Wa'alaikumsalamwarahmatullahiwabarakaatuhu. Dik Wady dan dunsanak nan dirahmati Allah Ta'ala.
Sabananyo bau muluik ko harus dihindari samaksimal mungkin, bukan hanyo wukatu shalat sajo, tapi dimaa sajo awak barado, dan jo sia se awak mangecek, dek itulah mungkin Rasulullah dalam sebuah hadist nan shahih mangecean: "Kalaulah tidak karena memberatkan ummatku, maka sungguh aku akan menyuruh mereka siwak(gosok gigi), setiap kali hendak shalat". Ado nan agak stek ambo binguang, didalam ilmu kesehatan nan ambo pelajari samaso mudo-mudo dulunyo(emang sakarang alah tuo...hehehehe, gaya sajonyo tu, itulah bahaso nan dek Wady kecean, jan dicaliak gaya seseorang manulih, tapi caliak isinyo), bahwa manggosok gigi tu menurut kesehatan maksimal 2-3 kali(jan balabiah, dek kalau acok manggosok gigi, maka hilanglah pikmen (maaf kalau salah tulih, tapi mukasuik pikmen itu adolah lapisan untuk menjaga gigi agar jan sampai tipis, rusak, etc..). Samantaro Rasulullah mangecean "setiap kali shalat". Kalaulah indak kuaik iman didado, dan mampagunakan akal ka arah membenarkan hadist Rasulullah, bisa-bisa manyalahkan hadist shahih tu. Ambo bapikia, siwak indak samo jo gosok gigi, sabab siwak tu mamakai semacam alat (tabuaik dari kayuan), samantaro gosok gigi, awakkan pakai odol(pasta gigi), mungkin iko benar dek kecek para pakar doktor gigi, ado zat kimianyo untuak manipihkan pikmen gigi, sahinggo kalau balabiahan mamakainyo, indak rancak buaik kesehatan juo, samantaro siwak(kayu) tadi, indak ado zat kimianyo, tapi sabana asli buatan Allah Ta'ala. Dari siko batambah kaimanan awak, bahwa nan asli, alami tantu indak samo jo bikinan manusia.Ini bukan bararti pulo ambo mangeceak bahwa siwak labiah elok daripado gosok gigi, maka pakailah siwak, indak pakai gogok gigi. Indak baitu doh, ambo surang pakai gosok gigi, ambo kecean tu, dek tapikia diambo antara sabda Rasulullah manggosok gigi setiap kali shalat, samantaro kecek doktor gigi nan ambo danga, maksimal2-3 kali gosok gigi, jan acok bana, sabab bisa manghilangkan pikmen gigi). (lagi-lagi tapaso dijalehi bana, agar jan sampai dikatoan pakai kaco mato kudo pulo, apo-apo disiko nampaknyo harus bajalehan bana antaro A_Z, vokal dan diftongnyo). Baliak kapado masalah gosok gigi ko, memang sarancaknyo awak mamaliharo muluik dari pado bau. Sabab memang sangaiklah mangganggu teman bicara sasamo awak. Taruih tarang sajo, ambo dulu punyo teman akrab(indak basabuik namonyo, dek takuik gunciang, sabab kalau ambo kecean namonyo, ambo manggunjinginyo, balain jo peringatan indak bagunjiang, disabuik namo malah paralu, mudah-mudahan awak bisa mambadekan maa nan buliah maa nan indak buliah dalam ugamo).Ambo mangecek carito teman ko agar isinyo, atau inti carito menjadi pelajaran samo awak. Teman ambo ko, urangnyo elok bana, sangaiklah sayangnyo ka ambo, sabana-bana sayang, perhatian ka ambo, saking sayangnyopun liau ko cemburu bana kalau ambo dakek jo teman padusi nan lain, maunyo ambo dakek ka inyo se, indak kanan lain, baitulah saking sayangnyo ka ambo, satiok kali urang tuonyo datang dari kampuang mambawo sagalo macam samba lamak, tau selah baa masakan urang Minang nan asli kampuang, iyo lamak bana, ambo diagiah taruih. Tiok minggu acok urang tuonyo mambawa sambal dan macam2 ka asrama(ambo diasrama diniyyah katiko tu, salamo ampek taun). Ambo sabananyo sayang ka teman amboko, tapi ado nan salalu manggaja dihati ambo, ambo taraso indak lamak, kalau mangecek kainyo, dek bau sangaik muluiknyo.Tampek tidua ambo badakatan ka inyo(basampingan), dan kalau pai kasikola samo-samo, tantu acok mangecek salamo dijalan, di sekolah badakatan bangku juo, pokonyo taruih dari pagi-malam, banyak