Manolah angku Datuak Bandaro ysh, ditibokan kato, sambah sarato salam mairingi.
Mambaco nan tasirek, lai sasuai harapan ambo jo usaho angku datuak. Kiniko
masalah pembinaan adat sasuai dirundiangkan dengan LKAAM. Sadangkan GM, ambo
liek, pejabat nan membidanginyo alun langkok sarek saroto rukun adatnyo, jadi
kalau duduak indak samo randah, tagak indak samo tenggi, alun dapek dibao
sahilie samudiak. Selain itu ado pulo semacam forum niniak mamak se-Jabodetabek
nan bulan lalu alah dirasmikan, dapek pulo angku baiyo batido disitu.
Minggu lalu, dari Datuak Marah Bangso ambo maliek ado beberapa buku ketek nan
alah angku tulis dan terbitkan, iko suatu amal nan baiek. Kironyo warisan nan
tak ternilai untuak generasi mudo kito. Untuak itu ambo menyampaikan salam
hormat.
Manolah mamanda kami Pak Saaf ysh,
Rumusan ABSSBK sabananyo alah tatulih dan terkompilasi di dalam tambo, dan
talisan dalam pitatah patitih adat. Kalau lai namuah, sabananyo dapek kito
seleksi dari 4 tambo nan alah diseleksi oleh Edwar Djamaris, lalu dikambangkan
saketek. Mungkin ado perkembangan zaman dalam seabad terakhir iko nan paralu
ditambahkan. Kalau coitu, buliah kito inventarisasi dulu permasalahan itu, lalu
dibahas basamo. Contoh, masalah tanah ulayat memang alun ditulih di dalam
tambo, walau sacaro lisan alah jaleh aturannyo, buliah kita tambahkan. Itu di
dalam hukum adat disabuikkan: kato kudian kato bacari.
Sasuai jo pituah, mairik parang jo berani mairik karojo jo usaho, tadi malam
ambo baru manarimo draft 01 ketentuan-ketentuan adat di Nagari Sulit Air, cubo
ambo lampirkan di siko. Runcano dalam 3 bulan ka muko akan kami diskusikan dan
sosialisasikan di masyarakat laweh di ranah dan di rantau untuak dapek
menyepakatinyo. Limbago nan akan managakkannyo adolah Kerapatan Adat Nagari
(KAN), karono balaku di salingkaran nagari. Mudah-mudahan dengan keikhlasan dan
usaho saroman itu dapek memulai gerakan baliak banagari, kumbali ka adaik,
pulang ka surau.
Satantang pun baitu, kiniko kami pun alah pulo mamulai peradilan perdamaian
adat, nan alah hampia saabad hilang di bumi Minangkabau. Rupono alah baderet
persoalan nan mintak penyelesaian sacaro adat. Kini kawan-kawan di ranah sadang
mamilah mano pakaro nan ka didahulukan. Mudah-mudahan minggu depan peradilan
perdamaian adat itu akan dimulai, untuak maso uji coba 3 bulan ke depan. Pemda
Prov sasuai nan alah disampaikan dalam pidato di rumah Ibu Yamin bulan lalu
menyambut antusias peradilan adat ko, dan menjadikan Sulit Air sebagai
percontohan.
Manolah Ajoduta ysh,
Usaho pembinaan adat adolah usaho kito basamo. Sabananyo sekolah/universitas
terbaik untuak mengembangkan pengetahuan adolah rumah. Iko untuak manjawek
pulo pertanyaan salah saurang sanak nan manuntuik para mamak untuak mengajarkan
anak-kamanakannyo masiang-masiang. Jadi sapendek pengetahuan ambo, nan maajakan
adat-istiadat itu iyolah urang sumando, atau bapak dari paja. Dalam kondisi
kemasyarakatan kiniko, pola bantuak itulah nan tajadi, apolai kiniko awak
labiah banyak tingga di rantau.
