang, kini baru kiro-kiro 50% nan barubah.
Ambo nan kabatulan dijadikan imam musajik dilingkuanganko, jadi katua
musajik, satiok kali diundang tahlilan indak panah ambo amuah datang.
Masyarakaik alhamdulillah lai pulang maklum pulo. Lai indak ado nan sampai
mamusuahi ambo do. Mudah-mudahan jangan sampai. Ambo baru amuah hadir kalau
diadokan acara takziah, nan indak ado acara-acara sarupo diateh. Kalau ambo
dimintak manyampai-an wirid-wirid ketek, itu juo nan ambo ulang-ulang, awak
indak mungkin mangiriman pahalo ka urang mati do.
Mudah-mudahan bamanfaat.
Wassalaamu'alaikum,
Lembang Alam
Internal Virus Database is out-of-date.
Checked by AVG Anti-Virus.
Version: 7.1.361 / Virus Database: 267.12.6/151 - Release Date: 10/28/2005
Website http://www.rantaunet.org
_____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
____________________________________________________