basamonyo sajo. Bau muluiknyo ko manjadi problema gadang diambo, ka dikecean langsuang takuiknyo tasingguang, indak dikecean ambo tasiksa bathin.Ingin pindah tampek tidua biar agak bajauhan darinyo, tambah gawat, tasingguang gadang, dan bisa-bisa manangih bareknyo dek ambo jauhi, liau ko tagantaung bana ka ambo. Akhianyo manahan hati selah ambo salamo satu tahun. Sampai di taun salanjuiknyo ado liburan, masiang-masiang pulang kampuang, ambo juo pulang ka Siantar. Tapi ambo sangajo baliak capek ka asrama, untuak maambiak tampek jauah darinyo. Satiok taun diasrama, kalaulah kanaikan kelas, mako kamar asramapun batuka, dari tingkek ateh kabawah, atau dari tingkak bawah ka tingkaek dua, baitulah patukaran asrama satiok taun. Moment patukaran asrama ko ambo ambiak kesempatan bana, bia bajauhan darinyo, meski sabalunnyo teman ambo ko mangecean kalau ambo datang labiah daulu, tolong diambiak tampek tiduanyo basampingan juo dari ambo. Katiko tu, memang ambo ambiak tampek tidua ka inyo, ambo bereskan kamarnyo, dirapikan, tapi bajauahan jo tampek tidua ambo, mukasuik ambo memang hemdak jauh darinyo, bukan karena apo-apo, tapi dek karano masalah bau muluik ko sajo(indak ado alasan lain, sabab teman ko elok, rajin, sayang ka ambo, tapi itulah kakurangannyo nan sangaik mangganggu ambo bana). Katikonyo datang, liau ko sangaiklah sadiahnyo sabab bajauhan dari ambo. Ambopun sabana sadiah. Ambo mancubo memberi pangaratian ka inyo, sebab tampek tidua disampiang ambo ko alah diambiak dek teman nan lain juo(nan akhianyo teman disampiang iko akhianyo menjadi teman akrab ambo sampai kini bataun-taun lamonyo keakraban itu tajalin, sampai ambo ka Kairo, inyo ka Malaysia, dek inyopun manikah jo urang Malaysia, urangnyo cantik, mato biru kulik aluih pokonyo persis urang Barat rancaknyo, makanyo banyak lelaki suko ka inyo katiko tu. urangnyo indak kayo, buliah dikatoan sangaiklah prihatin kahidupannyo, biaya se sikolah nan tapaso manangguang dan inyo tapaso karajo di kantua sapulang dari sikola, Liau ko panyayang juo ka ambo, perhatian, dan liaulah nan maajari ambo baa maucapkan huruf AlQuran nan fasiah, liau qariah nasional samaso tu, dari sisi lafaz AlQuran memang inyo nan diateh ambo, tapi kalau juara kelas, tetap ambo diateh, ambo no 1 biasonyo inyo kalimo atau katujuah, samantaro teman ambo nan ambo kecean bau muluiknyo tu, juara 4,5 atau 6, indak jauh beda dari teman ambo nan qariah nasional ini. Kaduo-duonyo sayang ka ambo, samo-samo pintar, tapi ciek nan kayo tu, urang kayo dikampuangnyo, nan ciek lai, sangaiklah prihatin kehidupannyo. Ambo piliah nan buliah dikatoan miskin bana, bukan nan kayo tu.Jadi dalam betemanpun ambo bukan mamiliah ma nan kayo, ma nan bamanfaik sisi materi ka ambo, indak, samo sakali indak, tapi keihklasan hati, baa banapun kayonyo urang, tapi hati awak kainyo taraso tatahan buat apolah.(dan masalah mamiliah urangko sampai tabawo dalam mamiliah suami, ambo malepeh an lalaki anak urang kayo, mamiliah lalaki anak petani, suami ambo sakarang). Kaduo lalaki tu dulunyo sayang kaambo, samo alim, elok, pintar, wajah samo satu ganteng, satu tampan, satu putiah satu hitam manih, dan babedo sisi material, tapi sisi lain masiang-masiang punyo kalabihan, ambo pilih tantu bukan nan kalabiahan material(karena itu sifaiknyo duniawi, tapi ambo piliah nan ambo raso bisa labiah mandakekan ambo kapada Allah Ta'ala dan akhiraik). Jo teman nan bau muluik tadi, dek tampek bajauhan, mulonyo memang masih pai sikola samo-samo, ambiak nasi dan samba ka dapua makan samo-samo juo, tapi tidua indak lai bedekatan, mulai bakurang stek demi stek pergaulan dan kedekatan ka inyo. Hari demi hari, dek ambo samakin dakek