Contoh ka diri ambo, lahia dan gadang di rantau. Namun urang tuo (Buya)
satiok tahun mambao ambo pulang ka kampuang. Wakatu ketek diajarkan hiduik
babako babaki, tibo di rumah ibu, diajarkan hiduik baniniak bamamak. Walaupun
Buya urang nan sekolah tinggi dan bapangkek tinggi, namun perilaku ilu sebagai
sumando nan baik ditunjuakkan. Raso indak bakapatuik-an. Tapi disitulah ambo
belajar mengenai budi orang Minang. Buya itu saudara sepupu dari Tek Nona alm.
Katiko alah gadang dan dapek manaka, pelajaran adat ambo baco dari buku-buku.
Kiniko taserak buku-buku mengenai adat-istiadat di toko-toko buku. Indak ado
alasan indak ado bahan untuak itu. Apolai ado pulo kaset-kaset adat seperti
ceramah Dt. Perpatih itu. Biaso kalau pulang ka kampuang, baborong kaset-kaset
carito dan ceramah di Pasar Solok. Apolai banyak pemangku adat seperti Dt.
Bandaro lai aktif pulo menerbitkan buku. Untuak nan pandai ber-internet, banyak
pulo bahan di berbagai website.
Hidup dikandung adat, mati dikandung tanah.
Dalam perjalanan jabatan pemangku adat, perjalanan adat adolah jalan
makrifat. Mungkin raso iko indak saluruahnyo sampai ka anak-kamanakan. Dan
indak saluruah datuak pulo akan marasokan. Kalau jalan lah jauah, bukik lah
tenggi, lurah lah dalam, mungkin akan marasokan. Colah, kudo boban palajang
bukik, boban saguluang batu, basumpah pulo untuak bersikap adil kapado anak
kamanakan. Sialah makhluk nan bodoh ka manangguangkan (33:72).
Saitu nan dapek ambo sampaikan. Iko bukanlah kato bapintak kato babaleh, dek
karono bisuak ambo akan melakukan perjalanan jauah. Talabiah takurang mintak
maaf. Wassalam.
-datuk endang
chaidir latief <[EMAIL PROTECTED]> wrote: assalamualaikum ww
Maaf pa Syaf Iko bana nan ingin kito bicarokan dengan mantan ketua ketua LKAMM
teramsungk angku. Iko masalah nan sasalu dibicarokan nan undak pernah ado jalan
kaluanyo Bicaro terus
Ambo kini sedang di Padang mambicarokan dengan Dt Simulie Ketua LKAAM Rasonyo
itu paralunyo organisasi Bicaro perorangan baputa puta disinan kasinan juo
Kitro nan mandisikan Lembaga Kerapatan Adat Alam Minangkabau Paralu kita
luruihkan apo fungsi sabananyo dari organisasi ko Kito nanti nan akan dituntut
Salagi masih iduik Organisdasi ninik mamak untuik marapekkan adat Rapek kan ado
kesimpulan dan keputusan Lah sekian lamo aa kesimpulan dan keputusan
Wakatu ambo ka LKAAM Dt Simulie sulit dihubungi Talipon di LKAAM putuih indak
ado pitih mambbaie talipon Apo indak tragis
Ambo io penganut AAGIM Mulai dengan yang ketek dari diri sendiri dan sekarang
juo
Karano itu tolonglah pak Syaf bilo kito batamu para mantan Ketua LKAM yang
menurut janji kito pak Syaf yang akan mengatur waktunyo Pak Baharudin Dt
Rangkayo Basa masih iduik dan ado di Jakarta
Pak Dt Simulie setuju kalau paralu kito bantulah bara bana tiket kapa tabang
kibni
Tarimo kasih
Ch N Latief Dt Bandaro 78
Saafroedin BAHAR wrote:
Assalamualaikum w.w.
Buliah ambo manyalo saketet\k ? Ambo satuju jo paringatan Ananda Ajo Dutamardin
Umar di Amrik. Saluruah anak ambo nan lahia di Sumbar dan kini sabagian gadang
di Rantau, indak ado nan baminat ka adat jo budaya Minang, walaupun ambo
mandorong mereka untuak satidak-tidaknyo tahu. Mereka labiah maraso jadi urang
Indonesia.