jo teman nan tampek tidua disampiang amboko, mulonyo kami batiga, apo-apo batiga. Ambo teman lamo dan teman baruko.Tiga sejoli kecek teman-teman nan lain. Hari demi hari, kelihatannyo ambo jauah labiah dakek dengan teman baru ko(inyo dari kalimantan). Kecek urang, samakin acok bakomunikasi, maka itulah nan samakin arek, katimbang nan jarang bakomunikasi, memang itu ambo alami surang. Dan mungkin parasaan hati ini akan kelihatan dari luar, meski telah diusahoan bana agar jan sampai nampak sahinggo urang indak tasingguang bahwa kito mambadeoan pergaulan iko. Ikolah kalamahan dan kakurangan manusia ko. Ambo indak bisa manutuik aa nan tasimpan dihati, dan itu bisa dirasoan oleh teman ambo nan ambo kecean bau muluik tadi,asa mula ambo manjauhinyo sabananyo, sabana-bana bau muluik sajo, bukan karano ado teman baru,indak samo sakali indak, sebab teman baruko, meski alah lamo kenal, tapi baru dakek satalah dakek tampek kasua sajo.(kami diasrama tu sakamar ado 60 urang, bacando rumah sakik asramanyo). Itulah akibaik bau muluik ko, awak bisa kehilangan teman nan awak sayangi bana. Teman ambo ko sayang bana ka ambo, samo juoa diambo sayang kainyo, tapi tapaso nyo kahilangan ambo, dan ambo salah juo, manga indak mangecek taruih tarang. Baalah,.. kamangecek taruih tarang, tasingguang inyo.Tapaso didiamkan sajo, ambiak alternatif lain, jauah tampek kasua, eh..akhianyo dapek pulo teman akrba nan sayang juo ka ambo, panyayang dan pancimburunyo nan baruko tanyato labiah pulo dari nan patamo.Beteman batigoko sulik bana rasonyo. Akhianyo tapaso piliah ciek sajo nan akrab, meski berteman tetap ratusan bahkan seribu penduduk disrama puteri itu, dari pagi-malam banyak di masjid senyo ambo, banyak maaja adiak-adiak kelas, atau teman-teman sajo, hanya sajo wukatu istirahat, disikola, makan, kalalok baru samo-samo jo teman akrab tadi. Dan kalau ado problema, baru samo-samo dipecahkan. Bak kecek urang banyak bunga ditaman nan indah dan wangi, tapi ciek sajo nan tapiliah, teman buliah banyak ditemani, tapi ciek masalah hati, nan indak bisa didustai, biasonyo awak piliah satu diantaro seribu teman itu. Dan iko juo ambo rasoan katiko maso-maso kuliyah Di Al Azhar, banyak teman lalaki nan sangaik dekat jo akrab ka ambo, sangaik banyak, dari berbagai daerah, indak dari daerah Minang sajo, tapi daerah lain, sadonyo dakek, tapi ciek sajo nan ka dipiliah untuak teman hiduik, kambali ka urang Minang juo akhianyo. Dek karano apo piliah nan ciek tu, itu nan katuju dihati, nan indak babau muluiknyo, barasiah badannyo,indak bau muluiknyo dek karano merokok, atau bau nan lain, meski bukan urang nan kayo,anak petani sajo nyo, tapi hatinyo sajo nan kayo. Jadi memang dihati ambo pribadi kebersihan badan dan muluik ko sangaiklah pentingnyo. Tantu masiang-masiang urang babedo dalam mamiliah, ado juo dek saking cintonyo, bau muluik banapun urang nan dicintoinyo, bau tu tadi jadi wangi se diinyo. Tai kuciangpun bisa taraso coklat se diinyo,. Itulah kecek urang. Cinto tu memang buta, cinta buta indaklah bisa mambedoan antara lembah maa nan ateh maa nan bawah.Urang buta tantu indak bisa mancaliak nan nyato lai doh. Demikian sekedar cerita ambo, mudah-mudahan lai ado manfaiknyo, bagi nan indak sanang, ambo mohon maaf, delete sajolah. Wassalamu'alaikum. Rahima(37 thn). --- Wady Afriadi <[EMAIL PROTECTED]> wrote: > > Yth. Dunsanak Urang Awak kasadonyo; > > Katiko ambo manulih tentang masalah mambaco Al > Fatiha sebagai makmum kutiko shalat berjama'ah, ambo > manyingguang saketek ttg baun muluik jama'ah lain > nan barado di sampiang kida atau suok kito katiko > sadang sumbayang tu. __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