Ado nan kurang sasaik sabalango nan nampak di ambo baa mako indak banyak minaik
nan mudo ka adat jo budaya Minang, yaitu jauahnyo jarek antaro nan kito katokan
jo kanyataan sahari-hari. Jo kato lain, apo nan kito katokan indak ado atau
kurang ado dalam kanyaan hiduik. Kito manyamokan adat dan budaya Minang itu jo
papatah patitih, dan papatah patitih itu kita samokan jo norma sakaligus
kanyataan.
Baa jalan kaluanyo ? Ambo alah mangusulkan ka Ananda Rahimah, Ananda Datuk
Endang Pahlawan, dan Ananda Datuk Marah Bangso, agar supayo saluruah norma
adat, budaya, dan ugamo nan kito inginkan maatur hiduik kito sabagai urang
Minang, yaitu ABS SBK, dikumpuakan jadi satu dalam Kompilasi Hukum ABS SBK, dan
kito kukuahkan dalam suatu Kongres Minangkabau.
Sasudah dikukuhkan, mako salain balaku untuk kito -- paliang tidak dalam
masalah keperdataan -- juo sakaligus bisa manjadi bahan ajaran untuak nan
mudo-mudo. Kalau indak baitu, mako masalah gadang iko akan majadi wacana ka
wacana sajo bakapanjangan.
Sakianlah tanggapan ambo.
Wassalam,
Soean Madjolelo )69th)
dutamardin umar wrote:
Alaikumsalam,
Yo bana tu Phi.
Makonyo awak-awak nan mumpuni soal adat dan budaya Minang
acok-acoklah malempar posting seperti nan dimukasuik. Kalau indak
beko jan disalahkan kami nan gadang dirantau nan indak tau jo
adaik, budayo jo limbago, akhirnyo mamposting nan kami ketahui
sajo. Daripado langang palanta, lumayanlah jadinyo.
wassalam/ajoduta/59-
Ephi Lintau wrote:
Assalamualaikum wr wb,
Mamak, Datuak, Uda, uni, adiak dan member MILIS nan ndak ambo sabuikan namonyo.
Sabalunyo ambo mohon maaf, kok apo nan ambo sampaikan ndak talatak pado
tampeknyo, namun izinkanlah ambo sekedar manyampaikan apo nan taraso di hati
saputar kondisi milis RN nan lah baumua 13 tahun.
sebuah pertanyaan kecil nan ambo ajukan adolah Apokah milis RN samo jo milis
Surau dgn Milis Gebu Minang atau milis minang lainnya ? Jawabnyo tantu TIDAK
(iko menuruik pendapat ambo nan pemahaman ambo sendiri salamo anggota di RN).
Begitu juga halnya milis Surau dan GM (ambo juo member disinan).
Satahu ambo adolah milis RN konsen dalam membicarakan masalah adat dan budaya
minang, sedangkan Surau lebih khusus membicarakan masalah agamo bagitu juga
halnya dgn GEBU Minang yang khusus membicarakan masalah pemberdayaan ekonomi di
minang.
Nah, manurut pemikiran ambo yang dangkal ko, mako sepantasnyolah...awak
memposting email ka milis RN sesuai jo visi dan misinyo yaitu masalah adat dan
budaya (mohon koreksi jiko ambo salah), kok kito ingin membicarakan masalah
agamo..rancaklah awak kasurau, baitu juo kalau ingin bicara ttg ekonomi minang,
rancaklah ka milis GEBU MINANG. jadi apo nan awak bicarakan dimilis ndak
tumpang tindih. ibarat..kalau basawah..jaleh pamatangnyo.
JADI menurut ambo...marilah awak gunakan milis sesuai jo tujuan masing2 milis.
Sekali lagi ambo mohon maaf..kok apo nan di sampaikan ko indak pado tampeknyo.
ditunggu tanggapannya, krn akhir2 ini dimilis RN, porsi postingan sepuatr adat
istiadat dan budaya minang sudah berkurang
Banyak maaf...
wassalamualikum wr wb
Ephi
Padang, 30 tahun.
---------------------------------
Blab-away for as little as 1¢/min. Make PC-to-Phone Calls using Yahoo!
Messenger with Voice.--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
